இஸ்ரேல் வேலைவாய்ப்புப் பெயரில் SMS மோசடி: வெளிநாட்டு வேலைவாய்ப்புப் பணியகம் எச்சரிக்கை!
இஸ்ரேலில் பணி வாய்ப்புகளைப் பெற்றுத் தருவதாகக் கூறி பரப்பப்பட்டு வரும் போலியான குறுஞ்செய்தி (SMS) மோசடி குறித்து பொதுமக்கள் விழிப்புடன் இருக்குமாறு இலங்கை வெளிநாட்டு வேலைவாய்ப்புப் பணியகம் (SLBFE) எச்சரிக்கை விடுத்துள்ளது.
பணியகத்தின் பெயரைப் பயன்படுத்தி அனுப்பப்படும் இந்த விசேட குறுஞ்செய்திகளில், இஸ்ரேல் வேலைவாய்ப்பு தொடர்பான வாய்ப்புகள் அளிக்கப்படுவதாகக் குறிப்பிடப்பட்டு, பொதுமக்களிடமிருந்து பணம் மற்றும் தனிப்பட்ட நிதிச் சார்ந்த தகவல்களைப் பெற்று ஏமாற்ற முயல்வதாக பணியகம் சுட்டிக்காட்டியுள்ளது.
எனவே, வெளிநாட்டு வேலைவாய்ப்புகள் அல்லது நிதிப் பலன்களை வழங்குவதாகக் கூறி பணியகத்தின் பெயரில் வரும் சந்தேகத்திற்குரிய குறுஞ்செய்திகளில் உள்ள இணைப்புகளை (Links) அழுத்த வேண்டாம் எனப் பொதுமக்கள் கேட்டுக்கொள்ளப்பட்டுள்ளனர்.
அத்துடன், அடையாளம் தெரியாத அல்லது சந்தேகத்திற்குரிய ஆதாரங்களில் இருந்து வரும் குறுஞ்செய்திகள் மற்றும் இணைப்புகள் ஊடாக வங்கிச் கணக்கு விவரங்கள், கடவுச்சொற்கள் (Passwords) அல்லது பிற தனிப்பட்டத் தகவல்களை வழங்கக் கூடாது என்றும் அறிவுறுத்தப்பட்டுள்ளது.
குறிப்பாக, இத்தகைய குறுஞ்செய்திகள் மூலம் வழங்கப்படும் வங்கிச் கணக்குகளுக்குப் பணத்தை வைப்பிலிடவோ அல்லது அனுப்பவோ வேண்டாம் என்றும் வேலைவாய்ப்புத் தேடுபவர்களுக்குப் பணியகம் எச்சரிக்கை விடுத்துள்ளது.
வெளிநாட்டு வேலைவாய்ப்புத் தொடர்பாக ஏதேனும் கொடுப்பனவுகளைச் செய்வதற்கு முன்னர், சம்பந்தப்பட்ட வங்கிச் கணக்கானது இலங்கை வெளிநாட்டு வேலைவாய்ப்புப் பணியகத்தின் உத்தியோகபூர்வ கணக்குதானா என்பதை உறுதிப்படுத்திக் கொள்ளுமாறு கேட்டுக்கொள்ளப்படுகின்றனர்.
மேலும், வெளிநாட்டு வேலைவாய்ப்பு முகவர் நிலையங்களின் நம்பகத்தன்மையை, பணியகத்தின் உத்தியோகபூர்வ இணையத்தளம் ஊடாக சரிபார்த்த பின்னரே பணப்பரிமாற்றங்கள் மற்றும் வேலைவாய்ப்பு நடவடிக்கைகளை முன்னெடுக்குமாறு புலம்பெயர் தொழிலாளர்கள் வலியுறுத்தப்பட்டுள்ளனர்.
இஸ்ரேல் நாட்டில் வேலைவாய்ப்பைத் தேடுபவர்கள், இவ்வாறான மோசடித் திட்டங்கள் குறித்து விழிப்புடன் செயல்படுமாறும், எந்தவொரு நடவடிக்கைக்கும் முன்னர் குறுஞ்செய்திகள் அல்லது சலுகைகளின் உண்மைத் தன்மையை உறுதிப்படுத்துமாறும் கோரப்பட்டுள்ளனர்.
இது தொடர்பான மேலதிகத் தகவல்கள் மற்றும் தெளிவுபடுத்தல்களுக்கு, இலங்கை வெளிநாட்டு வேலைவாய்ப்புப் பணியகத்தின் 1989 என்ற அவசர தொலைபேசி இலக்கத்தை தொடர்பு கொள்ள முடியும்.
