சைபர் தாக்குதல் குற்றச்சாட்டு: ஸ்ரீலங்கன் எயார்லைன்ஸ் திட்டவட்ட மறுப்பு!

ஸ்ரீலங்கன் எயார்லைன்ஸின் கணினி மற்றும் தகவல் தொழில்நுட்பக் கட்டமைப்புகள் சைபர் குற்றவாளிகளால் ஊடுருவிக் கைப்பற்றப்பட்டதாகவும், 50,000 அமெரிக்க டொலர் கப்பம் கோரப்பட்டதாகவும் வெளியான குற்றச்சாட்டுகளை அந்த நிறுவனம் திட்டவட்டமாக மறுத்துள்ளது.

இது தொடர்பாக நேற்று புதன்கிழமை (21) வெளியிட்ட அறிக்கையில், தமது தகவல் தொழில்நுட்பக் கட்டமைப்புகள் ஊடுருவப்பட்டதாகவோ, ஹேக்கர்களின் கட்டுப்பாட்டில் இருப்பதாகவோ கூறப்படும் தகவல்களில் உண்மையில்லை என ஸ்ரீலங்கன் எயார்லைன்ஸ் தெரிவித்துள்ளது.

எதிர்க்கட்சி நாடாளுமன்ற உறுப்பினர் தயாசிறி ஜயசேகர, கடந்த செவ்வாய்க்கிழமை (20) நாடாளுமன்றத்தில் முன்வைத்த குற்றச்சாட்டுகளைத் தொடர்ந்து இந்தத் தெளிவுபடுத்தல் வெளியிடப்பட்டுள்ளது.

கடந்த 2026 ஜூன் மாதம் ஸ்ரீலங்கன் எயார்லைன்ஸின் கணினிக் கட்டமைப்புகளுக்குள் ஹேக்கர்கள் ஊடுருவியதாகவும், கிரிப்டோகரன்சி மூலம் 50,000 அமெரிக்க டொலர் பெறுமதியான கப்பம் கோரப்பட்டதாகவும் தயாசிறி ஜயசேகர நாடாளுமன்றத்தில் குற்றஞ்சாட்டியிருந்தார்.

குறித்த குற்றச்சாட்டுகள் தொடர்பான தகவல்கள், 2026 ஜூன் 29ஆம் திகதி வெளிப்புற இணையத் தளமொன்றில் வெளியிடப்பட்ட சைபர் தாக்குதல் தொடர்பான பதிவிலிருந்து உருவானதாக ஸ்ரீலங்கன் எயார்லைன்ஸ் தெரிவித்துள்ளது.

இந்தத் தகவல்கள் கிடைத்தவுடன் நிறுவனம் உடனடியாக விசாரணைகள், தொழில்நுட்ப மதிப்பீடுகள் மற்றும் முன்னெச்சரிக்கை நடவடிக்கைகளை மேற்கொண்டதாகவும் அறிக்கையில் குறிப்பிடப்பட்டுள்ளது.

அந்த விசாரணைகளின் அடிப்படையில், நிறுவனத்தின் உள்நாட்டு தகவல் தொழில்நுட்பக் கட்டமைப்புகள் அல்லது செயல்பாட்டு முறைமைகளுக்குள் அங்கீகரிக்கப்படாத ஊடுருவல் இடம்பெற்றமைக்கான ஆதாரங்கள் கண்டறியப்படவில்லை என நிறுவனம் தெரிவித்துள்ளது.

அத்துடன், தகவல்கள் திருடப்பட்டமைக்கோ, தரவுகள் அங்கீகாரமின்றி வெளியேற்றப்பட்டமைக்கோ அல்லது விமான சேவைகள் மற்றும் நிறுவனத்தின் செயல்பாடுகள் பாதிக்கப்பட்டமைக்கோ எந்த ஆதாரமும் கிடைக்கவில்லை எனவும் கூறியுள்ளது.

மின்னஞ்சல் சேவைகள் உள்ளிட்ட அனைத்து கணினி முறைமைகளும் சேவைகளும் எவ்வித இடையூறுமின்றி தொடர்ந்து இயங்கியதாகவும் ஸ்ரீலங்கன் எயார்லைன்ஸ் உறுதிப்படுத்தியுள்ளது.

மேலும், குற்றச்சாட்டில் குறிப்பிடப்பட்ட தரப்பினரிடமிருந்து பிட்கொயின், அமெரிக்க டொலர் அல்லது வேறு எந்த வடிவத்திலும் கப்பம் கோரப்படவில்லை என நிறுவனம் தெரிவித்துள்ளது. கப்பம் தொடர்பான பேச்சுவார்த்தைகள் எதுவும் இடம்பெறவில்லை என்றும் அதன் அறிக்கையில் குறிப்பிடப்பட்டுள்ளது.

முன்னதாக, குறித்த சைபர் தாக்குதல் தொடர்பான தகவல்கள் டார்க் வெப் எனப்படும் இருண்ட இணையத்தில் வெளியிடப்பட்டதாகவும், தாக்குதலுக்குப் பொறுப்பேற்பதாகக் கூறும் காணொளியொன்றும் வெளியிடப்பட்டதாகவும் தயாசிறி ஜயசேகர நாடாளுமன்றத்தில் தெரிவித்திருந்தார்.

மேலும், விமான நிறுவனத்தின் கணினிக் கட்டமைப்புகள் தொடர்ந்து பாதிப்புக்குள்ளாகும் அபாயத்தில் இருப்பதாகக் குறிப்பிட்ட அவர், இந்தச் சம்பவம் தொடர்பில் அரசாங்கம் எடுத்த நடவடிக்கைகள் குறித்தும் கேள்வி எழுப்பியிருந்தார்.

எனினும், தமது விசாரணைகளில் அங்கீகரிக்கப்படாத ஊடுருவல், தரவுத் திருட்டு அல்லது சேவைத் தடங்கல் தொடர்பான எந்த ஆதாரமும் கிடைக்கவில்லை என்பதில் ஸ்ரீலங்கன் எயார்லைன்ஸ் உறுதியாக உள்ளது.

பயணிகள், ஊழியர்கள் மற்றும் வர்த்தகப் பங்காளர்களுக்கு நம்பகமான சேவைகளைத் தொடர்ந்து வழங்குவதுடன், தகவல் தொழில்நுட்பக் கட்டமைப்புகளின் பாதுகாப்பை உறுதிப்படுத்துவதற்கும் நிறுவனம் அர்ப்பணிப்புடன் செயற்படுவதாகவும் தெரிவித்துள்ளது.