இலங்கையின் 2027 வரவு செலவுத் திட்டம்: கடன் குறைப்பு இலக்கில் தொடரும் பயணம் – Fitch Ratings
இலங்கையின் 2027ஆம் ஆண்டுக்கான வரவு செலவுத் திட்டம், முதலீட்டுச் செலவுகள் மற்றும் டித்வா புயலால் ஏற்பட்ட பாதிப்புகளை மீளமைப்பதற்கான செலவுகள் அதிகரிக்கப்பட்டுள்ள போதிலும், நிதி ஒழுக்கத்தையும் அரச கடனைக் குறைக்கும் இலக்கையும் அரசாங்கம் தொடர்ந்து முன்னெடுப்பதை வெளிப்படுத்துவதாக Fitch Ratings நிறுவனம் தெரிவித்துள்ளது.
2026ஆம் ஆண்டுக்கான நிதி இலக்குகளை எதிர்பார்த்ததை விடச் சிறப்பாக அடைந்தமை மற்றும் அரச கடனைக் குறைப்பதில் அரசாங்கம் காட்டியுள்ள கவனம் ஆகியவை, கடந்த செப்டெம்பர் மாதம் இலங்கையின் இறையாண்மைக் கடன் தரப்படுத்தலை 'CCC+' இலிருந்து 'B-' நிலைக்கு உயர்த்துவதற்கான முக்கிய காரணங்களாக அமைந்ததாக அந்த நிறுவனம் சுட்டிக்காட்டியுள்ளது.
2027ஆம் ஆண்டில் மொத்த உள்நாட்டு உற்பத்தியில் 2.3 சதவீத முதன்மை நிதி உபரியை (Primary Surplus) அடைவதை வரவு செலவுத் திட்டம் இலக்காகக் கொண்டுள்ளது. இது 2026ஆம் ஆண்டில் மதிப்பிடப்பட்ட 3.6 சதவீதத்துடன் ஒப்பிடுகையில் குறைவானதாகும்.
கடந்த ஆண்டு வரவு செலவுத் திட்டத்தில் நிர்ணயிக்கப்பட்ட 2.5 சதவீத இலக்கையும், Fitch நிறுவனம் முன்னதாகக் கணித்திருந்த 2.6 சதவீதத்தையும் விட 2026ஆம் ஆண்டின் முதன்மை நிதி உபரி அதிகமாக அமைந்துள்ளது. இதற்குப் பிரதான காரணமாக எதிர்பார்த்ததை விட அதிக வருமானம் கிடைத்துள்ளமை குறிப்பிடப்பட்டுள்ளது.
2027ஆம் ஆண்டில் வருமானம் குறைவடைவதும் மூலதனச் செலவுகள் அதிகரிப்பதும் முதன்மை நிதி உபரி குறைவதற்குக் காரணமாக இருந்தாலும், இது அரச கடனைக் குறைக்கும் பாதைக்கு முரணானதல்ல என Fitch தெரிவித்துள்ளது.
இதற்கமைய, 2027ஆம் ஆண்டில் வரவு செலவுத் திட்டப் பற்றாக்குறை மொத்த உள்நாட்டு உற்பத்தியில் 4.5 சதவீதமாக இருக்கும் என எதிர்பார்க்கப்படுகிறது. இது 2026ஆம் ஆண்டின் 3.7 சதவீதத்தை விட அதிகமாகும்.
2027ஆம் ஆண்டுக்கான வரவு செலவுத் திட்ட மதிப்பீடுகள் நம்பகத்தன்மை கொண்டவையாகவும், கடந்த செப்டெம்பர் மாதம் இலங்கையின் இறையாண்மைக் கடன் மதிப்பீட்டை மீளாய்வு செய்தபோது Fitch நிறுவனம் முன்வைத்த கணிப்புகளுடன் பெருமளவில் ஒத்துப்போவதாகவும் தெரிவிக்கப்பட்டுள்ளது.
எனினும், எதிர்பார்த்ததை விட அதிகமான செலவினங்கள் திட்டமிடப்பட்டுள்ளதால், முதன்மை நிதி உபரிக்கான இலக்கு தமது கணிப்பான 2.8 சதவீதத்தை விடச் சற்றுக் குறைவாக இருப்பதாகவும், மூலதனச் செலவினங்கள் முழுமையாக நடைமுறைப்படுத்தப்படாத பட்சத்தில் எதிர்பார்த்ததை விட அதிக நிதி உபரியை அடைய வாய்ப்புள்ளதாகவும் அந்த நிறுவனம் குறிப்பிட்டுள்ளது.
