இலங்கை
மக்காச்சோள இறக்குமதியில் தாமதம்: பண்டிகைக் காலத்தில் கோழி இறைச்சி, முட்டை விலைகள் உயரும் அபாயம்!
வரவிருக்கும் பண்டிகைக் காலத்தில் கோழி இறைச்சி மற்றும் முட்டைகளின் விலைகள் அதிகரிக்கும் அபாயம் ஏற்பட்டுள்ளதாக அகில இலங்கை கோழிப்பண்ணையாளர்கள் சங்கம் எச்சரித்துள்ளது. மக்காச்சோள (Maize) இறக்குமதிக்கு அனுமதி வழங்குவதில் ஏற்பட்டுள்ள தாமதமே இதற்கு முக்கிய காரணமாகும்.
விலங்கு உணவிற்காக மக்காச்சோளத்திற்குப் பதிலாக அரிசியைப் பயன்படுத்துவது, கோழி இறைச்சி மற்றும் முட்டை உற்பத்தியில் கணிசமான வீழ்ச்சியை ஏற்படுத்தியுள்ளதாக அச்சங்கத்தின் தலைவர் அஜித் குணசேகர தெரிவித்தார்.
மக்காச்சோளத்திற்கு நிலவும் கடுமையான தட்டுப்பாடு காரணமாக, சிறு அளவிலான கோழிப்பண்ணை உற்பத்தியாளர்களில் சுமார் 20 சதவீதத்தினர் ஏற்கனவே இத்தொழிலில் இருந்து வெளியேறியுள்ளதாகவும் அவர் மேலும் சுட்டிக்காட்டினார்.
