இணையம் வழியாக வாசனைகளைப் பரிமாறும் புதிய தொழில்நுட்பம் கண்டுபிடிப்பு!

இணையம் வழியாக வாசனைகளைக் கண்டறிந்து, அவற்றைத் தொலைதூர இடங்களில் மீண்டும் உருவாக்கக்கூடிய புதிய தொழில்நுட்பத்தை விஞ்ஞானிகள் உருவாக்கியுள்ளனர்.

இந்தத் தொழில்நுட்பத்தின் மூலம் எதிர்காலத்தில் காணொளி அழைப்புகளின்போது வாசனைகளை அனுபவிப்பதுடன், இணையவழிக் கொள்வனவுகளின்போது வாசனைத் திரவியங்கள் உள்ளிட்ட பொருட்களின் வாசனைகளையும் அறிந்துகொள்ள முடியும் என எதிர்பார்க்கப்படுகிறது.

அமெரிக்காவின் ஒஹியோ மாநிலப் பல்கலைக்கழக ஆராய்ச்சியாளர்கள், சீனாவைச் சேர்ந்த ஆய்வாளர்களுடன் இணைந்து **'Scentronic'** எனப்படும் இந்தத் தொழில்நுட்பத்தை உருவாக்கியுள்ளனர்.

செயற்கை நுண்ணறிவைப் பயன்படுத்தி வாசனைகளை அடையாளம் கண்டு, அவை தொடர்பான தகவல்களை இணையம் வழியாகப் பரிமாறுவதே இந்தத் தொழில்நுட்பத்தின் முக்கிய அம்சமாகும்.

ரொய்ட்டர்ஸ் செய்தி நிறுவனத்தின் தகவலின்படி, வாயுக்களைக் கண்டறியும் உணரிகளைக் கொண்ட மின்னணு மூக்கு மற்றும் இயந்திரக் கற்றல் முறைமை ஆகியவற்றின் உதவியுடன் குறிப்பிட்ட வாசனைகளை இந்தக் கருவி அடையாளம் காண்கிறது.

அதன் பின்னர், அடையாளம் காணப்பட்ட வாசனை தொடர்பான தகவல்கள் இணையம் வழியாக மற்றொரு கருவிக்கு அனுப்பப்படுகின்றன. அந்தப் பெறும் கருவி, பொருத்தமான வாசனை மூலக்கூறுகளை வெளியிட்டு, அசல் வாசனையை மீண்டும் உருவாக்குகிறது.

ஆராய்ச்சியாளர்கள் காபி, கேக், ஆரஞ்சு, பியர் மற்றும் சிவப்பு வைன் ஆகிய ஐந்து வகையான வாசனைகளைப் பயன்படுத்தி இந்தத் தொழில்நுட்பத்தை வெற்றிகரமாகப் பரிசோதித்துள்ளனர்.

மேலும், 14 தன்னார்வலர்கள் பங்கேற்ற பரிசோதனையின்போது, மீண்டும் உருவாக்கப்பட்ட வாசனைகளைப் பங்கேற்பாளர்கள் சுமார் 73 சதவீதம் சரியாக அடையாளம் கண்டுள்ளனர்.

இந்தத் தொழில்நுட்பம் நடைமுறைப் பயன்பாட்டுக்கு வந்தால், வெளிநாடுகளில் வசிக்கும் நண்பர்கள் மற்றும் குடும்பத்தினருடன் உணவுப் பொருட்களின் வாசனைகளைப் பகிர்ந்துகொள்ள முடியும். அதேபோல், காணொளி உரையாடல்களின்போது வாசனைகளை அனுபவிப்பதற்கும், இணையவழியில் பொருட்களைக் கொள்வனவு செய்யும்போது வாசனைத் திரவியங்கள் உள்ளிட்டவற்றின் வாசனைகளைப் பரிசோதிப்பதற்கும் வாய்ப்பு ஏற்படும்.

இதற்கிடையில், இந்தத் தொழில்நுட்பத்தை அடிப்படையாகக் கொண்ட கையில் அணியும் காப்புகள் மற்றும் கழுத்தில் அணியும் அணிகலன்கள் போன்ற அணியக்கூடிய சாதனங்களையும் ஆராய்ச்சியாளர்கள் உருவாக்கியுள்ளனர்.

எனினும், இந்தத் தொழில்நுட்பம் இன்னும் பரிசோதனை நிலையிலேயே உள்ளது. தற்போது அனைத்து வகையான வாசனைகளையும் இதன் மூலம் மீண்டும் உருவாக்க முடியாது. மேலும், குறிப்பிட்ட வாசனையை உருவாக்குவதற்குத் தேவையான வாசனைத் திரவங்கள் பெறும் கருவியில் முன்கூட்டியே இருக்க வேண்டும்.

எனவே, அதிகளவிலான வாசனைகளைக் கண்டறிதல், அவற்றைத் துல்லியமாக மீண்டும் உருவாக்குதல் மற்றும் சிறிய அளவிலான நடைமுறைச் சாதனங்களை உருவாக்குதல் உள்ளிட்ட விடயங்களில் மேலதிக முன்னேற்றங்கள் அவசியம் என விஞ்ஞானிகள் தெரிவிக்கின்றனர்.

இந்த ஆய்வின் முடிவுகள் 'Science Advances' என்ற அறிவியல் ஆய்விதழில் வெளியிடப்பட்டுள்ளன.