போதைப்பொருள் கடத்தல் தொடர்பில் 21 வயதுக்குட்பட்ட 11,970 பேர் கைது – ஜனாதிபதி

இலங்கையில் 2025–2026ஆம் ஆண்டு காலப்பகுதியில் போதைப்பொருள் கடத்தல் தொடர்பில் 21 வயதுக்குட்பட்ட 11,970 பேர் கைது செய்யப்பட்டுள்ளதாக ஜனாதிபதி அநுர குமார திசாநாயக்க தெரிவித்துள்ளார்.

போதைப்பொருள் ஒழிப்பு தேசிய வேலைத்திட்டமான “நாடு ஒன்றிணைந்து” (Ratama Ekata) முன்னெடுக்கப்பட்டு ஓராண்டு நிறைவடைந்ததை முன்னிட்டு இன்று (05) நடைபெற்ற நிகழ்வில் உரையாற்றியபோதே ஜனாதிபதி இந்தத் தகவல்களை வெளியிட்டார்.

இதன்போது, கைது செய்யப்பட்டவர்களில் 18 முதல் 21 வயதுக்குட்பட்ட 10,889 பேரும், 14 முதல் 18 வயதுக்குட்பட்ட 1,068 பேரும், 5 முதல் 14 வயதுக்குட்பட்ட 13 சிறுவர்களும் அடங்குவதாக அவர் குறிப்பிட்டார்.

மேலும், கைது செய்யப்பட்டவர்களில் 50 பாடசாலை மாணவர்களும் உள்ளடங்குவதாகத் தெரிவித்த ஜனாதிபதி, மொத்தமாக 11,737 ஆண்களும் 233 பெண்களும் கைது செய்யப்பட்டுள்ளதாகக் கூறினார்.

குறிப்பாக, கடந்த ஓராண்டு காலப்பகுதியில் சுமார் 200 சிறுமிகள் போதைப்பொருள் தொடர்பான குற்றச்சாட்டுகளில் கைது செய்யப்பட்டுள்ளதாகவும் ஜனாதிபதி சுட்டிக்காட்டினார்.

போதைப்பொருள் அச்சுறுத்தல் நாட்டின் இளைய தலைமுறையினரைச் சீரழிப்பதுடன், அவர்களின் எதிர்காலத்தையும் ஆபத்தில் ஆழ்த்துவதாக அவர் எச்சரித்தார்.

“இந்த நிலைமை தொடர்வதற்கு நாம் ஒருபோதும் இடமளிக்கப் போவதில்லை. இதனை நாம் தோற்கடிப்போம்” என ஜனாதிபதி உறுதியளித்தார்.

இதேவேளை, குறித்த காலப்பகுதியில் நாடளாவிய ரீதியில் மொத்தம் 15,285 கிலோகிராம் போதைப்பொருட்கள் கைப்பற்றப்பட்டுள்ளதாகவும் ஜனாதிபதி தெரிவித்தார்.

அவற்றில் 6,526 கிலோகிராம் ஐஸ் போதைப்பொருளும், 4,009 கிலோகிராம் ஹெரோயினும், 2,595 கிலோகிராம் ஏனைய போதைப்பொருட்களும், 1,841 கிலோகிராம் குஷ் மற்றும் ஹஷிஷ் வகை போதைப்பொருட்களும், 314 கிலோகிராம் கொக்கேய்னும் அடங்குவதாக அவர் வெளியிட்ட புள்ளிவிபரங்களில் தெரிவிக்கப்பட்டுள்ளது.

நாட்டின் இளைய தலைமுறையினரைப் போதைப்பொருள் அச்சுறுத்தலில் இருந்து பாதுகாப்பதற்கும், போதைப்பொருள் கடத்தலை முற்றாக ஒழிப்பதற்கும் அரசாங்கம் தொடர்ந்தும் நடவடிக்கை எடுக்கும் என ஜனாதிபதி வலியுறுத்தினார்.