வாழ்க்கைச் செலவு அதிகரிப்பு: வடக்கு, கிழக்கு மற்றும் மலையக நாடாளுமன்ற உறுப்பினர்களுடன் சஜித் கலந்துரையாடல்

நாட்டில் அதிகரித்து வரும் வாழ்க்கைச் செலவு மற்றும் எரிபொருள் விலை உயர்வால் வடக்கு, கிழக்கு மற்றும் மலையகப் பகுதிகளைச் சேர்ந்த மக்கள் எதிர்கொள்ளும் பொருளாதார நெருக்கடிகள் தொடர்பில் எதிர்க்கட்சித் தலைவர் சஜித் பிரேமதாச, குறித்த பிரதேசங்களைப் பிரதிநிதித்துவப்படுத்தும் எதிர்க்கட்சி நாடாளுமன்ற உறுப்பினர்களுடன் கலந்துரையாடியுள்ளார்.

இந்தக் கலந்துரையாடல் இன்று (05) நாடாளுமன்றத்தில் அமைந்துள்ள எதிர்க்கட்சித் தலைவர் அலுவலகத்தில் நடைபெற்றுள்ளது. இதில் வடக்கு, கிழக்கு மற்றும் மலையகப் பகுதிகளைப் பிரதிநிதித்துவப்படுத்தும் நாடாளுமன்ற உறுப்பினர்கள் கலந்துகொண்டனர்.

நாட்டின் தற்போதைய பொருளாதார நிலைமையால் குறித்த பிரதேசங்களில் வாழும் மக்கள் எதிர்கொள்ளும் சமூக, பொருளாதார மற்றும் வாழ்வாதாரப் பிரச்சினைகள் தொடர்பில் இதன்போது நாடாளுமன்ற உறுப்பினர்களிடம் சஜித் பிரேமதாச கேட்டறிந்துள்ளார்.

குறிப்பாக, எரிபொருள் மற்றும் அத்தியாவசியப் பொருட்களின் விலை அதிகரிப்பு, மக்களின் கொள்வனவு சக்தி வீழ்ச்சியடைதல் மற்றும் உழைக்கும் குடும்பங்கள் எதிர்கொள்ளும் நிதி நெருக்கடிகள் குறித்து விசேட கவனம் செலுத்தப்பட்டுள்ளது.

அத்துடன், அடிப்படை உட்கட்டமைப்பு வசதிகளில் காணப்படும் குறைபாடுகள், அத்தியாவசிய சுகாதார மற்றும் கல்விச் சேவைகளைப் பெற்றுக்கொள்வதில் மக்கள் எதிர்கொள்ளும் சவால்கள் குறித்தும் விரிவாகக் கலந்துரையாடப்பட்டுள்ளது.

தரமான சுகாதார சேவைகளைப் பெற்றுக்கொள்வதில் நிலவும் சிரமங்கள், பாடசாலைக் கல்வியில் எதிர்கொள்ளப்படும் பிரச்சினைகள் மற்றும் சிறுவர்களின் போஷாக்கு நிலைமை தொடர்பான விடயங்களும் இதன்போது ஆராயப்பட்டுள்ளன.

இந்தக் கலந்துரையாடலில் எதிர்க்கட்சி நாடாளுமன்ற உறுப்பினர்களான தாஹிர் மரிக்கார், துரைராசா ரவிகரன், கஜேந்திரகுமார் பொன்னம்பலம், ஜி. ஸ்ரீனேசன், எம்.எஸ். உதுமா லெப்பை, காதர் மஸ்தான், பி. சத்தியலிங்கம் மற்றும் ஹபீப் றிபான் ஆகியோர் கலந்துகொண்டனர்.