பிரான்ஸில் பாடசாலை மாணவர்கள் வீதிப்போராட்டம்: நூற்றுக்கணக்கானோர் கைது!

பிரான்ஸ் முழுவதும் பாடசாலைப் பிரவேசங்களை மறித்து உயர்தரப் பாடசாலை மாணவர்கள் தொடர்ந்து முன்னெடுத்து வரும் தீவிர போராட்டங்களின் போது நூற்றுக்கணக்கான மாணவர்கள் கைது செய்யப்பட்டுள்ளதோடு பலரும் காயமடைந்துள்ளதாக அதிகாரிகள் தெரிவித்துள்ளனர்.

ஆசிரியர் பற்றாக்குறை மற்றும் பாடசாலைக் கட்டிடங்களின் சீரற்ற நிலைமைக்கு எதிர்ப்பு தெரிவித்து, கடந்த வாரம் தொடங்கிய இப்போராட்டம் பிரான்ஸ் முழுவதும் தீவிரமடைந்துள்ளது. இப்போராட்டங்கள் அரசாங்கத்திற்கு பெரும் அரசியல் நெருக்கடியை ஏற்படுத்தியுள்ளன. அரசாங்கம் தனது 2027ஆம் ஆண்டிற்கான வரவு செலவுத் திட்டத்தை (Budget) வெளியிடுவதற்கு தயாராகி வரும் பின்னணியிலேயே இந்த கொந்தளிப்பான சூழல் உருவாகியுள்ளது.

பாரிஸின் புறநகர் பகுதியான சென்-டெனீயில் தீ மூட்டப்பட்ட பாடசாலை வாயிலுக்கு அருகே மாணவர்கள் திரண்டு போராட்டத்தில் ஈடுபட்டனர். லியோன் (Lyon) மற்றும் லீல் (Lille) ஆகிய நகரங்களில் பொலிஸாரை நோக்கி போராட்டக்காரர்கள் பொருட்களை எறியும் காட்சிகள் வெளியாகியுள்ளன.

"பாடசாலையில் எலிகளும் கரப்பான்களும் நிறைந்து காணப்படுகின்றன. வகுப்பறைகளில் காலநிலைக்கேற்ப அதிக வெப்பமும் உறைபனியும் நிலவுகிறது. இத்தகைய சூழலில் எங்களால் கல்வி கற்க முடியாது" என 17 வயது மாணவியான படிலா தெரிவித்துள்ளார்.

நூற்றுக்கணக்கானோர் கைது; பலர் காயம்

போராட்டம் தொடங்கியதில் இருந்து இதுவரை மாணவர்கள் மற்றும் ஊழியர்கள் உட்பட 76 பேர் காயமடைந்துள்ளதாக பிரான்ஸின் கல்வி அமைச்சர் எடுவார்ட் ஜெஃப்ராய் தெரிவித்துள்ளார்.

அத்துடன், செவ்வாய்க்கிழமை ஒரே நாளில் மட்டும் சுமார் 440 பேர் பொலிஸாரால் கைது செய்யப்பட்டுள்ளதாக பிரான்ஸ் உள்நாட்டலுவல்கள் அமைச்சர் லோரண்ட் நுனேஸ் தெரிவித்துள்ளார். கைது செய்யப்பட்டவர்களில் பெரும்பாலானோர் சிறுவர்கள் என்பதோடு, பாதுகாப்பு படையினர் மீது அமில வீச்சு தாக்குதல்களும் நடத்தப்பட்டதாக அவர் சுட்டிக்காட்டியுள்ளார்.

ஆசிரியர் பற்றாக்குறை மற்றும் வகுப்பறைகளில் அதிகரித்து காணப்படும் மாணவர் எண்ணிக்கை ஆகியவற்றுக்கு உடனடியாக தீர்வு காணப்பட வேண்டும் என மாணவர்கள் வலியுறுத்தி வருகின்றனர். மாணவர்களின் கோரிக்கைகளில் உள்ள நியாயத்தை ஏற்றுக்கொள்வதாக தெரிவித்துள்ள அரசாங்கம், அதேவேளை வன்முறைகளில் ஈடுபடுவதை கடுமையாக கண்டித்துள்ளது.