பீட்சாவில் அன்னாசிப்பழம் சேர்க்க மறுத்த இத்தாலிய சமையல் கலைஞர் அவுஸ்திரேலியாவில் பணிநீக்கம்!

அன்னாசிப்பழம் சேர்த்த ஹாம் பீட்சா தயாரிக்க மறுத்த இத்தாலிய சமையல் கலைஞர் ஒருவர், அவுஸ்திரேலியாவின் பிரிஸ்பேன் நகரிலுள்ள உணவகம் ஒன்றில் பணிநீக்கம் செய்யப்பட்டுள்ளார்.

டாவிட் தம்புரெல்லா (Davide Tamburella) என்ற குறித்த சமையல் கலைஞர், தனது கலாசாரத்துக்கு அவமதிப்பை ஏற்படுத்தும் வகையில் பீட்சாவில் அன்னாசிப்பழம் சேர்க்க முடியாது எனத் தெரிவித்து, நிர்வாகத்தின் உத்தரவை ஏற்க மறுத்துள்ளார்.

இதனையடுத்து, பிரிஸ்பேனில் இயங்கி வந்த தற்போது மூடப்பட்டுள்ள 'லா கோஸ்டா' (La Costa) உணவகத்தில் கடந்த மே மாதம் அவர் பணிநீக்கம் செய்யப்பட்டுள்ளார்.

அவரது பணியிட நடத்தை தொடர்பாகப் பல முறை முறைப்பாடுகள் முன்வைக்கப்பட்டதைத் தொடர்ந்து, நிர்வாகம் விசேட கூட்டமொன்றைக் கூட்டி இரண்டு வாரங்களுக்குப் பின்னரே இந்தப் பணிநீக்க நடவடிக்கை எடுக்கப்பட்டுள்ளது.

தனியார் நிகழ்வொன்றுக்காக அன்னாசிப்பழம் சேர்த்த பீட்சாக்களைத் தயாரிக்குமாறு நிர்வாகம் பணித்தபோது, அதற்கு அவர் மறுப்புத் தெரிவித்ததே முக்கிய சர்ச்சையாக அமைந்துள்ளது. தனது கலாசாரப் பாரம்பரியத்துக்கு முரணான உத்தரவுகளைப் பின்பற்ற வேண்டிய அவசியமில்லை என்றும் அவர் வாதிட்டுள்ளார்.

இந்தப் பணிநீக்கத்துக்கு எதிராக டாவிட் தம்புரெல்லா அவுஸ்திரேலியாவின் நியாயமற்ற பணிநீக்கங்கள் தொடர்பான முறைப்பாடுகளை விசாரிக்கும் 'Fair Work Commission' ஆணைக்குழுவில் வழக்குத் தாக்கல் செய்தார்.

இதனை விசாரித்த ஆணைக்குழு செவ்வாய்க்கிழமை வெளியிட்ட தீர்ப்பில், கடந்த நான்கு ஆண்டுகளில் மூன்று தடவைகள் அன்னாசிப்பழம் சேர்த்த பீட்சா தயாரிக்க அவர் மறுத்துள்ளதாகக் குறிப்பிட்டுள்ளது.

மேலும், இந்த விவகாரம் இத்தாலியர்களுக்கு எந்தளவுக்கு முக்கியத்துவம் வாய்ந்தது என்பதைத் தனது பணியமர்த்துநர் ஆராய வேண்டும் என்றும் அவர் ஏற்கனவே வலியுறுத்தியிருந்ததாக ஆணைக்குழு சுட்டிக்காட்டியுள்ளது.

குறிப்பாக, அவுஸ்திரேலியாவில் வர்த்தக ரீதியாகப் பயிரிடப்படும் அன்னாசிப்பழங்கள் அனைத்தும் உற்பத்தி செய்யப்படும் குயின்ஸ்லாந்து மாநிலத்திலேயே இந்தச் சர்ச்சை இடம்பெற்றுள்ளமை குறிப்பிடத்தக்கது.