இலங்கைக்கான ஏழு புதிய தூதுவர்கள் ஜனாதிபதியிடம் நற்சான்றிதழ்களை சமர்ப்பித்தனர்
இலங்கைக்குப் புதிதாக நியமிக்கப்பட்ட ஏழு நாடுகளின் தூதுவர்கள் மற்றும் உயர்ஸ்தானிகர்கள் தமது நற்சான்றிதழ்களை ஜனாதிபதி அநுர குமார திஸாநாயக்கவிடம் இன்று (17) கையளித்தனர்.
ஜனாதிபதி செயலகத்தில் நடைபெற்ற நிகழ்வில், தென் கொரியா, சுவிட்சர்லாந்து, ஐரோப்பிய ஒன்றியம், எகிப்து, லாவோஸ், நமீபியா மற்றும் சிங்கப்பூர் ஆகிய நாடுகளைப் பிரதிநிதித்துவப்படுத்தும் தூதுவர்கள் மற்றும் உயர்ஸ்தானிகர்கள் தமது நற்சான்றிதழ்களைச் சமர்ப்பித்தனர்.
இதன்படி, தென் கொரியாவுக்கான தூதுவர் கிம் யூன்-ஜங், சுவிட்சர்லாந்துக்கான தூதுவர் டானியல் ஹுன், ஐரோப்பிய ஒன்றியத்துக்கான தூதுவர் சில்வியா ஹார்ட்லீஃப், எகிப்துக்கான தூதுவர் அஹ்மட் எல்-சயீத் அப்தெல் ஹலீம் அமெர் ஹெலால், லாவோஸுக்கான தூதுவர் விதாயா சாயவோங், நமீபியாவுக்கான உயர்ஸ்தானிகர் அலெக்ஸ் எல். டுகுஹுப்வேலே மற்றும் சிங்கப்பூருக்கான உயர்ஸ்தானிகர் பெட்ரிக் டேனியல் ஆகியோர் தமது நற்சான்றிதழ்களை ஜனாதிபதியிடம் கையளித்தனர்.
இவர்களில் தென் கொரியா, சுவிட்சர்லாந்து, ஐரோப்பிய ஒன்றியம் மற்றும் எகிப்து ஆகியவற்றின் தூதுவர்கள் கொழும்பைத் தளமாகக் கொண்டு செயற்படவுள்ளதுடன், லாவோஸ் மற்றும் நமீபியாவின் பிரதிநிதிகள் புதுடில்லியைத் தளமாகக் கொண்டும், சிங்கப்பூரின் உயர்ஸ்தானிகர் சிங்கப்பூரைத் தளமாகக் கொண்டும் செயற்படவுள்ளனர்.
இலங்கை அரசாங்கத்தின் இணக்கப்பாட்டுடன் அந்தந்த நாடுகளின் அரசாங்கங்களால் இத்தூதுவர்கள் நியமிக்கப்பட்டுள்ளனர். ஐரோப்பிய ஒன்றியத்தின் தூதுவர் ஐரோப்பிய ஒன்றியத்தைப் பிரதிநிதித்துவப்படுத்தும் வகையில் நியமிக்கப்பட்டுள்ளார்.
இந்த நிகழ்வில் வெளிவிவகார, வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் விஜித ஹேரத் மற்றும் ஜனாதிபதியின் செயலாளர் கலாநிதி நந்திக சனத் குமாநாயக்க ஆகியோரும் கலந்துகொண்டனர்.