பிரித்தானியாவில் நிரந்தர வதிவிட உரிமை பெற 10 ஆண்டுகள் காத்திருக்க வேண்டும் – புதிய குடிவரவு விதிகள் அறிவிப்பு!

பிரித்தானியாவில் நிரந்தர வதிவிட உரிமையைப் (Permanent Residency) பெற்றுக்கொள்வதற்கான காத்திருப்பு காலத்தை ஐந்து ஆண்டுகளில் இருந்து 10 ஆண்டுகளாக அதிகரிக்க அந்நாட்டு அரசாங்கம் தீர்மானித்துள்ளது.

இதற்கமைய, பெரும்பாலான வெளிநாட்டுத் தொழிலாளர்கள் உள்ளிட்ட குடியேறிகள் பிரித்தானியாவில் நிரந்தரமாக வசிப்பதற்கும் பணியாற்றுவதற்குமான உரிமையைப் பெற 10 ஆண்டுகள் காத்திருக்க வேண்டிய நிலை ஏற்படவுள்ளது.

பிரித்தானிய உள்துறைச் செயலாளர் ஷபானா மஹ்மூத், திங்கட்கிழமை (02) நாடாளுமன்றத்தில் புதிய 'Earned Settlement' குடியேற்றக் கொள்கையை அறிவித்துள்ளார்.

இதன்படி, நிரந்தர வதிவிட உரிமை எனப்படும் Indefinite Leave to Remain (ILR) பெறுவதற்கான தகுதி, பிரித்தானியாவில் வசிக்கும் காலத்தை மாத்திரம் அடிப்படையாகக் கொண்டு தீர்மானிக்கப்படாது. மாறாக, ஒருவரின் வருமானம், தொழில், ஆங்கில மொழித் திறன், குடிவரவு விதிமுறைகளைப் பின்பற்றியமை மற்றும் நாட்டுக்கு அவர் வழங்கிய பங்களிப்பு உள்ளிட்ட பல்வேறு காரணிகள் கவனத்தில் கொள்ளப்படும்.

இந்தப் புதிய மாற்றங்கள் 2027ஆம் ஆண்டில் நடைமுறைக்கு வருமென எதிர்பார்க்கப்படுவதுடன், ஏற்கனவே பிரித்தானியாவில் வசித்து வரும் நிரந்தர வதிவிட உரிமையைப் பெறாத இலங்கையர்களும் இதனால் பாதிக்கப்படக்கூடும்.

புதிய குடிவரவு கொள்கையின் முக்கிய மாற்றங்கள்

குடியேறிகளின் வருமானம் மற்றும் அவர்கள் பிரித்தானியாவுக்கு வழங்கும் பங்களிப்புகளின் அடிப்படையில் நிரந்தர வதிவிட உரிமைக்கான காத்திருப்பு காலம் வெவ்வேறாக நிர்ணயிக்கப்பட்டுள்ளது.

- 10 ஆண்டுகள்: ஆண்டுக்கு 50,000 பவுண்டுகளுக்கும் குறைவான வருமானம் பெறும் தொழிலாளர்கள் உள்ளிட்ட பெரும்பாலான குடியேறிகளுக்கு.
- 5 ஆண்டுகள்: ஆண்டுக்கு 50,000 பவுண்டுகளுக்கு அதிகமான சம்பளம் பெறுவோர் மற்றும் மருத்துவர்கள், தாதியர்கள், ஆசிரியர்கள் உள்ளிட்ட தகுதிபெற்ற பொதுச் சேவைப் பணியாளர்களுக்கு.
- 3 ஆண்டுகள்: ஆண்டுக்கு 125,000 பவுண்டுகளுக்கு அதிகமாக வருமானம் பெறுவோர் மற்றும் குறிப்பிட்ட உயர்திறன் கொண்ட திறமையாளர்களுக்கான திட்டங்களின் கீழ் வருவோருக்கு.
- 30 ஆண்டுகள் வரை: சிறிய படகுகள் மூலம் பிரித்தானியாவுக்குள் சட்டவிரோதமாக நுழைந்தவர்கள் உள்ளிட்ட சில அகதிகளுக்கு.
- 20 ஆண்டுகள்: அங்கீகரிக்கப்பட்ட பாதுகாப்பான மற்றும் சட்டபூர்வமான வழிகள் மூலம் வராத அகதிகளுக்கு. எனினும், வேலை அல்லது கல்வியில் ஈடுபடுவோருக்கு இந்தக் காலப்பகுதியில் சலுகைகள் வழங்கப்படலாம்.
- 5 ஆண்டுகள்: உள்துறை அமைச்சினால் அங்கீகரிக்கப்பட்ட பாதுகாப்பான மற்றும் சட்டபூர்வமான வழிகள் மூலம் பிரித்தானியாவுக்கு வரும் அகதிகளுக்கு.

