‘தாய்மாமன்’ தங்க மோதிர திட்டத்தை செப். 28-இல் தொடங்குகிறார் முதல்வர் விஜய்!

தமிழ்நாடு அரசு மருத்துவமனைகளில் பிறக்கும் குழந்தைகளுக்கு ஒரு கிராம் தங்க மோதிரம் வழங்கும் ‘தாய்மாமன் தங்க மோதிரம்’ திட்டம் வரும் செப்டம்பர் மாதம் 28-ஆம் திகதி முதல் உத்தியோகபூர்வமாகத் தொடங்கி வைக்கப்படவுள்ளது. தமிழ்நாடு முதலமைச்சர் விஜய் இத்திட்டத்தை ஆரம்பித்து வைக்கவுள்ளதாக மாநில அரசு அதிகாரப்பூர்வமாக அறிவித்துள்ளது.

அரசு மருத்துவமனைகளில் பிறக்கும் பிறந்த குழந்தைகளைச் சிறப்பிக்கும் வகையிலும், தமிழர் பாரம்பரியத்தின் தாய்மாமன் சீர்மரபைப் பிரதிபலிக்கும் வகையிலும் இச்சிறப்பு நலத்திட்டம் அறிமுகப்படுத்தப்பட்டுள்ளது. இத்திட்டத்தின் தொடக்கம் மற்றும் அதனைச் செயற்படுத்துவது குறித்த உயர்நிலைக் கலந்தாய்வுக் கூட்டம், முதலமைச்சர் விஜய் தலைமையில் தலைமைச் செயலகத்தில் இன்று (செப்டம்பர் 18) நடைபெற்றது.

திட்டத்தின் முக்கிய அம்சங்கள்:

தங்க மோதிரம் வழங்கல்: இத்திட்டத்தின் கீழ், தமிழ்நாடு அரசு மருத்துவமனைகளில் பிறக்கும் ஒவ்வொரு குழந்தைக்கும் ஒரு கிராம் எடையுள்ள தங்க மோதிரம் வழங்கப்படும்.

பாதுகாப்பு ஏற்பாடுகள்: ஒவ்வொரு தங்க மோதிரத்திற்கும் தனித்துவமான வரிசை எண் பொறிக்கப்பட்டு, சேதப்படுத்த முடியாத சிறப்புப் பாதுகாப்புப் பெட்டகத்தில் வைத்து வழங்கப்படும்.

முதலற்கட்ட கொள்முதல்: திட்டத்தின் முதற்கட்டச் செயல்பாட்டிற்காக ஒரு இலட்சத்து 28 ஆயிரம் தங்க மோதிரங்கள் ஏற்கனவே கொள்முதல் செய்யப்பட்டுள்ளன.

தகுதி வரம்புகள்: தமிழ்நாட்டில் நிரந்தரமாக வசிக்கும் தாய்மார்கள் இத்திட்டத்தின் மூலம் பலனடைவர். அத்துடன், தாய் மற்றும் குழந்தைகள் கண்காணிப்பு மென்பொருளில் (PICME) பதிவு செய்யப்பட்டு, இனப்பெருக்கம் மற்றும் சிறுவர் சுகாதார அடையாள எண் பெற்றிருப்பது கட்டாயமாகும்.

செப்டம்பர் 28 முதல் விநியோகம்:

கடந்த ஜூன் மாதம் 22-ஆம் திகதி முதல் அரசு மருத்துவமனைகளில் பிறந்த குழந்தைகளுக்கும் இத்திட்டம் பொருந்தும் என அறிவிக்கப்பட்டுள்ளது. அதன்படி, ஜூன் 22 முதல் திட்டம் தொடங்கப்படும் நாள் வரை பிறந்த குழந்தைகளுக்கு, மாநிலம் முழுவதும் அமைக்கப்பட்டுள்ள 107 விநியோக மையங்கள் (Hubs) மூலமாக தினமும் 100 குழந்தைகள் வீதம் செப்டம்பர் 28 முதல் தங்க மோதிரங்கள் வழங்கப்படும்.

அதேவேளை, செப்டம்பர் 28-ஆம் திகதி திட்டம் முறைப்படி தொடங்கி வைக்கப்பட்ட பின்னர், அரசு மருத்துவமனைகளில் பிரசவிக்கும் தாய்மார்கள் பிரசவத்திற்குப் பின் இல்லம் திரும்பும்போது குழந்தைகளுக்கான தங்க மோதிரம் நேரடியாக வழங்கப்படும் எனத் தெரிவிக்கப்பட்டுள்ளது.

தேசிய குடும்ப நலக் கணக்கெடுப்பு-6 தரவுகளின்படி, தமிழ்நாட்டில் ஆண்டுதோறும் பிறக்கும் 7.80 இலட்சம் குழந்தைகளில், சுமார் 4.20 இலட்சம் குழந்தைகள் (53 சதவீதம்) அரசு மருத்துவமனைகளிலேயே பிறக்கின்றன. பொதுச் சுகாதார அமைப்பை மேலும் வலுப்படுத்தவும், தாய்-சேய் நலனை மேம்படுத்தவும் இத்திட்டம் பெருமளவில் உதவும் என எதிர்பார்க்கப்படுகிறது.