மார்பகப் புற்றுநோய் விழிப்புணர்வு: கொழும்பு மாநகர சபை கட்டிடம் இளஞ்சிவப்பு நிறத்தில் ஒளிரூட்டப்பட்டது

மார்பகப் புற்றுநோய் பற்றிய விழிப்புணர்வை ஏற்படுத்தவும், அதன் ஆரம்பக்கட்ட பரிசோதனைகளின் முக்கியத்துவத்தை வலியுறுத்தவும் கொழும்பு மாநகர சபை தலைமையகக் கட்டிடம் நேற்று (05) இளஞ்சிவப்பு (Pink) நிற விளக்குகளால் ஒளிரூட்டப்பட்டது.

அக்டோபர் மாதம் முழுவதும் சர்வதேச மார்பகப் புற்றுநோய் விழிப்புணர்வு மாதமாக அனுஷ்டிக்கப்படுவதை முன்னிட்டு, நாடு முழுவதும் உள்ள அரசு மற்றும் தனியார் நிறுவனங்களுடன் இணைந்து கொழும்பு மாநகர சபையும் இந்நடவடிக்கையை முன்னெடுத்துள்ளதாக கொழும்பு மேயர் விராய் கலி பால்தாசர் தெரிவித்துள்ளார்.

இந்நோயின் தீவிரத் தன்மை குறித்துக் கருத்து வெளியிட்ட மேயர், நாட்டில் தினமும் புதிதாக 17 மார்பகப் புற்றுநோய் நோயாளர்கள் கண்டறியப்படுவதாகவும், நாளாந்தம் மூன்று பெண்கள் இந்நோயினால் உயிரிழப்பதாகவும் வேதனை வெளியிட்டார்.

எனினும், நோயைப் பற்றிய விழிப்புணர்வு, முறையான மருத்துவப் பரிசோதனைகள் மற்றும் சுய பரிசோதனைகள் மூலம் ஆரம்பக் கட்டத்திலேயே நோயைக் கண்டறிந்து உயிர்களைக் காப்பாற்ற முடியும் என்றும் அவர் சுட்டிக்காட்டினார்.

எனவே, அக்டோபர் மாதம் முழுவதும் இது தொடர்பான விழிப்புணர்வு நடவடிக்கைகளைத் தொடருமாறும், பெண்களை மருத்துவப் பரிசோதனைகளுக்கு உட்படுத்துமாறு பொதுமக்களுக்கு மேயர் வேண்டுகோள் விடுத்தார்.

அத்துடன், நாடு முழுவதும் மார்பகப் புற்றுநோய் விழிப்புணர்வையும் ஆரம்பக் கட்டக் கண்டறிதலின் முக்கியத்துவத்தையும் பரப்பும் வகையில் செயற்பட்டு வரும் 'இந்திரா புற்றுநோய் அரக்கட்டளைக்கு' கொழும்பு மேயர் தனது பாராட்டுக்களையும் தெரிவித்தார்.