பிரான்ஸில் மாணவர் போராட்டம்: எறிகுண்டு வெடித்து சிறுவன் கை இழப்பு!

பிரான்ஸில் வகுப்பறை வசதிகளை மேம்படுத்துமாறு வலியுறுத்தி மாணவர்கள் நடத்தி வரும் தொடர் போராட்டத்தின் போது, பொலிஸார் வீசிய எறிகுண்டை கையில் எடுத்த 15 வயது மாணவன் ஒருவன் தனது கையை இழந்துள்ள சோகச் சம்பவம் இடம்பெற்றுள்ளது.

பிரான்ஸ் நாடெங்கிலும் உள்ள நூற்றுக்கணக்கான பாடசாலைகளில் கடந்த சில நாட்களாக பாடசாலைப் பணிகள் ஸ்தம்பிதமடைந்துள்ளடன், சில இடங்களில் தீவைப்புச் சம்பவங்களும் வீதிமறிப்புகளும் தீவிரமடைந்துள்ளன. இந்நிலையிலேயே நாட்டின் வடபகுதியில் அமைந்துள்ள லென்ஸ் (Lens) நகரில் இச்சம்பவம் பதிவாகியுள்ளது.

கலவர தடுப்புப் பொலிஸார் வீசிய அதிர்ச்சித் தலைகீழ் எறிகுண்டை அம்மாணவன் கையில் எடுத்தவேளை, அது வெடித்ததில் அவனது கை சிதைந்துள்ளதாக பொலிஸ் தொழிற்சங்க தகவல்கள் தெரிவிக்கின்றன.

முடங்கியுள்ள கல்வி நடவடிக்கைகள்:

பாடசாலைகளில் ஆசிரியர்களின் பற்றாக்குறை, அதிகப்படியான பாடவேளை அட்டவணைகள், சிதைவடைந்த வகுப்பறைகள் மற்றும் அதிகரித்து வரும் வெப்பநிலைக்கு ஏற்ப மாற்றியமைக்கப்படாத கட்டிடங்கள் உள்ளிட்ட பல்வேறு குறைபாடுகளை சுட்டிக்காட்டி, கடந்த செப்டம்பர் மாத இறுதி முதல் மாணவர்கள் நூற்றுக்கணக்கான பாடசாலைகளின் நுழைவாயில்களை மறித்துப் போராட்டத்தில் ஈடுபட்டு வருகின்றனர்.

"எமது கல்வி முறைமை சரியாகச் செயல்படவில்லை என்பது தெளிவாகத் தெரிகிறது" என மத்திய பாரிஸிலுள்ள சார்லிமேன் (Lycee Charlemagne) பாடசாலையைச் சேர்ந்த அல்மா (Alma) என்ற மாணவி ஏ.எஃப்.பி (AFP) செய்திச் சேவையிடம் தெரிவித்துள்ளார்.

எதிர்வரும் 2027 ஆம் ஆண்டு ஜனாதிபதி இமானுவல் மெக்ரோனின் (Emmanuel Macron) பதவிக்கா காலம் முடிவடைந்து புதிய ஜனாதிபதியைத் தேர்ந்தெடுப்பதற்கான தேர்தல் நடைபெறவுள்ள நிலையில், இப்போராட்டம் அரசாங்கத்திற்குப் பெரும் நெருக்கடியை ஏற்படுத்தியுள்ளது. மாணவர்களின் குறைகளைத் தீர்க்க நடவடிக்கை எடுத்துவருவதாகக் கூறும் அரசாங்கம், தீவிர இடதுசாரி ஆர்வலர்கள் இப்போராட்டத்தைத் திசைதிருப்புவதாகவும் குற்றம் சாட்டியுள்ளது.

"ஒரு இணையதளத்தில் எங்களது கருத்துக்களைப் பதிவு செய்ய அனுமதித்துவிட்டால், நாங்கள் வீதிமறிப்புகளையோ எங்களது கோபத்தையோ கைவிட்டுவிடுவோம் என்று அவர்கள் நினைக்கிறார்கள். ஆனால் இந்தக் கோபம் பல வருடங்களாக எங்களுக்குள் இருக்கிறது" என அதே பாடசாலையைச் சேர்ந்த சைமன் (Simon) என்ற மாணவன் சுட்டிக்காட்டியுள்ளான்.

காவல்துறையின் மிகைப்படுத்தப்பட்ட அடக்குமுறை:

இதேவேளை, சட்டப்பூர்வமாகச் சிறுவர்களாக இருக்கும் மாணவர்கள் மீது பாதுகாப்புப் படையினர் மிகைப்படுத்தப்பட்ட பலப்பிரயோகத்தைப் பயன்படுத்துவதாகப் பிரான்ஸ் மனித உரிமைகள் லீக் (LDH) குற்றம் சாட்டியுள்ளது. "காவல்துறையினருக்கு வழங்கப்பட்டுள்ள அறிவுறுத்தல்களில், அவர்கள் சிறு கையாள்கிறார்கள் என்பதைக் கருத்திற்கொண்டு நிதானத்தைக் கடைப்பிடிக்குமாறு எந்தவொரு கட்டளையும் பிறப்பிக்கப்படவில்லை என்பதை எம்மால் காண முடிகிறது" என மனித உரிமைகள் லீக் தலைவர் நதாலி டெஹியோ (Nathalie Tehio) விமர்சித்துள்ளார்.

கல்வி அமைச்சின் தகவல்களின்படி, பிரான்ஸிலுள்ள 3,700 மேல்நிலைப் பாடசாலைகளில் 400 இற்கும் மேற்பட்ட பாடசாலைகள் பகுதியளவிலோ அல்லது முழுமையாகவோ முடங்கியுள்ளன. பாரிஸ் மற்றும் போர்டோ (Bordeaux) போன்ற நகரங்களில் சில மாணவர்கள் வகுப்புகளுக்குத் திரும்பிய போதிலும், கணிசமானோர் வீதிகளில் இறங்கிப் போராட்டங்களைத் தொடர்கின்றனர்.

கடந்த செப்டம்பர் 17 ஆம் திகதி பாரிஸின் புறநகர்ப் பகுதியான கிரீட்டேல் நகரில், போதிய பணியாளர்கள் மற்றும் வளங்கள் இன்மையைக் கண்டித்து ஆசிரியர்கள் நடத்திய வேலைநிறுத்தத்திற்கு ஆதரவாகத் தொடங்கிய இப்போராட்டம், தற்போது நாடு முழுவதும் தீவிரமடைந்துள்ளது.

இதுவரை நடைபெற்ற வன்முறைகளில் 24 பாடசாலைகள் எரிக்கப்பட்டோ அல்லது சூறையாடப்பட்டோ சேதமடைந்துள்ளதாகக் கல்வி அமைச்சர் தெரிவித்துள்ளார். மேலும், கைது செய்யப்பட்ட 5,000 இற்கும் மேற்பட்டோரில் 85 சதவீதமானோர் சிறுவர்கள் என்பது குறிப்பிடத்தக்கது. காவல்துறையினரின் மிகைப்படுத்தப்பட்ட தாக்குதல்கள் தொடர்பில் குறைந்தது மூன்று உள்நாட்டு விசாரணைகள் தற்போது தொடங்கப்பட்டுள்ளன.