இலங்கையில் அதிக வரி விதிப்புகள் தொடர வேண்டியதன் அவசியம் என்ன? – பொருளாதார நிபுணர் விளக்கம்

பல தசாப்தங்களாகப் பின்பற்றப்பட்ட தவறான பொருளாதாரக் கொள்கைகள் மற்றும் கடன் மூலம் முன்னெடுக்கப்பட்ட அபிவிருத்தித் திட்டங்களால் ஏற்பட்ட பாதிப்புகளைச் சரிசெய்வதற்கு இலங்கை அதிக வரி வருவாயைப் பேண வேண்டியுள்ளதாகப் பொருளாதார நிபுணர் உமேஷ் மொரமுதலி தெரிவித்துள்ளார்.

சமூக ஊடகப் பதிவொன்றில் இதனைத் தெரிவித்துள்ள அவர், 1990ஆம் ஆண்டு முதல் 2020ஆம் ஆண்டு வரையான காலப்பகுதியில் இலங்கையின் தனிநபர் மொத்த உள்நாட்டு உற்பத்தி (GDP per capita) மூன்று மடங்குக்கும் அதிகமாக உயர்ந்ததாகக் குறிப்பிட்டுள்ளார்.

எனினும், இதே காலப்பகுதியில் அரசாங்கத்தின் வரி வருவாய், மொத்த உள்நாட்டு உற்பத்தியின் சுமார் 20 சதவீதத்திலிருந்து கிட்டத்தட்ட 8 சதவீதமாகக் குறைந்துள்ளதாகவும் அவர் சுட்டிக்காட்டியுள்ளார்.

அதேவேளை, அரசாங்கத்தின் செலவினங்கள் குறைந்த போதிலும், நாட்டின் கடன் சுமை அதிகரித்ததாகவும், இதன் காரணமாக இலங்கை தற்போது கடினமான பொருளாதாரச் சீராக்க நடவடிக்கைகளை எதிர்கொள்ள வேண்டிய நிலைக்குத் தள்ளப்பட்டுள்ளதாகவும் அவர் தெரிவித்துள்ளார்.

கடந்த காலங்களில் தவறான பொருளாதாரக் கொள்கைகளால் ஏற்பட்ட பாதிப்புகளைச் சரிசெய்யும் சுமை தற்போது நடுத்தர வர்க்கத்தினர் மற்றும் தொழில்முறை நிபுணர்கள் மீது சுமத்தப்பட்டுள்ளதாகவும் உமேஷ் மொரமுதலி குறிப்பிட்டுள்ளார்.

கடன் பெற்று முன்னெடுக்கப்பட்ட அரசாங்கச் செலவினங்கள் ஊடாகவே இவர்களில் பலரது வாழ்க்கைத் தரம், கல்வி மற்றும் அபிவிருத்தி வாய்ப்புகள் ஓரளவுக்கு ஆதரிக்கப்பட்டதாகவும் அவர் சுட்டிக்காட்டியுள்ளார்.

"அவற்றுக்கான செலவைத் திருப்பிச் செலுத்த வேண்டிய நேரம் தற்போது வந்துவிட்டது" எனவும் அவர் தனது பதிவில் தெரிவித்துள்ளார்.