டிட்வா புயலால் சேதமடைந்த வீதிகளை புனரமைக்க உலக வங்கி 110 மில்லியன் டொலர் கடனுதவி ஒப்புதல்

இலங்கையில் ‘டிட்வா’ (Ditwah) சூறாவளியினால் கடுமையாக சேதமடைந்த 600 கிலோமீற்றர் நீளமான வீதிகளை புனரமைப்பதற்காகவும், மறுசீரமைப்பதற்காகவும் உலக வங்கி 110 மில்லியன் அமெரிக்க டொலர்களை (US$110 million) கடனுதவியாக வழங்க ஒப்புதல் அளித்துள்ளது.

இன்றைய தினம் (செப்டெம்பர் 30) அறிவிக்கப்பட்ட நிதியுதவியின் மூலம், புயலால் மோசமாக பாதிக்கப்பட்ட பிரதேசங்களில் உள்ள சந்தைகள், பாடசாலைகள் மற்றும் மருத்துவமனைகளுக்கான போக்குவரத்து வழிகளை விரைவாக மீட்டெடுக்கும் வீதிகளுக்கு முன்னுரிமை அளிக்கப்படவுள்ளது.

சர்வதேச அபிவிருத்திச் சங்கத்தின் நெருக்கடி கால பதில்வழங்கல் பிரிவின் ஊடாக வழங்கப்பட்டுள்ள இந்நிதியுதவியைக் கொண்டு, எதிர்காலத்தில் ஏற்படும் தீவிர காலநிலை மாற்றங்களைத் தாங்கும் வகையில் மேம்படுத்தப்பட்ட வடிகால் அமைப்புகள், மண்சரிவு பாதுகாப்பு உத்திகள் மற்றும் பொறியியல் நுட்பங்களுடன் இவ்வீதிகள் புனரமைக்கப்படவுள்ளன.

இது தொடர்பில் கருத்து தெரிவித்துள்ள இலங்கைக்கான உலக வங்கி குழுவின் நாட்டுப் பணிப்பாளர் கெவோர்க் சர்கிஸியன், "இது வெறும் வீதிகளைச் சீரமைப்பது பற்றியது மட்டுமல்ல; மக்களின் வாழ்வாதாரத்தை மீளக் கட்டியெழுப்புவதுடன், விவசாயிகளை சந்தைகளுடனும், குடும்பங்களை அத்தியாவசிய சேவைகளுடனும் மீண்டும் இணைப்பது தொடர்பானதுமாகும்" எனக் குறிப்பிட்டுள்ளார்.

இந்த கூடுதல் நிதியுதவியானது, தற்போது நடைமுறையிலுள்ள 'உள்ளடக்கிய இணைப்பு மற்றும் அபிவிருத்தி திட்டத்தை' மேலும் மூன்று ஆண்டுகளுக்கு நீடிக்கச் செய்துள்ளது. இதன் மூலம் இத்திட்டத்தின் கீழ் உலக வங்கியின் மொத்த முதலீடு 610 மில்லியன் அமெரிக்க டொலர்களாக உயர்ந்துள்ளது.

இத்திட்டத்தின் மூலம் எட்டு மாவட்டங்களைச் சேர்ந்த 8,30,000-க்கும் அதிகமான மக்கள் நேரடியாகப் பயனடைவர் என்பதுடன், ஏறத்தாழ 20 இலட்சம் மக்கள் மறைமுகப் பயன்பெறுவர் என எதிர்பார்க்கப்படுகிறது. மேலும், புனரமைப்பு மற்றும் பராமரிப்புப் பணிகளின் ஊடாக சுமார் 5,671 புதிய அல்லது மேம்படுத்தப்பட்ட வேலைவாய்ப்புகள் உருவாகும் என்றும், தேயிலை, காய்கறி மற்றும் நெல் பயிரிடும் சுமார் 22,000 விவசாயிகள் மீண்டும் தமது உற்பத்திகளை சந்தைப்படுத்துவதற்கும் விநியோகச் சங்கிலிகளுடன் இணைவதற்கும் இது வழிவகுக்கும்.

கடந்த 2025 ஆம் ஆண்டு நவம்பர் மாதம் இலங்கையைத் தாக்கிய 'டிட்வா' சூறாவளி காரணமாக 25 மாவட்டங்களையும் சேர்ந்த சுமார் 20 இலட்சம் மக்கள் பாதிக்கப்பட்டிருந்ததுடன், ஏறத்தாழ 4.1 பில்லியன் அமெரிக்க டொலர் அளவுக்கு சொத்துக்களுக்கு சேதம் ஏற்பட்டது. இதில் போக்குவரத்துத் துறை மட்டும் சுமார் 973 மில்லியன் அமெரிக்க டொலர் சேதத்தைச் சந்தித்திருந்த நிலையில், அதன் மீட்சிப் பணிகளுக்கு 1.31 பில்லியன் அமெரிக்க டொலர் தேவைப்படும் என உலக வங்கி மதிப்பீடு செய்துள்ளது.