பௌத்த மதத் தலங்களுக்கு தாக்குதல் மிரட்டல் விடுத்த 21 வயது இளைஞர் கைது
இலங்கையின் முக்கிய பௌத்த மதத் தலங்கள் மீது தாக்குதல் நடத்தப்படும் என சமூக வலைத்தளங்கள் ஊடாக மிரட்டல் விடுத்ததாகக் கூறப்படும் 21 வயது இளைஞர் ஒருவர் கைது செய்யப்பட்டுள்ளதாகப் பொதுப் பாதுகாப்பு அமைச்சர் ஆனந்த விஜேபால நாடாளுமன்றத்தில் தெரிவித்துள்ளார்.
குறித்த இளைஞர், முஸ்லிம் பெயர்களைப் பயன்படுத்திப் போலியான சமூக வலைத்தளக் கணக்குகளை உருவாக்கி, அவற்றின் ஊடாக பௌத்த மதத் தலங்களுக்கு எதிரான தாக்குதல் மிரட்டல் செய்திகளைப் பரப்பியதாக அமைச்சர் குறிப்பிட்டுள்ளார்.
கண்டி ஸ்ரீ தலதா மாளிகை, அனுராதபுரம் தூபாராமய, ஸ்ரீ மகா போதி மற்றும் தம்புள்ளை கோயில் உள்ளிட்ட பல முக்கிய மதத் தலங்களை இலக்காகக் கொண்டு இந்த மிரட்டல்கள் விடுக்கப்பட்டதாகத் தெரிவிக்கப்படுகிறது.
இந்தச் சம்பவம் தொடர்பாக ஐந்து முறைப்பாடுகள் கிடைத்துள்ளதாகவும், இதனையடுத்து குறித்த மிரட்டல் செய்திகளைப் பரப்பிய சமூக வலைத்தளக் குழுக்கள் தொடர்பில் விசாரணைகள் ஆரம்பிக்கப்பட்டதாகவும் அமைச்சர் தெரிவித்துள்ளார்.
இச்சம்பவத்துடன் தொடர்புடையதாகச் சந்தேகிக்கப்படும் இளைஞர், இப்பாகமுவ பகுதியைச் சேர்ந்தவர் என அடையாளம் காணப்பட்டுள்ளார். அவர் கைது செய்யப்பட்ட பின்னர் கொழும்பு பிரதான நீதவான் நீதிமன்றத்தில் ஆஜர்படுத்தப்பட்டதையடுத்து, அவரை விளக்கமறியலில் வைக்க நீதிமன்றம் உத்தரவிட்டுள்ளது.
விசாரணைகளின்போது, சந்தேகநபர் போலியான முஸ்லிம் அடையாளங்களைப் பயன்படுத்தி சமூக வலைத்தளக் கணக்குகளை உருவாக்கியதுடன், அவற்றின் ஊடாக அச்சுறுத்தல் செய்திகளைப் பரப்பியதாகத் தெரியவந்துள்ளதாக அமைச்சர் நாடாளுமன்றத்தில் தெரிவித்துள்ளார்.
இந்தச் சம்பவம் தொடர்பில் பொலிஸ் புலனாய்வுப் பிரிவினர் மற்றும் சம்பந்தப்பட்ட விசாரணைப் பிரிவினர் மேலதிக விசாரணைகளை முன்னெடுத்து வருகின்றனர்.
மேலும், இன அல்லது மத அடிப்படையில் வெறுப்புணர்வைப் பரப்பும் நபர்களுக்கு எதிராக, அவர்களின் இனம் அல்லது மதத்தைப் பொருட்படுத்தாமல் சட்ட நடவடிக்கை எடுக்கப்படும் என்றும் அமைச்சர் ஆனந்த விஜேபால வலியுறுத்தியுள்ளார்.
