ரணில் மீதான நிதி முறைகேடு வழக்கு நவம்பர் 11 ஆம் திகதி வரை ஒத்திவைப்பு

முன்னாள் ஜனாதிபதி ரணில் விக்கிரமசிங்க மற்றும் முன்னாள் ஜனாதிபதியின் செயலாளர் சமன் ஏகநாயக்க ஆகியோருக்கு எதிராக குற்றப்புலனாய்வு திணைக்களத்தால் (CID) தொடரப்பட்ட வழக்கை, சட்டமா அதிபரின் ஆலோசனையைப் பெற்றுக்கொள்வதற்காக எதிர்வரும் நவம்பர் மாதம் 11 ஆம் திகதி வரை ஒத்திவைக்க கொழும்பு கோட்டை நீதவான் நீதிமன்றம் இன்று (30) உத்தரவிட்டுள்ளது.

இவ்வழக்கு கொழும்பு கோட்டை நீதவான் பசான் அமரசேன முன்னிலையில் விசாரணைக்கு எடுத்துக்கொள்ளப்பட்ட போது, ரணில் விக்கிரமசிங்க மற்றும் சமன் ஏகநாயக்க ஆகியோர் நீதிமன்றத்தில் முன்னிலையாகியிருந்தனர்.

விசாரணைகளின் முன்னேற்றம் மற்றும் சட்டமா அதிபரின் ஆலோசனையைப் பெறவேண்டியதன் அவசியத்தை கருத்திற் கொண்டு நீதவான் இந்த உத்தரவைப் பிறப்பித்தார்.

கடந்த 2023 ஆம் ஆண்டின் பிற்பகுதியில் இடம்பெற்ற உத்தியோகபூர்வ வெளிநாட்டு விஜயத்தின் போது, லண்டனில் நடைபெற்ற தனது மனைவியின் பட்டமளிப்பு விழாவில் கலந்துகொள்வதற்காக சுமார் 16.9 மில்லியன் ரூபாய் அரசாங்க நிதியை முறைகேடாகப் பயன்படுத்தியதாக சுமத்தப்பட்ட குற்றச்சாட்டின்கீழேயே இந்த வழக்கு பதிவு செய்யப்பட்டுள்ளது.

அமெரிக்கா மற்றும் பிரித்தானியா ஆகிய நாடுகளுக்கான விரிவான விஜயத்தின் ஒரு பகுதியாகவே இந்த லண்டன் பயணம் அமைந்திருந்ததுடன், அரசாங்கச் செலவிலான குழுவொன்றும் இதில் பங்கேற்றிருந்ததாகக் கூறப்படுகிறது.

இச்சம்பவம் தொடர்பில் குற்றப்புலனாய்வு திணைக்களத்தால் கைது செய்யப்பட்ட ரணில் விக்கிரமசிங்க, விளக்கமறியலில் வைக்கப்பட்ட இலங்கை வரலாற்றுடனான முதலாவது முன்னாள் நாட்டுத் தலைவர் ஆவார்.

பின்னர், மருத்துவ அறிக்கைகள் சமர்ப்பிக்கப்பட்டதைத் தொடர்ந்து, தலா 5 மில்லியன் ரூபாய் பெறுமதியான மூன்று சரீரப் பிணைகளில் அவர் விடுவிக்கப்பட்டார் என்பது குறிப்பிடத்தக்கது.