2027ஆம் ஆண்டில் முதன்மைச் செலவினங்கள் மொத்த உள்நாட்டு உற்பத்தியில் 13.6 சதவீதமாக மதிப்பிடப்பட்டுள்ளன. இது 2024ஆம் ஆண்டின் பொது நிதி முகாமைத்துவச் சட்டத்தின் (Public Finance Management Act) கீழ் நிர்ணயிக்கப்பட்டுள்ள 13 சதவீத உச்சவரம்பை விட அதிகமாகும்.
டித்வா புயலுக்குப் பின்னரான மீள்கட்டமைப்புப் பணிகளுக்கான மூலதனச் செலவுகள் மற்றும் அதிகரிக்கப்பட்டுள்ள அரச முதலீட்டுத் திட்டங்கள் காரணமாகவே இந்த தற்காலிக விலகல் ஏற்பட்டுள்ளதாக Fitch தெரிவித்துள்ளது.
2025 டிசெம்பரில் நிறைவேற்றப்பட்ட மேலதிக வரவு செலவுத் திட்டத்தின் கீழ், புயல் மீள்கட்டமைப்புக்காக ஒதுக்கப்பட்ட 260 பில்லியன் ரூபா நிதியும் இதில் உள்ளடக்கப்பட்டுள்ளது. 2026ஆம் ஆண்டில் ஒதுக்கப்பட்ட நிதி முழுமையாகச் செலவிடப்படாததால், அந்தத் தொகை 2027ஆம் ஆண்டுக்கு மாற்றப்பட்டுள்ளது.
பொது நிதி முகாமைத்துவச் சட்டத்தின் செலவின உச்சவரம்பிலிருந்து விலகுவதற்கு அரசாங்கம் இரண்டாவது ஆண்டாக முயற்சித்துள்ள போதிலும், 2026ஆம் ஆண்டில் ஒதுக்கப்பட்ட செலவுகள் முழுமையாக நடைமுறைப்படுத்தப்படாததால் அந்த உச்சவரம்பு உண்மையில் மீறப்படவில்லை என்றும் நிறுவனம் சுட்டிக்காட்டியுள்ளது.
இதற்கிடையில், வரி வருமானத்தைத் தொடர்ந்து அதிகரிப்பதும், வரி செலுத்தும் அடிப்படையை விரிவுபடுத்துவதும் அரசாங்கத்தின் நிதி உபரியைப் பேணுவதற்கு முக்கியமானதாக அமையும் என Fitch தெரிவித்துள்ளது.
2025ஆம் ஆண்டில் மொத்த உள்நாட்டு உற்பத்தியில் 16.7 சதவீதமாக இருந்த அரச வருமானம், 2026ஆம் ஆண்டில் 16.6 சதவீதமாகவும், 2027ஆம் ஆண்டில் 15.8 சதவீதமாகவும் குறைவடையும் என மதிப்பிடப்பட்டுள்ளது.
வாகன இறக்குமதிக்கான கட்டுப்பாடுகள் தளர்த்தப்பட்ட பின்னர் ஏற்பட்ட அதிகரித்த இறக்குமதித் தேவையால் கிடைத்த சுங்க வரி வருமானம், இறக்குமதிகள் வழமைக்குத் திரும்பும்போது குறைவடையலாம் என எதிர்பார்க்கப்படுகிறது. அதேவேளை, வரி செலுத்துவோரின் எண்ணிக்கையை அதிகரித்தல் மற்றும் வரி இணக்கப்பாட்டை மேம்படுத்துதல் போன்ற நடவடிக்கைகள் மூலம் பரந்தளவிலான வருமான அதிகரிப்பை அரசாங்கம் முன்னெடுத்து வருவதாகவும் தெரிவிக்கப்பட்டுள்ளது.
மேலும், 2027ஆம் ஆண்டுக்கான வரவு செலவுத் திட்டம் சர்வதேச நாணய நிதியத்தின் (IMF) வேலைத்திட்ட நிபந்தனைகளுடன் பெருமளவில் ஒத்துப்போவதாகவும், இது இலங்கைக்கான விரிவாக்கப்பட்ட நிதி வசதித் திட்டத்தின் (EFF) ஏழாவது மீளாய்வுக்கு ஆதரவாக அமையும் என்றும் Fitch குறிப்பிட்டுள்ளது.
