முன்னாள் எம்.பி. மனைவியின் லஞ்ச விவகாரம்: நீதிமன்றப் பதிவாளர் கைது!
முன்னாள் பிரதி அமைச்சர் சரண குணவர்தனவுக்கு விதிக்கப்பட்ட சிறைத்தண்டனையை இடைநிறுத்துவதற்காக லஞ்சம் வழங்க முயன்ற சம்பவம் தொடர்பில், மினுவாங்கொட நீதவான் நீதிமன்றப் பதிவாளர் லஞ்சம் அல்லது ஊழல் பற்றிய சாட்டப்பட் குற்றச்சாட்டுகளைப் புலனாய்வு செய்யும் ஆணைக்குழுவினால் (CIABOC) கைது செய்யப்பட்டுள்ளார்.
முன்னாள் பிரதி அமைச்சரின் தண்டனையைக் குறைக்கும் நோக்கில் லஞ்சம் ஏற்றுக்கொள்ளப்படுவதற்குத் துணைபுரிந்தார் என்ற குற்றச்சாட்டின்கீழே இவர் கைது செய்யப்பட்டுள்ளதாக லஞ்ச ஊழல் ஒழிப்பு ஆணைக்குழு தெரிவித்துள்ளது.
இச் சம்பவம் தொடர்பில் மேற்கொள்ளப்பட்டு வரும் விரிவான விசாரணைகளின் ஒரு கட்டமாகவே இந்த அதிரடிக் கைது நடவடிக்கை இடம்பெற்றுள்ளது. முன்னதாக, இச் சம்பவத்துடன் தொடர்புடைய குற்றச்சாட்டில் முன்னாள் பிரதி அமைச்சரின் மனைவியான சின்னாரி லக்மந்தி ஹெட்டியாராச்சி கைது செய்யப்பட்டு எதிர்வரும் அக்டோபர் 6 ஆம் திகதி வரை விளக்கமறியலில் வைக்கப்பட்டுள்ளார்.
கொழும்பு மேல் நீதிமன்றத்தில் பணியாற்றும் அலுவலக உதவியாளர் ஒருவருக்குத் தனது கணவரின் தண்டனையைக் குறைப்பதற்காக 50,000 ரூபாய் லஞ்சமாக வழங்க முயன்றதாகவே அவர் மீது குற்றம் சுமத்தப்பட்டுள்ளது.
கைது செய்யப்பட்ட அலுவலக உதவியாளரின் கைத்தொலைபேசியிலிருந்து மீட்கப்பட்ட குறுஞ்செய்திகள், இந்த பணப் பரிமாற்றம் மற்றும் சதித்திட்டம் தொடர்பான முக்கிய சான்றுகளை வெளிப்படுத்தியுள்ளதாகப் புலனாய்வாளர்கள் நீதிமன்றத்தில் சுட்டிக்காட்டியுள்ளனர்.
அபிவிருத்தி லொத்தர் சபையின் தலைவராக 2006 ஆம் ஆண்டு பணியாற்றிய காலத்தில், வாகனங்களை வாடகைக்கு எடுத்தமையில் அரசுக்கு நிதி இழப்பை ஏற்படுத்தி, தனிநபர்களுக்கு முறையற்ற சலுகைகளை வழங்கினார் என்ற குற்றச்சாட்டில் சரண குணவர்தனவுக்கு கடந்த ஜூன் மாதம் கொழும்பு மேல் நீதிமன்றம் 16 ஆண்டுகள் கடுங்காவல் சிறைத்தண்டனையும், 1.8 மில்லியன் ரூபாய் தண்டப்பணமும் விதித்து தீர்ப்பளித்திருந்தது.
இந்தத் தண்டனையை இடைநிறுத்தப்பட்ட தண்டனையாக மாற்றி அமைப்பதற்காகவே இந்த லஞ்சப் பரிமாற்ற முயற்சி மேற்கொள்ளப்பட்டுள்ளதாகத் தெரியவந்துள்ளது.
மினுவாங்கொட நீதவான் நீதிமன்றப் பதிவாளரின் கைதைத் தொடர்ந்து, நீதித்துறை நிர்வாகத்திற்குள் இடம்பெற்ற இந்த லஞ்ச ஊழல் சதி குறித்து லஞ்ச ஊழல் ஒழிப்பு ஆணைக்குழு மேலும் தீவிர விசாரணைகளை முன்னெடுத்து வருகின்றது.
