நேபாளத்தில் தரையிறங்க முயன்றபோது இரண்டு ஹெலிகொப்டர்கள் நேருக்கு நேர் மோதி விபத்து – இந்திய சுற்றுலாப் பயணி உயிரிழப்பு

நேபாளத்தின் எவரெஸ்ட் மலைப் பகுதியில் தரையிறங்க முயன்ற இரண்டு ஹெலிகொப்டர்கள் ஒன்றுடன் ஒன்று மோதி விபத்துக்குள்ளானதில் இந்திய சுற்றுலாப் பயணி ஒருவர் உயிரிழந்துள்ளதுடன், மேலும் இருவர் காயமடைந்துள்ளனர்.

இந்த விபத்து செவ்வாய்க்கிழமை காலை, சோலுகும்பு மாவட்டத்தில் உள்ள பெரிச்சே (Pheriche) ஹெலிகொப்டர் தரையிறங்குதளத்தில் இடம்பெற்றுள்ளது.

உள்ளூர் நேரப்படி காலை 8.11 மணியளவில், Fishtail Air மற்றும் Air Dynasty நிறுவனங்களுக்குச் சொந்தமான இரண்டு ஹெலிகொப்டர்களும் தரையிறங்க முயன்றபோது அவற்றின் சுழலி இறக்கைகள் ஒன்றுடன் ஒன்று மோதியுள்ளன. இதனால் இரண்டு ஹெலிகொப்டர்களும் விபத்துக்குள்ளாகியதாக நேபாள பொலிஸார் தெரிவித்துள்ளனர்.

இந்த விபத்தில் Fishtail Air நிறுவனத்தின் ஹெலிகொப்டரில் பயணித்த இந்திய சுற்றுலாப் பயணி ஒருவர் உயிரிழந்துள்ளார். உயிரிழந்தவர் வசந்த் குமார் என நேபாள ஊடகங்கள் அடையாளம் கண்டுள்ளன.

மேலும், நியூசிலாந்தைச் சேர்ந்த பயணி ஒருவரும், Air Dynasty நிறுவனத்தின் விமானி கப்டன் ரவீந்திர பிரஜாபதியும் காயமடைந்துள்ளனர். அவர்கள் மேலதிக சிகிச்சைக்காக ஹெலிகொப்டர் மூலம் காத்மாண்டுவில் உள்ள வைத்தியசாலைக்கு அழைத்துச் செல்லப்பட்டுள்ளனர்.

Fishtail Air நிறுவனத்தின் ஹெலிகொப்டரை கப்டன் பிரஜ்வல் கே.சி.யும், Air Dynasty நிறுவனத்தின் ஹெலிகொப்டரை கப்டன் ரவீந்திர பிரஜாபதியும் செலுத்தியதாக தெரிவிக்கப்பட்டுள்ளது.

விபத்து இடம்பெற்றதைத் தொடர்ந்து அவசரகால மீட்புக் குழுவினர் சம்பவ இடத்திற்கு அனுப்பப்பட்டதுடன், மீட்பு மற்றும் காயமடைந்தவர்களை வெளியேற்றும் நடவடிக்கைகளுக்கு ஏனைய ஹெலிகொப்டர்களும் பயன்படுத்தப்பட்டுள்ளன.

கடல் மட்டத்திலிருந்து 4,000 மீற்றருக்கும் அதிகமான உயரத்தில் அமைந்துள்ள பெரிச்சே பகுதி, எவரெஸ்ட் அடிவார முகாமுக்குச் செல்லும் மலையேற்ற வீரர்கள் மற்றும் சுற்றுலாப் பயணிகளின் முக்கிய தங்குமிடமாக விளங்குகிறது.

வீதிப் போக்குவரத்து வசதிகள் குறைவாகக் காணப்படும் இப்பகுதியில், சுற்றுலாப் பயணிகள், அத்தியாவசியப் பொருட்கள் மற்றும் காயமடைந்த மலையேற்ற வீரர்களை கொண்டு செல்வதில் ஹெலிகொப்டர்கள் முக்கிய பங்கு வகிக்கின்றன.

நேபாளத்தில் அதிகளவான சுற்றுலாப் பயணிகள் எவரெஸ்ட் பகுதிக்கு வருகை தரும் இலையுதிர்கால மலையேற்றப் பருவத்தில் இந்த விபத்து இடம்பெற்றுள்ளது.

இந்நிலையில், ஹெலிகொப்டர்கள் மோதிக்கொண்டமைக்கான காரணம் மற்றும் விபத்துக்கான சூழ்நிலைகள் தொடர்பில் நேபாள விமானப் போக்குவரத்து அதிகாரிகள் விசாரணைகளை ஆரம்பித்துள்ளனர்.