இம்ரான் கான் பேரணியைத் தடுக்க 2,000 வாகனங்கள் பறிமுதல்: பாகிஸ்தானில் முடங்கியது சரக்கு போக்குவரத்து!

முன்னாள் பிரதமர் இம்ரான் கானின் விடுதலையை வலியுறுத்தி நடத்தப்படவுள்ள எதிர்ப்புப் பேரணியைத் தடுக்கும் வகையில், பாகிஸ்தான் அதிகாரிகளால் 2,000க்கும் மேற்பட்ட வாகனங்கள் பறிமுதல் செய்யப்பட்டுள்ளன. இதனால் நாட்டின் முக்கிய வர்த்தகப் பாதைகள் முடங்கியுள்ளதோடு, கராச்சி துறைமுகத்தில் பெருமளவிலான சரக்குகள் தேக்கமடைந்துள்ளன.

சிறையில் அடைக்கப்பட்டுள்ள பாகிஸ்தான் தெஹ்ரீக்-இ-இன்சாஃப் (PTI) கட்சியின் தலைவர் இம்ரான் கானை விடுவிக்கக்கோரி, அக்டோபர் 4ஆம் திகதி நாட்டின் தலைநகரான இஸ்லாமாபாத்தை நோக்கிப் பேரணி நடத்தத் திட்டமிடப்பட்டுள்ளது. இதனை முறியடிக்கும் நோக்கில், தலைநகருக்கான நுழைவுப் பாதைகளை முடக்குவதற்காக செப்டம்பர் மாதத்தில் மட்டும் 2,000க்கும் மேற்பட்ட வாகனங்களைப் பொலிஸார் தற்காலிகமாகப் பொறுப்பேற்றுள்ளதாக சர்வதேச செய்திச் சேவையான ராய்ட்டர்ஸ் தெரிவித்துள்ளது.

தலைநகருக்குச் செல்லும் முக்கிய வீதிகளில் தடைகளை ஏற்படுத்துவதற்காக, மணல் நிரப்பப்பட்டு ஒன்றாகப் பிணைக்கப்பட்ட பிரம்மாண்ட சரக்குக் கொள்கலன்கள் வீதித் தடுப்புகளாக அமைக்கப்பட்டுள்ளன.

அதிகாரிகளின் இந்த நடவடிக்கையால், தங்களது லாரிகளும் கொள்கலன்களும் பறிமுதல் செய்யப்படலாம் என்ற அச்சத்தில் ஓட்டுநர்கள் வடக்கு நோக்கிப் பயணிப்பதைத் தவிர்த்து வருகின்றனர். இதன் காரணமாகப் பஞ்சாப் (Punjab) மற்றும் இஸ்லாமாபாத் நோக்கிய போக்குவரத்து ஸ்தம்பித்து, கராச்சி துறைமுகத்தில் சரக்குகள் தேக்கமடைந்துள்ளன. இதனால் நாட்டின் சரக்கு விநியோகச் சங்கிலி கடுமையாகப் பாதிக்கப்பட்டுள்ளது.

இஸ்லாமாபாத், ராவல்பிண்டி , ஜீலம் , பெஷாவர் மற்றும் அட்டாக் ஆகிய பகுதிகளுக்கான போக்குவரத்துப் பாதைகள் இதனால் பெரிதும் பாதிக்கப்பட்டுள்ளன. சில போக்குவரத்து உரிமையாளர்கள் குஜ்ரன்வாலாவிற்கு அப்பால் பயணிப்பதை முழுமையாக நிறுத்தியுள்ளதுடன், மாற்றுப் பாதைகளைப் பயன்படுத்தத் தொடங்கியுள்ளனர்.

இந்த முடக்கத்தால் பெரும் நிதி இழப்பு ஏற்பட்டுள்ளதாகப் போக்குவரத்துத் துறைப் பிரதிநிதிகள் வேதனை தெரிவித்துள்ளனர். பறிமுதல் செய்யப்படும் ஒரு சரக்குக் கொள்கலனுக்கு நாளொன்றுக்கு தாமதக் கட்டணமாக சுமார் 30,000 முதல் 40,000 பாகிஸ்தான் ரூபாய்கள் (அமெரிக்க டொலரில் (USD) சுமார் 110 முதல் 150 டொலர்கள்) வரை செலுத்த வேண்டிய நிலை ஏற்பட்டுள்ளது. சரக்கு விநியோகத் தாமதம், முடங்கிக்கிடக்கும் வாகனங்கள் மற்றும் சர்வதேசக் கப்பல் நிறுவனங்களுக்குச் செலுத்த வேண்டிய நிலுவைத் தொகைகளால் இழப்புகள் மேலும் அதிகரித்துள்ளன.

இருப்பினும், இந்த விவகாரம் தொடர்பாக பாகிஸ்தானின் உள்துறை, தகவல் துறை, வர்த்தகத் துறை மற்றும் நிதி அமைச்சச்சுகளோ அல்லது பஞ்சாப் பொலிஸாரோ இதுவரை எவ்வித அதிகாரப்பூர்வ விளக்கத்தையும் அளிக்கவில்லை.