இலங்கையில் ‘எல் நினோ’ காலநிலை மாற்றம்: பாரிய பாதிப்புகள் ஏற்படுமா ?

இலங்கையில் ‘எல் நினோ’ காலநிலை மாற்றம்: பாரிய பாதிப்புகள் ஏற்படுமா ?

பசிபிக் கடற்பரப்பில் ஏற்படும் வெப்ப மாற்றங்களால் உலகளாவிய ரீதியில் வெப்பநிலை அதிகரித்தாலும், இலங்கையில் ‘எல் நினோ’ (El Niño) காலநிலையின் தாக்கம் மிகக் குறைவாகவே இருக்கும் என எதிர்பார்க்கப்படுகிறது.

சுற்றுச்சூழல் அமைச்சின் காலநிலை மாற்றச் செயலகத்தின் பணிப்பாளர் லீல் ரந்தெனிய இது குறித்துத் தெரிவிக்கையில், எல் நினோவின் தாக்கங்கள் ஏதேனும் இருப்பின் அவை அடுத்த ஆண்டு பெப்ரவரி மாதத்திற்குப் பின்னரே தென்பட வாய்ப்புள்ளதாகக் வானிலை ஆய்வாளர்கள் கணித்துள்ளதாகக் குறிப்பிட்டுள்ளார்.

மழைவீழ்ச்சி நிலவரம்:

நாட்டின் தற்போதைய காலநிலை மற்றும் மழைவீழ்ச்சி குறித்து அவர் மேலும் விளக்குகையில்:

• தற்போது நிலவும் தென்மேற்கு பருவமழை செப்டம்பர் மாதம் வரை நீடிக்கும் என எதிர்பார்க்கப்படுகிறது.

• எதிர்வரும் ஜூலை மற்றும் ஆகஸ்ட் மாதங்களில் அவ்வப்போது மழை பெய்தாலும், ஒட்டுமொத்த பருவமழை வீழ்ச்சி சற்று குறையக்கூடும்.

• அக்டோபர் மற்றும் நவம்பர் மாதங்களில் நிலவும் இடைப்பருவமழை மூலம் நாட்டின் வருடாந்த மழைவீழ்ச்சியில் சுமார் 30 சதவீகிதம் கிடைக்கிறது.

புவியியல் ரீதியான சாதகத்தன்மை:

இலங்கை இந்தியப் பெருங்கடலில் அமைந்திருப்பதும், நாட்டின் மத்திய மலைநாடும் ‘எல் நினோ’ போன்ற உலகளாவிய காலநிலை நிகழ்வுகளால் கடும் பாதிப்புகள் ஏற்படுவதைத் தடுக்கின்றன.

"இலங்கையைச் சூழ கடல் இருப்பதாலும், நாட்டின் நடுவே மலைப்பகுதிகள் இருப்பதாலும் வளிமண்டலத்தில் நீராவிக்கு (Water vapour) தட்டுப்பாடு ஏற்படுவதில்லை. எனவே, எல் நினோவினால் பாரிய பாதிப்புகள் ஏற்படுவதற்கான சாத்தியக்கூறுகள் குறைவு" என லீல் ரந்தெனிய விளக்கமளித்தார்.

இருப்பினும், வடகிழக்கு பருவமழைக் காலத்தில் ஏதேனும் மாற்றங்கள் உணரப்பட்டால், உணவுப் பாதுகாப்பு மற்றும் நீர் சேமிப்பு குறித்து மக்கள் முன்கூட்டியே தயாராக இருக்க வேண்டியது அவசியம் என அவர் வலியுறுத்தியுள்ளார். தண்ணீரைச் சிக்கனமாகப் பயன்படுத்துமாறும், எதிர்கால காலநிலைப் சவால்களைத் திட்டமிட்ட முறையில் அமைதியாக எதிர்கொள்ளுமாறும் அவர் பொதுமக்களிடம் கேட்டுக்கொண்டுள்ளார். ஏதேனும் பாதிப்புகள் ஏற்பட்டாலும் அதனைச் சரியாகக் கையாள முடியும் என அவர் நம்பிக்கை வெளியிட்டுள்ளார்.