மதுரையில் முதல்வர் விஜய்யின் பிரம்மாண்ட 'ரோடு ஷோ': கடுமையான வெயிலில் 10 பேர் மயக்கம்!

தமிழக முதல்வர் விஜய் மதுரை நகரில் சுமார் 44 கிலோமீற்றர் தொலைவுக்கு பிரம்மாண்ட வீதி உலா (Road show) மேற்கொண்ட நிலையில், கடுமையான வெயில் மற்றும் கூட்ட நெரிசல் காரணமாக 10க்கும் மேற்பட்டோர் மயக்கமடைந்து மருத்துவமனையில் அனுமதிக்கப்பட்ட சம்பவம் பெரும் பரபரப்பை ஏற்படுத்தியுள்ளது.

இன்று மதுரையில் ஏற்பாடு செய்யப்பட்டிருந்த பல்வேறு அரசு மற்றும் மக்கள் நலத் திட்டத் தொடக்க விழாக்களில் பங்கேற்பதற்காக முதல்வர் விஜய் மதுரைக்கு வருகை தந்தார். மதுரை விமான நிலையத்தில் தரையிறங்கிய அவருக்கு, கட்சியினரும் பொதுமக்களும் உற்சாக வரவேற்பு அளித்தனர். பெருங்குடி பகுதியில் கள்ளழகர் தங்கக் குதிரையில் எழுந்தருள்வது போன்ற விசேட கலைவடிவமைப்புடன் அவருக்கு வரவேற்பு அளிக்கப்பட்டது.

இதனைத் தொடர்ந்து, விமான நிலையத்திலிருந்து புறப்பட்ட முதல்வர், அரசு ராஜாஜி மருத்துவமனை, காந்தி அரசு அருங்காட்சியகம் மற்றும் வரலாற்றுச் சிறப்புமிக்க மீனாட்சியம்மன் ஆலயம் வரை மதுரை நகரின் முக்கிய வீதிகள் வழியாக 44 கிலோமீற்றர் தூரத்திற்கு காரில் வீதி உலா சென்றார். மதுரை வரலாற்றில் தலைவர் ஒருவர் இவ்வளவு நீண்ட தூரம் நகருக்குள் வீதி உலா சென்றது இதுவே முதல்முறை எனக் கூறப்படுகிறது.

வழியெங்கும் கூடியிருந்த பொதுமக்கள் மற்றும் ஆதரவாளர்களை நோக்கி முதல்வர் கையசைத்தவாறு சென்றார். குருவிக்காரன் வீதி சந்திப்பில், மீனாட்சி அம்மன் வேடமிட்டுக் காத்திருந்த சிறுமி ஒருவரை முதல்வர் கைகளில் ஏந்தி மகிழ்வித்தார்.

தொடர்ந்து அரசு ராஜாஜி மருத்துவமனையில் 'தாய்மாமன் தங்க மோதிரம்' வழங்கும் திட்டத்தினைத் தொடங்கி வைத்த முதல்வர், அங்கிருந்த மருத்துவக்கல்லூரி முதல்வர் (Dean) அருள் சுந்தரேஷ்குமார் உள்ளிட்ட மருத்துவக் குழுவினருடன் புகைப்படங்கள் எடுத்துக்கொண்டார். மேலும் செவிலியர் விடுதி அருகே திரண்டிருந்த மருத்துவப் பணியாளர்களின் கைபேசியைப் பெற்று, அவரே ஒளிப்படம் மற்றும் காணொளிகளையும் (Video) பதிவு செய்து அவர்களை உற்சாகப்படுத்தினார். பின்னர் புதுப்பிக்கப்பட்ட காந்தி அருங்காட்சியகத்தைப் பார்வையிட்ட அவருக்கு, அதன் செயலர் நந்தாராவ் வரலாற்றுப் பின்னணிகளை விளக்கிக் கூறினார்.

முறையான ஏற்பாடுகள் இன்மை – மயங்கி விழுந்த பொதுமக்கள்:

முதல்வரின் வருகையை முன்னிட்டு விமான நிலையம் முதல் மீனாட்சியம்மன் கோயில் வரை பல்லாயிரக்கணக்கான பொதுமக்கள் வழிநெடுகிலும் நீண்டநேரம் காத்திருந்தனர். எனினும், கடுமையான வெயில் நிலவிய சூழலில், காத்திருந்த மக்களுக்குக் குடிநீர் அல்லது அடிப்படை வசதிகளை அமைத்துக்கொடுப்பதில் அமைப்பாளர்கள் தவறிவிட்டதாகக் குற்றஞ்சாட்டப்படுகிறது.

நீண்ட நேரம் வெயிலில் காத்திருந்ததால் சோர்வடைந்த 10க்கும் மேற்பட்டோர் ஆங்காங்கே மயங்கி விழுந்தனர். உடனடியாகப் பாதுகாப்புப் பணியில் ஈடுபட்டிருந்த காவல்துறையினர் அவர்களை அவசர ஆம்புலன்ஸ் வாகனங்கள் மூலம் அரசு ராஜாஜி மருத்துவமனைக்கு அனுப்பி வைத்தனர். அவர்களுள் கூட்ட நெரிசலில் சிக்கி லேசாய காயமடைந்த காட்டுராஜா (55) மற்றும் விக்னேஷ் (29) ஆகிய இருவர் மட்டும் தீவிர சிகிச்சைப் பிரிவில் அனுமதிக்கப்பட்டுள்ளனர். ஏனையோர் முதலுதவிக்குப் பின் வீடு திரும்பியுள்ளனர்.

போஸ்டர் சர்ச்சை:

இதனிடையே, முதல்வரை வரவேற்று மதுரை மாநகர் முழுவதும் தமிழக வெற்றிக் கழகத்தினர் (TVK) சுவரொட்டிகளை ஒட்டியிருந்தனர். தற்போது மதுரை மாநகராட்சி எல்லைக்குள் சுவரொட்டி ஒட்டுவதற்குத் தடை விதிக்கப்பட்டுள்ள நிலையில், அதிகாரிகளின் உத்தரவின்பேரில் தூய்மைப் பணியாளர்கள் அந்தச் சுவரொட்டிகளை அகற்றினர். இதனால் தவெக தொண்டர்களுக்கும் மாநகராட்சி ஊழியர்களுக்கும் இடையே சிறிது நேரம் வாக்குவாதம் ஏற்பட்டது. இருப்பினும், முதல்வரின் பயணப் பாதை தூய்மையாக இருக்க வேண்டும் என்ற அதிகாரிகளின் விளக்கத்தைத் தொடர்ந்து தொண்டர்கள் கலைந்து சென்றனர்.