GSP+ வரிச்சலுகையைப் பாதுகாக்க சட்டமூலங்களை மறுபரிசீலனை செய்யுமாறு வர்த்தக சம்மேளனம் கோரிக்கை

இலங்கையின் பொருளாதாரப் போட்டித்திறன், முதலீட்டாளர்களின் நம்பிக்கை மற்றும் ஐரோப்பிய ஒன்றியத்தின் GSP+ வரிச்சலுகையைத் தொடர்ந்து பெற்றுக்கொள்வதை உறுதிப்படுத்தும் வகையில், முன்மொழியப்பட்டுள்ள சட்டமூலங்களை கவனமாக மறுபரிசீலனை செய்யுமாறு இலங்கை வர்த்தக சம்மேளனம் (Ceylon Chamber of Commerce) அரசாங்கத்திடம் கோரிக்கை விடுத்துள்ளது.

பயங்கரவாதத்திலிருந்து அரசைப் பாதுகாக்கும் சட்டமூலம் (PSTA) மற்றும் ஒழுங்கமைக்கப்பட்ட குற்றங்களைத் தடுக்கும் சட்டமூலம் ஆகியவற்றை உள்ளடக்கிய அண்மைய சட்ட முன்மொழிவுகள் தொடர்பில் இந்தக் கோரிக்கை முன்வைக்கப்பட்டுள்ளது.

இது தொடர்பில் அறிக்கையொன்றை வெளியிட்டுள்ள இலங்கை வர்த்தக சம்மேளனம், முன்மொழியப்பட்ட PSTA சட்டமூலம் குறித்த தனது கருத்துகளையும் அவதானிப்புகளையும் ஏற்கனவே சமர்ப்பித்துள்ளதாகத் தெரிவித்துள்ளது. ஒழுங்கமைக்கப்பட்ட குற்றங்களைத் தடுக்கும் சட்டமூலம் தொடர்பான தனது நிலைப்பாட்டை இறுதிப்படுத்தி வருவதாகவும், அதனை விரைவில் சம்பந்தப்பட்ட அதிகாரிகளிடம் சமர்ப்பிக்கவுள்ளதாகவும் குறிப்பிட்டுள்ளது.

தேசிய பாதுகாப்பை வலுப்படுத்துவதற்கும் வளர்ந்துவரும் சவால்களை எதிர்கொள்வதற்கும் அரசாங்கம் மேற்கொள்ளும் முயற்சிகளை அங்கீகரிப்பதாகத் தெரிவித்துள்ள சம்மேளனம், அதேவேளை புதிய சட்டங்களில் தெளிவான வரைவிலக்கணங்கள், உரிய நீதித்துறை மேற்பார்வை மற்றும் சட்ட நடைமுறைகளின் கீழ் தனிநபர்களுக்கான போதிய பாதுகாப்பு ஏற்பாடுகள் உறுதிப்படுத்தப்பட வேண்டுமென வலியுறுத்தியுள்ளது.

இத்தகைய ஏற்பாடுகள் முதலீட்டாளர்களின் நம்பிக்கையைப் பேணுவதற்கும், சட்ட ரீதியான தெளிவை உறுதிப்படுத்துவதற்கும், சர்வதேச வர்த்தகம் மற்றும் முதலீடுகளுக்கு நம்பகமான நாடு என்ற இலங்கையின் நற்பெயரைப் பாதுகாப்பதற்கும் அவசியமானவை எனவும் சம்மேளனம் சுட்டிக்காட்டியுள்ளது.

ஐரோப்பிய ஒன்றியத்தின் GSP+ வரிச்சலுகையை இலங்கை தொடர்ந்து பெற்றுக்கொள்வதன் முக்கியத்துவத்தையும் வர்த்தக சம்மேளனம் வலியுறுத்தியுள்ளது. இந்த வரிச்சலுகையானது இலங்கையின் ஏற்றுமதித்துறை, வேலைவாய்ப்பு உருவாக்கம், அந்நியச் செலாவணி வருமானம் மற்றும் பொருளாதார வளர்ச்சி ஆகியவற்றுக்கு குறிப்பிடத்தக்க பங்களிப்பை வழங்குவதாகவும் தெரிவித்துள்ளது.

எனவே, இலங்கையின் சர்வதேசக் கடப்பாடுகள் மற்றும் சர்வதேச ரீதியில் ஏற்றுக்கொள்ளப்பட்ட தரநிலைகளுக்கு அமைவாக புதிய சட்டங்கள் உருவாக்கப்படுவதை அரசாங்கம் உறுதிப்படுத்த வேண்டும் என சம்மேளனம் கோரியுள்ளது. இதன் மூலம் GSP+ வரிச்சலுகையைத் தொடர்ந்து தக்கவைத்துக்கொள்வதற்கான வாய்ப்புகளை வலுப்படுத்த முடியும் என்றும் குறிப்பிட்டுள்ளது.

தேசிய முன்னுரிமைகளை நிறைவேற்றுவதுடன் பொருளாதார வளர்ச்சி, போட்டித்திறன் மற்றும் நிலையான அபிவிருத்தி ஆகியவற்றுக்கும் ஆதரவளிக்கும் வகையில் சட்ட சீர்திருத்தங்களை முன்னெடுப்பதற்காக, கொள்கை வகுப்பாளர்கள் மற்றும் ஏனைய தொடர்புடைய தரப்பினருடன் ஆக்கபூர்வமான கலந்துரையாடல்களைத் தொடர்ந்து முன்னெடுக்கத் தயாராக இருப்பதாகவும் இலங்கை வர்த்தக சம்மேளனம் தெரிவித்துள்ளது.