எயார்பஸ் வழக்கு: நாமல் ராஜபக்ஷவிற்கு பிணை
எயார்பஸ் விமானக் கொள்வனவு தொடர்பிலான பணச்சலவை குற்றச்சாட்டுகள் குறித்த வழக்கில் விளக்கமறியலில் வைக்கப்பட்டிருந்த நாடாளுமன்ற உறுப்பினர் நாமல் ராஜபக்ஷ, கொழும்பு கோட்டை நீதவான் நீதிமன்றத்தினால் பிணையில் விடுவிக்கப்பட்டார்.
இன்றைய தினம் இந்த வழக்கு விசாரணைக்கு எடுத்துக்கொள்ளப்பட்டபோதே, கொழும்பு கோட்டை நீதவான் பசான் அமரசேன இந்த உத்தரவை பிறப்பித்துள்ளார்.
இதன்படி, சந்தேகநபரான நாமல் ராஜபக்ஷவிற்கு 5 இலட்சம் ரூபாய் ரொக்கப் பிணையும், தலா 30 மில்லியன் ரூபாய் பெறுமதியான இரண்டு சரீரப் பிணைகளும் விதிக்கப்பட்டுள்ளன.
அத்துடன், அவருக்கு வெளிநாடு செல்வதற்கும் நீதிமன்றம் தடை விதித்துள்ளது. இந்தத் தடை உத்தரவு குறித்து குடிவரவு குடியகல்வு கட்டுப்பாட்டாளருக்கு உடனடியாக அறிவிக்குமாறும் நீதவான் உத்தரவிட்டார்.
மேலும், பிணை நிபந்தனையாக, வழக்குடன் தொடர்புடைய சாட்சியாளர்களுக்கு எவ்வித அழுத்தங்களையோ அல்லது இடையூறுகளையோ ஏற்படுத்தக்கூடாது என்றும் நீதிமன்றம் அவருக்குக் கண்டிப்பான உத்தரவைப் பிறப்பித்துள்ளது.
