இலங்கைக்கு கடத்தப்படவிருந்த 100 கிலோ மெத்தம்பெட்டமைன் போதைப்பொருள்! விஜய்யின் TVK கட்சி நிர்வாகி இந்தியாவில் கைது
இந்திய நடிகரும் தமிழக வெற்றிக் கழகத்தின் (TVK) தலைவருமான விஜய்யின் கட்சி நிர்வாகி ஒருவர், இலங்கைக்கு கடல் மார்க்கமாக பெருமளவு மெத்தம்பெட்டமைன் போதைப்பொருளைக் கடத்த முயன்றதாகக் கூறப்படும் சம்பவம் தொடர்பில் தமிழகத்தில் கைது செய்யப்பட்டுள்ளார்.
கைது செய்யப்பட்டவர், நாகப்பட்டினம் மாவட்ட TVK கட்சியின் செயற்குழு உறுப்பினரான 42 வயதுடைய என். பூபாலன் என இந்திய ஊடகங்கள் செய்தி வெளியிட்டுள்ளன.
நாகப்பட்டினம் பகுதியில் போதைப்பொருள் கடத்தல் நடவடிக்கை இடம்பெறவுள்ளதாகக் கிடைத்த இரகசியத் தகவலின் அடிப்படையில் மேற்கொள்ளப்பட்ட நடவடிக்கையின்போது, பூபாலன் உள்ளிட்ட நான்கு பேர் கைது செய்யப்பட்டுள்ளனர். இந்த நடவடிக்கையில் சுமார் 100 கிலோகிராம் மெத்தம்பெட்டமைன் போதைப்பொருள் கைப்பற்றப்பட்டதாகவும் தெரிவிக்கப்படுகிறது.
கடந்த ஒக்டோபர் 16ஆம் திகதி அதிகாலை சுமார் 6 மணியளவில், நாகப்பட்டினத்திலிருந்து இலங்கைக்கு போதைப்பொருட்களைக் கடத்தத் திட்டமிடப்பட்டுள்ளதாகக் கிடைத்த தகவலையடுத்து பாதுகாப்புப் பிரிவினர் சோதனை நடவடிக்கைகளை முன்னெடுத்துள்ளனர்.
முதலில் சந்தேகநபர் ஒருவரின் வீட்டில் சோதனை நடத்திய அதிகாரிகள், பின்னர் பூபாலனின் வீட்டிலும் சோதனை மேற்கொண்டுள்ளனர். இதன்போது, குறித்த கடத்தல் நடவடிக்கையில் பூபாலன் முக்கிய பங்காற்றியிருக்கலாம் என விசாரணையாளர்கள் சந்தேகிப்பதாக இந்திய ஊடகங்கள் குறிப்பிட்டுள்ளன.
மேலும், பூபாலனின் மனைவி இலங்கைப் பிரஜை எனத் தெரிவிக்கப்படுவதுடன், இந்தத் தொடர்பு சந்தேகத்திற்குரிய போதைப்பொருள் கடத்தல் வலையமைப்பு குறித்த விசாரணைகளில் ஆராயப்பட்டு வருவதாகவும் தகவல்கள் தெரிவிக்கின்றன.
சென்னையிலிருந்து கொண்டுவரப்பட்டதாகக் கூறப்படும் போதைப்பொருட்கள், தமிழகத்தின் பல்வேறு பகுதிகளுக்கு விநியோகிப்பதற்காகவும், இலங்கைக்குக் கடத்துவதற்கான சாத்தியக்கூறுகளுடனும் சேமித்து வைக்கப்பட்டிருந்ததாக விசாரணைகளில் தெரியவந்துள்ளதாகக் கூறப்படுகிறது.
கைது செய்யப்பட்ட சந்தேகநபர்களும் கைப்பற்றப்பட்ட போதைப்பொருட்களும் மேலதிக விசாரணைகளுக்காக நாகப்பட்டினம் சுங்கத் திணைக்கள அலுவலகத்துக்கு அழைத்துச் செல்லப்பட்டுள்ளனர்.
இதற்கிடையில், பூபாலன் போதைப்பொருள் கடத்தல் நடவடிக்கையில் ஈடுபட்டதாகக் கூறப்படும் குற்றச்சாட்டுகள் மற்றும் கட்சியின் கொள்கைகளுக்கு முரணான செயற்பாடுகள் தொடர்பில், அவரைக் கட்சியின் அடிப்படை உறுப்பினர் பதவி மற்றும் அனைத்துப் பொறுப்புகளிலிருந்தும் நீக்குவதாக நாகப்பட்டினம் மாவட்ட TVK செயலாளர் எம். சுகுமாறன் அறிவித்துள்ளார்.
எனினும், இந்தச் சம்பவம் தொடர்பான விசாரணைகள் தொடர்ந்து முன்னெடுக்கப்பட்டு வரும் நிலையில், சந்தேகநபர்கள் மீதான குற்றச்சாட்டுகள் நீதிமன்றத்தில் நிரூபிக்கப்பட வேண்டியவையாகும்.