மேலும், குடிவரவு விதிமுறைகளை மீறியவர்களுக்கு நிரந்தர வதிவிட உரிமையைப் பெறுவதற்கான தகுதிக் காலம் 20 ஆண்டுகளாக அதிகரிக்கப்படலாம் எனவும் அறிவிக்கப்பட்டுள்ளது.

பராமரிப்புப் பணியாளர்களுக்கு விசேட சலுகைகள்

2025ஆம் ஆண்டு மே மாதத்தில் குடிவரவு தொடர்பான வெள்ளை அறிக்கை வெளியிடப்படுவதற்கு முன்னர் பிரித்தானியாவுக்கு வந்த பராமரிப்புப் பணியாளர்களுக்கு இடைக்கால ஏற்பாடுகள் அறிவிக்கப்பட்டுள்ளன.

இதன்படி, விசா நிபந்தனைகளைப் பின்பற்றி, சமூகப் பராமரிப்புத் துறையில் ஆண்டுக்கு குறைந்தபட்சம் 25,000 பவுண்டுகள் வருமானம் ஈட்டிய தகுதியுடைய பணியாளர்கள் ஏற்கனவே நடைமுறையில் உள்ள ஐந்து வருட நிரந்தர வதிவிட உரிமைக்கான வழிமுறையைத் தொடர முடியும்.

இந்த நிபந்தனைகளைப் பூர்த்தி செய்யாதவர்களுக்கு மேலும் ஐந்து வருட பராமரிப்புப் பணியாளர் விசாவுக்கு விண்ணப்பிக்கும் வாய்ப்பு வழங்கப்படவுள்ளது. இதன் மூலம் அவர்கள் பிரித்தானியாவில் தொடர்ந்து பணியாற்றி நிரந்தர வதிவிட உரிமைக்கான தகுதியை நோக்கிப் பயணிக்க முடியும்.

2022ஆம் ஆண்டு முதல் 2025ஆம் ஆண்டு வரையான காலப்பகுதியில் சுமார் 250,000 பராமரிப்புப் பணியாளர்களும் அவர்களது குடும்ப உறுப்பினர்களும் சமூகப் பராமரிப்புத் துறைக்கான விசா வழிமுறையின் கீழ் பிரித்தானியாவுக்குள் நுழைந்துள்ளதாக அரசாங்கம் தெரிவித்துள்ளது.

ஆங்கில மொழி மற்றும் நிதி தொடர்பான கடுமையான நிபந்தனைகள்

புதிய முன்மொழியப்பட்ட விதிகளின்படி, நிரந்தர வதிவிட உரிமைக்கு விண்ணப்பிப்பவர்கள் நான்கு முக்கிய கட்டாய நிபந்தனைகளைப் பூர்த்தி செய்ய வேண்டும்.

- குற்றப் பதிவுகள் எதுவும் இல்லாதிருக்க வேண்டும்.
- உயர்தர ஆங்கில மொழித் திறனை நிரூபிக்க வேண்டும். இது வெளிநாட்டு மொழியாக ஆங்கிலத்தைக் கற்றவர்களுக்கான A-level தரத்துக்கு இணையானதாக இருக்க வேண்டும்.
- பிரித்தானிய அரசாங்கத்துக்குச் செலுத்த வேண்டிய நிலுவைக் கடன்கள் எதுவும் இருக்கக்கூடாது.
- குறைந்தபட்சம் மூன்று ஆண்டுகளுக்கான தேசிய காப்புறுதி (National Insurance) பங்களிப்புகளைச் செலுத்தியிருக்க வேண்டும்.

அத்துடன், அரசாங்கத்தின் நலன்புரி உதவிகளைப் பெற்றவர்கள் நிரந்தர வதிவிட உரிமைக்கு விண்ணப்பிப்பதற்கு முன்னர் தொடர்ச்சியாக ஐந்து ஆண்டுகள் அத்தகைய உதவிகளைச் சார்ந்திருக்காமல் வாழ்ந்திருக்க வேண்டும்.

ஐந்து இலட்சத்துக்கும் அதிகமான குடியேறிகள் பாதிக்கப்படலாம்

புதிய குடிவரவு மாற்றங்களால் ஐந்து இலட்சத்துக்கும் அதிகமான குடியேறிகள் நிரந்தர வதிவிட உரிமையைப் பெறுவதற்கு ஐந்து ஆண்டுகளுக்கும் மேலாகக் காத்திருக்க வேண்டிய நிலை ஏற்படுமென பிரித்தானிய உள்துறை அமைச்சு மதிப்பிட்டுள்ளது.

எனினும், காத்திருப்பு காலம் அதிகரிக்கப்படுவதால் குடியேறிகள் தானாகவே பிரித்தானியாவை விட்டு வெளியேற வேண்டிய அவசியம் ஏற்படாது என அரசாங்கம் தெரிவித்துள்ளது.

