வடக்கு, கிழக்கு பிரச்சினைகள் குறித்து அமெரிக்க தூதரக அதிகாரியுடன் சாணக்கியன் சந்திப்பு

வடக்கு, கிழக்கு பிராந்தியங்களின் முக்கிய பிரச்சினைகள் குறித்து தமிழ்தேசிய கூட்டமைப்பின் மட்டக்களப்பு மாவட்ட நாடாளுமன்ற உறுப்பினர் சாணக்கியன் இராசமாணிக்கம், இலங்கைக்கான அமெரிக்க தூதரகத்தின் அரசியல் அதிகாரி ரேச்சல் ஹாக்கின்ஸுடன் முக்கிய கலந்துரையாடலொன்றை மேற்கொண்டுள்ளார்.

இன்றைய தினம் (30) மட்டக்களப்பில் இடம்பெற்ற இச்சந்திப்பில், வடக்கு மற்றும் கிழக்கு வாழ் தமிழ் மக்கள் எதிர்நோக்கும் காணிப் பிரச்சினைகள், காணாமல் ஆக்கப்பட்டோர் விவகாரம், அரசியல் தீர்வு, அதிகாரப் பகிர்வு, அரசியல் பிரதிநிதித்துவம் மற்றும் வாழ்வாதார சவால்கள் குறித்து விரிவாக ஆராயப்பட்டது.

இதன்போது கிழக்கு மாகாணத்தின் உட்கட்டமைப்பு மேம்பாட்டின் அவசியத்தை வலியுறுத்திய நாடாளுமன்ற உறுப்பினர் சாணக்கியன், பிரதான நெடுஞ்சாலைகள் மற்றும் உள்ளூர் வீதிகளைப் புனரமைப்பதன் மூலம் பிராந்தியத்தின் சுற்றுலாத் துறையை கணிசமாக மேம்படுத்த முடியும் எனச் சுட்டிக்காட்டினார்.

மேலும் தமிழ், முஸ்லிம் மற்றும் சிங்கள சமூகங்களுக்கிடையிலான நல்லிணக்கம், சமத்துவம் மற்றும் சம வாய்ப்புகளை பலப்படுத்துவது தொடர்பிலும், தற்போதைய அரசியல் மாற்றங்கள், அரசியலமைப்பு சீர்திருத்தங்கள் மற்றும் மாகாண சபை தேர்தல்கள் குறித்தும் இக்கலந்துரையாடலில் விரிவாகக் கவனஞ்செலுத்தப்பட்டது.