2027ஆம் ஆண்டு வரவு செலவுத் திட்டத்தில் அதிவேக நெடுஞ்சாலைத் திட்டங்களுக்கு ரூ.117.3 பில்லியன் ஒதுக்கீடு
இலங்கையின் பல்வேறு அதிவேக நெடுஞ்சாலைத் திட்டங்களின் அபிவிருத்திப் பணிகளுக்காக 2027ஆம் ஆண்டுக்கான வரவு செலவுத் திட்டத்தில் 117,300 மில்லியன் ரூபா (ரூ.117.3 பில்லியன்) நிதி ஒதுக்கீடு செய்ய ஜனாதிபதி அநுரகுமார திசாநாயக்க முன்மொழிந்துள்ளார்.
2027ஆம் ஆண்டுக்கான வரவு செலவுத் திட்டத்தை நாடாளுமன்றத்தில் சமர்ப்பித்து உரையாற்றியபோதே ஜனாதிபதி இந்த நிதி ஒதுக்கீடுகள் தொடர்பான அறிவிப்பை வெளியிட்டார்.
இதன்படி, மத்திய அதிவேக நெடுஞ்சாலையின் கடவத்தை – மீரிகம வரையிலான பகுதியின் நிர்மாணப் பணிகளுக்காக 53,450 மில்லியன் ரூபா ஒதுக்க முன்மொழியப்பட்டுள்ளது. இந்த நிர்மாணப் பணிகளை 2028ஆம் ஆண்டு செப்டெம்பர் மாதத்திற்குள் நிறைவு செய்ய இலக்கு நிர்ணயிக்கப்பட்டுள்ளது.
அதேநேரம், மத்திய அதிவேக நெடுஞ்சாலையின் பொத்துஹெர – ரம்புக்கனை பகுதிக்காக 4,500 மில்லியன் ரூபா ஒதுக்கப்பட்டுள்ளது. இந்தப் பகுதியின் நிர்மாணப் பணிகளை 2027ஆம் ஆண்டு மே மாதத்திற்குள் நிறைவு செய்ய எதிர்பார்க்கப்படுகிறது.
மேலும், ரம்புக்கனை – கலகெதர வரையிலான பகுதியின் அபிவிருத்திப் பணிகளுக்காக 2,350 மில்லியன் ரூபா ஒதுக்க முன்மொழியப்பட்டுள்ளதுடன், அதன் பணிகளை 2029ஆம் ஆண்டு ஜூலை மாதத்திற்குள் நிறைவு செய்யத் திட்டமிடப்பட்டுள்ளது.
இதற்கிடையில், குருநாகல் – தம்புள்ளை அதிவேக நெடுஞ்சாலைத் திட்டத்தின் முதற்கட்டப் பணிகளுக்காக 30,000 மில்லியன் ரூபா ஒதுக்கப்பட்டுள்ளது. இதன் கீழ் குருநாகல் முதல் கலேவெல வரையிலான பகுதி அபிவிருத்தி செய்யப்படவுள்ளது.
அத்துடன், ருவன்புர அதிவேக நெடுஞ்சாலைத் திட்டத்தின் முதற்கட்டமாக கஹதுடுவ முதல் இங்கிரிய வரையிலான பகுதியை அபிவிருத்தி செய்வதற்காக 27,000 மில்லியன் ரூபா ஒதுக்கீடு செய்யவும் முன்மொழியப்பட்டுள்ளது.
இந்த நிதி ஒதுக்கீடுகள் ஊடாக நாட்டின் அதிவேக நெடுஞ்சாலை வலையமைப்பை விரிவுபடுத்துவதற்கும், முக்கிய பிரதேசங்களுக்கு இடையிலான போக்குவரத்து உட்கட்டமைப்பு வசதிகளை மேம்படுத்துவதற்கும் அரசாங்கம் திட்டமிட்டுள்ளது.