நிரந்தர வதிவிட உரிமைக்காகக் காத்திருப்பவர்கள் தங்களது தற்காலிக விசாக்களைப் புதுப்பித்துக்கொண்டு பிரித்தானியாவில் தொடர்ந்து வசிக்கவும் பணியாற்றவும் முடியும்.

ஏற்கனவே நிரந்தர வதிவிட உரிமையைப் பெற்றவர்களின் அந்தஸ்து மீளப்பெறப்படமாட்டாது எனவும் அரசாங்கம் உறுதியளித்துள்ளது.

பிரித்தானியக் குடிமக்களின் குடும்ப உறுப்பினர்கள், ஹொங்கொங் பிரித்தானிய வெளிநாட்டுக் கடவுச்சீட்டு (BNO) அந்தஸ்தைக் கொண்டவர்கள் மற்றும் ஆயுதப் படைகளில் பணியாற்றுபவர்கள் ஆகியோருக்கான தற்போதைய நிரந்தர வதிவிட உரிமை நடைமுறைகளில் மாற்றம் செய்யப்படமாட்டாது எனவும் அறிவிக்கப்பட்டுள்ளது.

நிரந்தர வதிவிட உரிமை என்பது ஒருவர் பிரித்தானியாவில் எத்தனை ஆண்டுகள் வாழ்ந்துள்ளார் என்பதை மாத்திரம் அடிப்படையாகக் கொண்டிருக்கக் கூடாது என்றும், நாட்டுக்கு அவர் வழங்கிய பங்களிப்புகளின் அடிப்படையிலேயே அது தீர்மானிக்கப்பட வேண்டும் என்றும் உள்துறைச் செயலாளர் ஷபானா மஹ்மூத் தெரிவித்துள்ளார்.

இதேவேளை, இந்தப் புதிய முன்மொழிவுகளுக்கு அகதிகள் அமைப்புகள் மற்றும் குடியேறிகளின் உரிமைகளுக்காகச் செயற்படும் அமைப்புகள் எதிர்ப்புத் தெரிவித்துள்ளன. நீண்டகாலக் காத்திருப்பு குடியேறிகள் மற்றும் அகதிகளுக்கு நிச்சயமற்ற சூழலை ஏற்படுத்தும் எனவும் அவை கவலை வெளியிட்டுள்ளன.

பிரித்தானியாவில் வசிக்கும் இலங்கையர்களுக்கு ஏற்படக்கூடிய பாதிப்பு

இந்தப் புதிய குடிவரவு மாற்றங்கள் பிரித்தானியாவில் வசிக்கும் இலங்கை மாணவர்கள், திறமையான தொழிலாளர்கள், சுகாதாரத் துறைப் பணியாளர்கள் மற்றும் அவர்களது குடும்ப உறுப்பினர்களைப் பாதிக்கக்கூடும்.

குறிப்பாக, எதிர்வரும் ஆண்டுகளில் நிரந்தர வதிவிட உரிமைக்கு விண்ணப்பிக்கத் திட்டமிட்டுள்ள இலங்கையர்கள் தங்களது விசா வகை, வருமானம், தொழில் மற்றும் ஏதேனும் விசேட விலக்குகளுக்குத் தகுதி பெறுகின்றார்களா என்பதைப் பொறுத்து புதிய விதிகளுக்கு உட்பட வேண்டிய நிலை ஏற்படலாம்.

எனினும், இந்த மாற்றங்கள் 2027ஆம் ஆண்டில் நடைமுறைப்படுத்தப்படும் என அரசாங்கம் தெரிவித்துள்ளதுடன், அதற்கான விரிவான குடிவரவு விதிமுறைகள் இன்னும் அறிமுகப்படுத்தப்படவில்லை.

எனவே, புதிய விதிகள் நடைமுறைக்கு வரும் வரையில் தற்போதைய நிரந்தர வதிவிட உரிமைக்கான விதிமுறைகளே தொடர்ந்து அமுலில் இருக்கும்.

புதிய அறிவிப்பு தொடர்பாக நடத்தப்பட்ட பொதுமக்கள் கருத்தறியும் நடவடிக்கையில் 200,000க்கும் அதிகமான கருத்துகள் கிடைத்துள்ளதாகவும், குறிப்பாக ஏற்கனவே பிரித்தானியாவில் வசிக்கும் பராமரிப்புப் பணியாளர்களின் நிலை குறித்து அதிக கவனம் செலுத்தப்பட்டுள்ளதாகவும் தெரிவிக்கப்பட்டுள்ளது.

பிரித்தானிய உள்துறை அமைச்சு மற்றும் 2026 நவம்பர் 2ஆம் திகதி நாடாளுமன்றத்தில் உள்துறைச் செயலாளர் ஷபானா மஹ்மூத் வெளியிட்ட அறிவிப்பு.