எரிபொருள் விலை சூத்திரத்தை பகிரங்கப்படுத்துமாறு சம்பிக்க கோரிக்கை

சர்வதேச சந்தையில் எரிபொருள் விலைகளுடன் ஒப்பிடுகையில், இலங்கையில் உள்ளூர் நுகர்வோரிடம் அதிக கட்டணம் அறவிடப்படுவதற்கான காரணம் என்ன என்பது குறித்து அரசாங்கம் உடனடியாக தெளிவுபடுத்த வேண்டும் என முன்னாள் அமைச்சர் பாடலி சம்பிக்க ரணவக வலியுறுத்தியுள்ளார்.

இலங்கையில் தற்போது நடைமுறையிலுள்ள எரிபொருள் விலை சூத்திரத்தை உடனடியாக பகிரங்கப்படுத்துமாறு அரசாங்கத்தைக் கேட்டுக்கொண்டுள்ள அவர், இது தொடர்பில் அறிக்கை ஒன்றையும் வெளியிட்டுள்ளார்.

சிங்கப்பூர் கப்பல்மேல் விலையின்படி மற்றும் ஒரு அமெரிக்க டொலரின் பெறுமதி 330 இலங்கை ரூபாயாகக் கணக்கிடப்பட்டு இந்த விபரங்களை அவர் ஒப்பீட்டு ரீதியாகச் சுட்டிக்காட்டியுள்ளார்:

ஒக்டேன் 92 ரக பெட்ரோல் (Octane 92 Petrol): சர்வதேச சந்தையில் ஒரு பீப்பாய் பெட்ரோலின் விலை 141 அமெரிக்க டொலராக காணப்படுகையில், அதன் ஒரு லீட்டர் கப்பல்மேல் விலை 292 ரூபாயாக மதிப்பிடப்படுகிறது. எனினும், உள்ளூர் சந்தையில் அது 414 ரூபாய்க்கு விற்பனை செய்யப்படுகிறது.

ஒக்டேன் 95 ரக பெட்ரோல் (Octane 95 Petrol): ஒரு பீப்பாய் 147 அமெரிக்க டொலராக இருக்கையில், லீட்டர் ஒன்றின் கப்பல்மேல் விலை 305 ரூபாயாகும். ஆனால், உள்ளூர் சில்லறை விலை 475 ரூபாயாக நிர்ணயிக்கப்பட்டுள்ளது.

ஆட்டோ டீசல் (Auto Diesel): ஒரு பீப்பாய் 169 அமெரிக்க டொலராக உள்ள நிலையில், இதன் லீட்டர் ஒன்றின் கப்பல்மேல் விலை 350 ரூபாயாகும். ஆனால் உள்ளூரில் 392 ரூபாய்க்கு விற்பனை செய்யப்படுகிறது.

சூப்பர் டீசல் (Super Diesel): ஒரு பீப்பாய் 177 அமெரிக்க டொலராக காணப்படுகையில், இதன் கப்பல்மேல் விலை 367 ரூபாயாக இருந்தாலும், உள்ளூர் சந்தையில் 528 ரூபாய்க்கு விற்கப்படுகிறது.

இதேவேளை, கச்சா எண்ணெய் ஒரு பீப்பாய் 103 அமெரிக்க டொலராக நிலவும் பட்சத்தில், தற்போதைய செலாவணி வீதத்தின்படி அதன் ஒரு லீட்டர் விலை தோராயமாக 213 ரூபாயாகவே அமைகிறது என்றும் அவர் குறிப்பிட்டுள்ளார்.

மோட்டார் சைக்கிள் ஓட்டுநர்கள், முச்சக்கர வண்டிச் சாரதிகள் மற்றும் பேருந்து உரிமையாளர்கள் உள்ளிட்ட சாதாரண பொதுமக்கள் செலுத்தும் எரிபொருள் கட்டணத்தில் எந்தெந்தக் கூறுகள் சேர்க்கப்பட்டுள்ளன என்பதை அரசாங்கம் வெளிப்படையாக அறிவிக்க வேண்டும் என்றும் முன்னாள் அமைச்சர் வலியுறுத்தினார்.

மேலும், இலங்கை மின்சார சபைக்கு லீட்டர் ஒன்று 210 ரூபாய் வீதம் எரிபொருள் எண்ணெய் விநியோகிக்கப்படுவதாகச் சுட்டிக்காட்டிய அவர், அந்தப் பரிவர்த்தனைகள் மூலம் ஈட்டப்படும் இலாபம் குறித்த விளக்கத்தையும் அரசாங்கம் வழங்க வேண்டும் எனக் கோரிக்கை விடுத்துள்ளார்.