கோதுமை மாவின் விலை ரூ.13 அதிகரிப்பு: அனுமதி வழங்கியது யார்? நுகர்வோர் அதிகார சபை கேள்வி

கோதுமை மாவின் விலை எவ்வித முன் அறிவிப்பும் இன்றி ரூ.13 ஆல் அதிகரிக்கப்பட்டுள்ள நிலையில், இதற்கு எதிராக நுகர்வோர் விவகார அதிகார சபை (CAA) நாடளாவிய ரீதியில் சோதனை நடவடிக்கைகளை முன்னெடுத்துள்ளது.

இது தொடர்பில் கருத்துத் தெரிவித்த நுகர்வோர் விவகார அதிகார சபையின் தலைவர் ஹேமந்த சமரகோன், கோதுமை மாவின் விலை அதிகரிக்கப்பட்டமை தொடர்பான தகவல் ஊடகச் செய்திகள் மூலமாகவே தமக்குக் கிடைத்ததாகக் குறிப்பிட்டார்.

விலை அதிகரிப்பு குறித்து கோதுமை மாவு உற்பத்தியாளர்களிடமிருந்து எவ்வித உத்தியோகபூர்வ அறிவிப்பும் தமக்குக் கிடைக்கவில்லை என்றும் அவர் தெரிவித்தார்.

இதனையடுத்து, விலை அதிகரிப்புக்கான காரணம் மற்றும் விலைத் திருத்தம் தொடர்பான விபரங்களைத் தெரிவிக்குமாறு உற்பத்தியாளர்களுக்கு மின்னஞ்சல் மூலம் அறிவிக்கப்பட்டுள்ளதாக அவர் கூறினார்.

நுகர்வோர் விவகார அதிகார சபைச் சட்டத்தின் கீழ், கோதுமை மா கட்டுப்படுத்தப்பட்ட அத்தியாவசியப் பொருளாக வகைப்படுத்தப்பட்டுள்ளதால், அதன் விலையை அதிகரிப்பதற்கு முன்னர் உற்பத்தியாளர்கள் அதிகார சபையுடன் கலந்தாலோசித்து இணக்கப்பாட்டுக்கு வருவது அவசியம் எனவும் அவர் சுட்டிக்காட்டினார்.

சட்ட விதிமுறைகளை மீறி அதிகரிக்கப்பட்ட விலையில் கோதுமை மாவை விற்பனை செய்யும் வர்த்தகர்களுக்கு எதிராகச் சட்ட நடவடிக்கை எடுக்கப்படும் என்றும் அவர் எச்சரித்தார்.

உற்பத்தியாளர்களிடமிருந்து கிடைக்கும் பதில்களை ஆராய்ந்த பின்னர், அடுத்தகட்ட நடவடிக்கைகள் குறித்து தீர்மானிக்கப்படும் எனவும் நுகர்வோர் விவகார அதிகார சபையின் தலைவர் மேலும் தெரிவித்தார்.