ஷைனிஹன்டர்ஸ் ஊடுருவல் வழக்கு: ‘திருந்திய ஹேக்கர்’ நெதர்லாந்தில் கைது

சர்வதேச ஊடகங்களில் ‘திருந்திய ஊடுருவலாளி’ (reformed hacker) எனப் பரவலாக அறியப்பட்ட நெதர்லாந்தைச் சேர்ந்த நபர் ஒருவர், ‘ஷைனிஹன்டர்ஸ்’ (ShinyHunters) எனப்படும் கணினி நெறிமுறையற்ற ஊடுருவலாளர்கள் (hackers) குழு தொடர்பான விசாரணையின் கீழ் கைது செய்யப்பட்டுள்ளதாக நெதர்லாந்து பொலிஸாரும், அவரது முன்னாள் நிறுவன அதிகாரியும் தெரிவித்துள்ளனர்.

நெதர்லாந்து பொலிஸார் சமூக வலைத்தளமான ‘எக்ஸ்’ (X) தளத்தில் வெளியிட்டுள்ள அறிக்கையில், இந்த விசாரணை தொடர்பில் 24 வயதுடைய நபர் ஒருவர் கைது செய்யப்பட்டுள்ளதாகவும், அவர் ரோட்டர்டாம் நீதிமன்றத்தில் ஆஜர்படுத்தப்படவுள்ளதாகவும் குறிப்பிட்டுள்ளனர். பொலிஸ் அறிக்கையில் கைது செய்யப்பட்டவரின் பெயர் குறிப்பிடப்படவில்லை.

இருப்பினும், ஆம்ஸ்டர்டாமை தளமாகக் கொண்ட ‘நியோ செக்யூரிட்டி’ (Neo Security) எனும் கணினி பாதுகாப்பு நிறுவனத்தின் அதிகாரி பெஞ்சமின் கோர்பர் கருத்துத் தெரிவிக்கையில், கைது செய்யப்பட்டவர் தமது நிறுவனத்தின் தாக்குதல் பாதுகாப்புத் துறைத் தலைவராக (offensive security lead) பணியாற்றிய பெபின் வான் டெர் ஸ்டாப் என்பவரே என்பதை உறுதிப்படுத்தியுள்ளார்.

கடந்த செப்டம்பர் 15ஆம் திகதி இரவு, ஒலி வெடிகுண்டுகளைப் பயன்படுத்தி நடத்தப்பட்ட அதிரடிச் சோதனையில் வான் டெர் ஸ்டாப் கைது செய்யப்பட்டதாகவும், அன்றைய தினமே தடயவியல் விசாரணையாளர்கள் தமது அலுவலகத்திற்கு வருகை தந்ததாகவும் கோர்பர் தெரிவித்துள்ளார்.

பாரிய அளவிலான தரவுத் திருட்டுகள் (data breaches) மற்றும் கப்பம் கோருதல் நடவடிக்கைகளுக்குப் பெயர் பெற்ற ‘ஷைனிஹன்டர்ஸ்’ குழு, அண்மையில் அமெரிக்க மத்திய புலனாய்வு அமைப்பின் (FBI) கணினி அமைப்புகளிலிருந்து பல ‘டெராபைட்’ (terabytes) அளவிலான உணர்திறன் மிக்க பணியாளர் தரவுகளைத் திருடியதாகக் கூறியிருந்தது. இதில் ஊழியர்களின் புலனாய்வுப் பணிகள் மற்றும் மருத்துவப் பதிவுகள் உள்ளடங்குவதாகத் தெரிவிக்கப்படுகிறது.

இந்நிலையில், கைது செய்யப்பட்டுள்ள வான் டெர் ஸ்டாப் என்பவருக்கும் தமது குழுவிற்கும் எவ்வித தொடர்பும் இல்லை என ‘ஷைனிஹன்டர்ஸ்’ குழு தெரிவித்துள்ளதுடன், நெதர்லாந்து பொலிஸாரின் திறமையின்மையையே இது காட்டுவதாகவும் விமர்சித்துள்ளது.

முன்னதாக 2023ஆம் ஆண்டில் தரவுத் திருட்டு மற்றும் கப்பம் கோரிய குற்றச்சாட்டுகளில் தண்டனை பெற்றிருந்த வான் டெர் ஸ்டாப், பின்னர் தாம் இணையக் குற்றங்களிலிருந்து விலகிவிட்டதாக அறிவித்திருந்தார். "எனது பயணம் நேரடியானதாக இருக்கவில்லை; ஆனால் அறிவானது கட்டியெழுப்பவும் பாதுகாப்பதற்குமே அன்றி, அழிப்பதற்கு அல்ல என்பதை எனது அனுபவம் எனக்குக் கற்பித்துள்ளது" என அவர் தனது சொந்த இணையதளத்தில் குறிப்பிட்டிருந்தார்.

"மக்கள் இரண்டாவது வாய்ப்பிற்குத் தகுதியானவர்கள் என்று நான் உண்மையாகவே நம்பினேன். ஆனால் இந்த விடயத்தில் எனக்கு ஏமாற்றமே மிஞ்சியுள்ளது" எனத் தெரிவித்த நியோ செக்யூரிட்டி அதிகாரி கோர்பர், வான் டெர் ஸ்டாப் தமது நிறுவனத்திற்கோ அல்லது வாடிக்கையாளர்களுக்கோ எதிராகச் செயற்பட்டுள்ளாரா என்பது குறித்து ஆராய சுயாதீன நிறுவனம் ஒன்றினைக் கொண்டு ஆய்வுகளை மேற்கொண்டு வருவதாகவும், இதுவரை அதற்கான சான்றுகள் எதுவும் கிடைக்கவில்லை என்றும் குறிப்பிட்டுள்ளார்.