800 படுக்கைகள் இருந்தும் முழுமையாகப் பயன்படுத்தப்படாத KDU மருத்துவமனை – COPE அதிருப்தி!

சேர் ஜோன் கொத்தலாவல பாதுகாப்புப் பல்கலைக்கழகத்தின் (KDU) மருத்துவமனையை அரச மருத்துவமனை மாதிரியிலா அல்லது தனியார் மருத்துவமனை மாதிரியிலா நடத்துவது என்பது தொடர்பில் அவசரமாகத் தீர்மானம் எடுக்குமாறு அரச தொழில்முயற்சிகள் தொடர்பான குழு (COPE) அதிகாரிகளுக்கு அறிவுறுத்தியுள்ளது.

நாடாளுமன்ற உறுப்பினர் வைத்தியர் நிஷாந்த சமரவீர தலைமையில் அண்மையில் நடைபெற்ற COPE குழுக் கூட்டத்தின்போதே இந்த அறிவுறுத்தல் வழங்கப்பட்டுள்ளது.

இதன்போது, 2023 மற்றும் 2024 ஆம் ஆண்டுகளுக்கான கணக்காய்வாளர் நாயகத்தின் அறிக்கைகள் மற்றும் நிறுவனத்தின் தற்போதைய செயற்பாடுகளை ஆராய்வதற்காக KDU நிர்வாகத்தினர் குழுவின் முன்னிலையில் அழைக்கப்பட்டிருந்தனர்.

நாடாளுமன்றம் வெளியிட்ட அறிக்கையின்படி, 800 இற்கும் அதிகமான படுக்கை வசதிகளைக் கொண்ட KDU மருத்துவமனையில், நோயாளர் விடுதிகள், சத்திரசிகிச்சை அறைகள் மற்றும் தீவிர சிகிச்சைப் பிரிவுகள் உள்ளிட்ட வசதிகள் முழுமையாகப் பயன்படுத்தப்படாமை குறித்து குழு கடுமையான கவலை வெளியிட்டுள்ளது.

அத்துடன், மருத்துவ அதிகாரிகள் மற்றும் ஏனைய சுகாதாரப் பணியாளர்களுக்கான பற்றாக்குறை குறித்தும் கூட்டத்தில் கவனம் செலுத்தப்பட்டுள்ளது.

மருத்துவமனையை நடத்துவதற்கான உரிய மாதிரி தொடர்பில் தெளிவான தீர்மானம் எடுக்கப்பட்டு, தேவையான நடவடிக்கைகள் முன்னெடுக்கப்படாவிட்டால், தற்போது நிலவும் பிரச்சினைகள் மேலும் மோசமடையக்கூடும் என COPE எச்சரித்துள்ளது.

மருத்துவமனையின் நிர்மாணப் பணிகளுக்காகப் பெறப்பட்ட வெளிநாட்டுக் கடன்களை மீளச் செலுத்துவதில் காணப்படும் சிக்கல்கள், நிதி முகாமைத்துவக் குறைபாடுகள் மற்றும் நிர்வாகச் சிக்கல்கள் தொடர்பிலும் குழு ஆராய்ந்துள்ளது.

மின்னல் பாதுகாப்புக் கட்டமைப்பிலிருந்து செப்புப் பட்டைகள் திருட்டு

இதேவேளை, மருத்துவமனையின் மின்னல் பாதுகாப்புக் கட்டமைப்புக்குச் சொந்தமான 2,199 மீற்றர் நீளமான செப்புப் பட்டைகள் திருடப்பட்ட சம்பவத்தினால் சுமார் 8.44 மில்லியன் ரூபாய் இழப்பு ஏற்பட்டுள்ளதாக COPE தெரிவித்துள்ளது.

2022 மற்றும் 2023 ஆம் ஆண்டுகளில் இடம்பெற்ற இந்தத் திருட்டுச் சம்பவங்கள் தொடர்பில், சிவில் ஒப்பந்தப் பணியாளர் ஒருவரும் கடற்படை உறுப்பினர் ஒருவரும் கைது செய்யப்பட்டுள்ளனர்.

திருடப்பட்ட செப்புப் பட்டைகளுக்குப் பதிலாக அலுமினியக் கம்பிகள் பயன்படுத்தப்பட்டமை தொடர்பிலும் குழு கேள்வி எழுப்பியுள்ளது. இந்த மாற்றீடு உரிய தொழில்நுட்பத் தரங்களுக்கும் பாதுகாப்பு விதிமுறைகளுக்கும் அமைவாக மேற்கொள்ளப்பட்டதா என்பது குறித்தும் ஆராயப்பட்டுள்ளது.

மருத்துவமனையின் வசதிகளை முழுமையாகப் பயன்படுத்துதல், பணியாளர் பற்றாக்குறையை நிவர்த்தி செய்தல், நிதி முகாமைத்துவத்தை வலுப்படுத்துதல் மற்றும் அரச வளங்களை வினைத்திறனுடன் பயன்படுத்துதல் ஆகியவற்றின் அவசியத்தையும் COPE வலியுறுத்தியுள்ளது.

மேலும், பல்கலைக்கழகத்தின் நிர்வாகத்தையும் ஆளுகைக் கட்டமைப்பையும் வலுப்படுத்தும் வகையில், தற்போதுள்ள KDU சட்டத்தில் திருத்தங்களை மேற்கொள்ளுமாறும் குழு கோரிக்கை விடுத்துள்ளது.