சுற்றுலாப் பயணிகள் போல் வேடமிட்டு இரண்டு ஜேர்மனியர்களைக் கைது செய்த வனஜீவராசிகள் அதிகாரிகள்!

திஸ்ஸமஹாராமவுக்கு அருகிலுள்ள பாபாவ உடகந்தார வனப்பகுதியில் சட்டவிரோதமாக வனவிலங்குகள் மற்றும் அவற்றின் உடற்பாகங்களைச் சேகரித்து வைத்திருந்த குற்றச்சாட்டில் இரண்டு ஜேர்மன் சுற்றுலாப் பயணிகளும் இலங்கையைச் சேர்ந்த சுற்றுலா வழிகாட்டி ஒருவரும் கைது செய்யப்பட்டுள்ளனர்.

வனஜீவராசிகள் பாதுகாப்புத் திணைக்களத்தினால் கடந்த நவம்பர் 2ஆம் திகதி இந்தக் கைது நடவடிக்கை முன்னெடுக்கப்பட்டுள்ளது.

குறித்த பகுதியில் ஊர்வன மற்றும் பூச்சி இனங்களைச் சிலர் சட்டவிரோதமாகச் சேகரித்து வருவதாகக் கிடைத்த இரகசியத் தகவலையடுத்து, வனஜீவராசிகள் அதிகாரிகள் சுற்றுலாப் பயணிகள் போன்று வேடமிட்டு இரவு நேரத்தில் பல்வேறு இடங்களில் கண்காணிப்பு நடவடிக்கைகளில் ஈடுபட்டுள்ளனர்.

இதன்போது இரண்டு ஜேர்மன் பிரஜைகளையும் இலங்கையைச் சேர்ந்த சுற்றுலா வழிகாட்டி ஒருவரையும் அடையாளம் கண்ட அதிகாரிகள், யால நம்பா முகாம் பகுதியில் அவர்கள் தங்கியிருந்த இடத்தைச் சோதனையிட்டுள்ளனர். எனினும், ஆரம்பகட்டச் சோதனையில் சட்டவிரோதப் பொருட்கள் எவையும் கண்டுபிடிக்கப்படவில்லை.

தொடர்ந்து மேற்கொள்ளப்பட்ட விசாரணைகளின்போது, சுற்றுலா வழிகாட்டி தனது அறையை மறைத்து வேறொரு அறையைத் தனக்குரியதாக அடையாளப்படுத்தி அதிகாரிகளைத் திசைதிருப்ப முயன்றதாகத் தெரிவிக்கப்படுகிறது.

இதனையடுத்து அவரது அறையில் மேற்கொள்ளப்பட்ட சோதனையில், மலைப்பாம்புகள் உள்ளிட்ட பல்வேறு ஊர்வன வகைகள், அந்துப்பூச்சிகள், தும்பிகள், முள்ளம்பன்றியின் முட்கள், மான் எலும்புகள், மாட்டுப் பற்கள் மற்றும் மயில் இறகுகள் உள்ளிட்ட பெருமளவிலான உயிரினங்களும் அவற்றின் உடற்பாகங்களும் மீட்கப்பட்டுள்ளன.

மேலும், பாம்புகள் உள்ளிட்ட வனவிலங்குகளைப் பிடிப்பதற்குப் பயன்படுத்தப்படும் உபகரணங்கள், உயிரினங்களைப் பாதுகாத்து வைப்பதற்கான கொள்கலன்கள் மற்றும் பல்வேறு இரசாயனப் பொருட்கள் அடங்கிய போத்தல்களும் கைப்பற்றப்பட்டுள்ளன.

கைது செய்யப்பட்ட மூவரும் கைப்பற்றப்பட்ட பொருட்களுடன் நவம்பர் 3ஆம் திகதி திஸ்ஸமஹாராம நீதவான் நீதிமன்றத்தில் முன்னிலைப்படுத்தப்பட்டுள்ளனர்.

இதன்போது, உயிருடன் மீட்கப்பட்ட வனவிலங்குகளை தெஹிவளை தேசிய விலங்கியல் பூங்காவிடம் ஒப்படைக்குமாறு நீதவான் உத்தரவிட்டதுடன், வழக்கை எதிர்வரும் நவம்பர் 6ஆம் திகதி மீண்டும் விசாரணைக்கு எடுத்துக்கொள்ளவும் உத்தரவிட்டுள்ளார்.

இலங்கையின் உயிரியல் மற்றும் மரபணு வளங்களைச் சட்டவிரோதமாகக் களவாடுவது தொடர்பில் கவலைகள் அதிகரித்துள்ள நிலையில், இதற்கு முன்னரும் வனவிலங்குகள் மற்றும் அவற்றின் மாதிரிகளைச் சட்டவிரோதமாகச் சேகரித்த குற்றச்சாட்டில் வெளிநாட்டுப் பிரஜைகள் கைது செய்யப்பட்டுள்ளதாக வனஜீவராசிகள் பாதுகாப்புத் திணைக்களம் சுட்டிக்காட்டியுள்ளது.

இந்த நடவடிக்கை உடவளவை தேசிய பூங்காவின் பனஹதுவ வனவிலங்கு பிரிவு அலுவலகத்தைச் சேர்ந்த அதிகாரிகளால் முன்னெடுக்கப்பட்டதாகத் தெரிவிக்கப்பட்டுள்ளது.