இலங்கையின் போக்குவரத்து மற்றும் வீதிப் பாதுகாப்பை மேம்படுத்த நோர்டிக் நாடுகளுடன் பேச்சுவார்த்தை!

இலங்கையின் போக்குவரத்து உட்கட்டமைப்பு, நெடுஞ்சாலைகள் மற்றும் நகர அபிவிருத்தித் துறைகளில் ஒத்துழைப்பை வலுப்படுத்தும் நோக்கில், சுவீடன், பின்லாந்து மற்றும் நோர்வே ஆகிய நோர்டிக் நாடுகளின் அமைச்சர்களுடன் போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் பிமல் ரத்நாயக்க பேச்சுவார்த்தைகளை நடத்தியுள்ளார்.

நோர்டிக் நாடுகளுக்கான தனது விஜயத்தின்போது, சுவீடனின் உட்கட்டமைப்பு மற்றும் வீடமைப்பு அமைச்சர் அன்ட்ரியாஸ் கார்ல்சன், பின்லாந்தின் போக்குவரத்து மற்றும் தொடர்பாடல் அமைச்சர் லுலு ரானே, நோர்வேயின் போக்குவரத்து அமைச்சர் கம்ஸி குணரட்னம் ஆகியோரை அமைச்சர் பிமல் ரத்நாயக்க சந்தித்துக் கலந்துரையாடியதாக ஸ்டொக்ஹோமிலுள்ள இலங்கைத் தூதரகம் தெரிவித்துள்ளது.

இலங்கையின் போக்குவரத்து உட்கட்டமைப்பை மேம்படுத்துதல், வீதிப் பாதுகாப்புத் தரங்களை வலுப்படுத்துதல் மற்றும் பாதுகாப்பான, வினைத்திறன் மிக்க, நிலைபேறான போக்குவரத்துக் கட்டமைப்பை உருவாக்குதல் உள்ளிட்ட விடயங்கள் இந்தப் பேச்சுவார்த்தைகளில் முக்கியமாகக் கவனம் செலுத்தப்பட்டுள்ளன.

இலங்கையின் பொருளாதார மீட்சி மற்றும் தற்போது முன்னெடுக்கப்படும் மறுசீரமைப்பு நடவடிக்கைகள் குறித்தும் அமைச்சர் தனது சகாக்களுக்கு விளக்கமளித்துள்ளார். குறிப்பாக, நாட்டில் அதிகரித்துள்ள உயிரிழப்புகளை ஏற்படுத்தும் வீதி விபத்துகளைக் குறைப்பதற்கான நடவடிக்கைகள் தொடர்பிலும் அவர் எடுத்துரைத்துள்ளார்.

சுவீடனின் வீதிப் பாதுகாப்பு உத்தியில் கவனம்

சுவீடனுக்கான விஜயத்தின்போது, அந்நாட்டின் போக்குவரத்து மற்றும் உட்கட்டமைப்புத் துறைகளுடன் தொடர்புடைய பல்வேறு நிறுவனங்களின் பிரதிநிதிகளையும் அமைச்சர் சந்தித்துக் கலந்துரையாடியுள்ளார்.

சுவீடன் போக்குவரத்து நிர்வாகம் (Trafikverket), சுவீடன் தேசிய வீதி ஆலோசனை நிறுவனம் (Sweroad), சுவீடன் தேசிய வீதி மற்றும் போக்குவரத்து ஆராய்ச்சி நிறுவனம் (VTI) மற்றும் ரயில்வே துறையைச் சேர்ந்த அல்ஸ்டோம் (Alstom) நிறுவனம் ஆகியவற்றின் பிரதிநிதிகளுடன் இந்தச் சந்திப்புகள் இடம்பெற்றுள்ளன.

இதன்போது, வீதி போக்குவரத்துக் கட்டமைப்பில் ஏற்படும் மரணங்கள் மற்றும் கடுமையான காயங்களை இல்லாதொழிப்பதை இலக்காகக் கொண்ட சுவீடனின் ‘விஷன் ஸீரோ’ (Vision Zero) வீதிப் பாதுகாப்பு உத்தி குறித்து விசேட கவனம் செலுத்தப்பட்டுள்ளது.

இந்த உத்தியின் சில அம்சங்களை இலங்கையில் நடைமுறைப்படுத்துவதற்கான சாத்தியக்கூறுகள் குறித்தும், நாட்டின் வீதிப் பாதுகாப்புத் தரங்களையும் உட்கட்டமைப்பு வசதிகளையும் மேம்படுத்துவது தொடர்பிலும் அமைச்சர் ஆராய்ந்துள்ளார்.

மேலும், இலங்கைக்கும் சுவீடனுக்கும் இடையிலான தற்போதைய ஒத்துழைப்பை விரிவுபடுத்துதல், தொழில்நுட்ப அறிவைப் பரிமாறிக்கொள்ளுதல் மற்றும் இலங்கையின் போக்குவரத்து, நெடுஞ்சாலைத் துறைகளின் வினைத்திறனையும் நிலைபேறான வளர்ச்சியையும் மேம்படுத்துவதற்கான வழிமுறைகளைக் கண்டறிதல் தொடர்பிலும் கலந்துரையாடப்பட்டுள்ளது.

ஸ்டொக்ஹோமின் நவீன போக்குவரத்து மையத்துக்கும் விஜயம்

அமைச்சர் பிமல் ரத்நாயக்க, ஸ்டொக்ஹோமில் அபிவிருத்தி செய்யப்பட்டு வரும் முக்கியமான பல்வகைப் போக்குவரத்து மையமான ஸ்லூஸன் (Slussen) பகுதிக்கும் விஜயம் செய்துள்ளார்.

அத்துடன், இலங்கைத் தூதரகத்தினால் ஏற்பாடு செய்யப்பட்ட வரவேற்பு நிகழ்வில் சுவீடன் அரசாங்க அதிகாரிகள் மற்றும் வர்த்தகத் துறைப் பிரதிநிதிகளையும் அவர் சந்தித்துள்ளார்.

நோர்டிக் நாடுகளுடனான இருதரப்பு உறவுகளை மேலும் வலுப்படுத்துதல், தொழில்நுட்ப ஒத்துழைப்பை விரிவுபடுத்துதல், அறிவுப் பரிமாற்றத்தை ஊக்குவித்தல் மற்றும் சர்வதேச சிறந்த நடைமுறைகளை இலங்கையில் அறிமுகப்படுத்துவதற்கான வாய்ப்புகளை ஆராய்தல் ஆகியனவே இந்த விஜயத்தின் முக்கிய நோக்கங்களாக அமைந்திருந்ததாக இலங்கைத் தூதரகம் தெரிவித்துள்ளது.

இதன் மூலம், இலங்கையின் போக்குவரத்து மற்றும் உட்கட்டமைப்புத் துறைகள் எதிர்கொள்ளும் சவால்களுக்குத் தீர்வுகளை அடையாளம் காண்பதற்கான புதிய ஒத்துழைப்பு வாய்ப்புகள் உருவாகும் என எதிர்பார்க்கப்படுகிறது.