தற்போதைய சர்வதேச நாணய நிதிய வேலைத்திட்டம் 2027 மார்ச் மாதத்துடன் நிறைவடையவுள்ள நிலையில், அடுத்தகட்ட நிதி ஏற்பாடு தொடர்பில் ஆராய்வதற்கான குழுவொன்றை அமைப்பதாக அரசாங்கம் அறிவித்துள்ளது. இத்தகைய புதிய ஏற்பாடு எதிர்கால பொருளாதாரக் கொள்கைகளுக்கு மேலும் உறுதியான வழிகாட்டியாக அமையக்கூடும் எனவும் தெரிவிக்கப்பட்டுள்ளது.
அரச கடனைக் குறைக்கும் இலக்கைத் தொடர்ந்து அடைவதற்கும் எதிர்காலக் கடன் தரப்படுத்தலை மேம்படுத்துவதற்கும் வருமான அதிகரிப்பைப் பேணுதல் மற்றும் செலவினங்களைக் கட்டுப்படுத்துதல் ஆகியவை முக்கியமானவை என Fitch வலியுறுத்தியுள்ளது.
நடுத்தர காலப்பகுதியில் மொத்த உள்நாட்டு உற்பத்தியில் 3 சதவீத முதன்மை நிதி உபரியைப் பேணுவதே அரசாங்கத்தின் இலக்காக உள்ளது. இதனை அடைவதற்கு, பொது நிதி முகாமைத்துவச் சட்டத்தின் கீழ் நிர்ணயிக்கப்பட்டுள்ள 13 சதவீத செலவின உச்சவரம்புக்கு உட்பட்டு, அரசியல் ரீதியாக சவாலான தீர்மானங்களை எடுக்க வேண்டியிருக்கும் என்றும் நிறுவனம் குறிப்பிட்டுள்ளது.
அதேவேளை, முதலீட்டுச் செலவினங்களை அதிகரிப்பது நாட்டின் பொருளாதார வளர்ச்சித் திறனை மேம்படுத்த உதவும் எனவும், இலங்கையின் நடுத்தர காலப் பொருளாதார வளர்ச்சி 4.2 சதவீதமாக இருக்கும் எனத் தாம் கணிப்பதாகவும் Fitch தெரிவித்துள்ளது.
எனினும், ஒதுக்கப்பட்ட மூலதன நிதியை முறையாகச் செலவிடுதல், முதலீடுகளைச் சரியான துறைகளுக்கு வழிநடத்துதல் மற்றும் பரந்த பொருளாதாரக் கட்டமைப்பு சீர்திருத்தங்களை முன்னெடுத்தல் ஆகியவற்றின் அடிப்படையிலேயே இந்த இலக்குகளை அடைய முடியும் எனவும் சுட்டிக்காட்டப்பட்டுள்ளது.
இலங்கையில் கடந்த சில ஆண்டுகளில் குறிப்பிடத்தக்க நிதி மறுசீரமைப்புகள் மேற்கொள்ளப்பட்டுள்ள போதிலும், நாட்டின் நிதிசார் பாதிப்புகள் இன்னமும் உயர்ந்த மட்டத்திலேயே இருப்பதாக Fitch எச்சரித்துள்ளது.
2022ஆம் ஆண்டில் மொத்த உள்நாட்டு உற்பத்தியில் 115 சதவீதமாக இருந்த அரச கடன், 2026ஆம் ஆண்டில் சுமார் 92 சதவீதமாகக் குறைவடையும் என எதிர்பார்க்கப்படுகிறது. இருப்பினும், 'B' கடன் தரப்படுத்தலைக் கொண்ட நாடுகளின் சராசரியான 55 சதவீதத்தை விட இது கணிசமாக அதிகமாகும்.
மேலும், அரச வருமானத்தில் வட்டி செலுத்துவதற்காகச் செலவிடப்படும் தொகை, 2023ஆம் ஆண்டில் சுமார் 80 சதவீதமாக இருந்த நிலையில், 2026ஆம் ஆண்டில் 41 சதவீதமாகக் குறைவடையும் என எதிர்பார்க்கப்படுகிறது. இருப்பினும், 'B' தரப்படுத்தலைக் கொண்ட நாடுகளின் சராசரியான 12.7 சதவீதத்தை விட இது மூன்று மடங்குக்கும் அதிகமாகும்.
எனவே, அரசாங்கத்தின் நிதிக் கொள்கைகள் மீதான நம்பகத்தன்மையைத் தொடர்ந்து உறுதிப்படுத்துவதும், ஆரோக்கியமான முதன்மை நிதி உபரியைப் பேணுவதும், நாட்டின் கடன் நிலைத்தன்மையை உறுதிப்படுத்துவதற்கும் எதிர்காலத்தில் கடன் தரப்படுத்தலை மேலும் உயர்த்துவதற்கும் முக்கியமானதாக அமையும் என Fitch Ratings தெரிவித்துள்ளது.