பரிசுப் பொதிகள் தொடர்பான ரஞ்சன் ஜயலாலின் கருத்துக்கு லால் காந்த எதிர்ப்பு – கட்சி ரீதியாக எச்சரிக்கை விடுக்கப்படும்

அரச ஊழியர்களுக்கு தனியார் நிறுவனங்கள் பண்டிகைக் காலப் பரிசுப் பொதிகளை வழங்க வேண்டும் எனக் கூறிய கடுவெல மாநகர மேயர் ரஞ்சன் ஜயலாலின் கருத்தை அமைச்சர் கே.டி. லால் காந்த நிராகரித்துள்ளார்.

ஜயலாலின் கருத்து முற்றிலும் தவறானது எனக் குறிப்பிட்ட அமைச்சர், அது அரசாங்கத்தினதும் கட்சியினதும் நிலைப்பாட்டைப் பிரதிபலிக்கவில்லை என்றும் தெரிவித்துள்ளார்.

இலஞ்சம் அல்லது ஊழல் தொடர்பான சட்டத்தில் அரச அதிகாரிகள் பரிசுப் பொருட்களைப் பெற்றுக்கொள்வதைத் தடுக்கும் ஏற்பாடுகள் உள்ளதாகச் சுட்டிக்காட்டிய அவர், சில சூழ்நிலைகளில் ஒரு கோப்பைத் தேநீரைக் கூட இலஞ்சமாகக் கருத முடியும் எனத் தெரிவித்தார்.

எனவே, எதிர்வரும் பண்டிகைக் காலத்தில் அரச அதிகாரிகள் மற்றும் மக்கள் பிரதிநிதிகள் பரிசுப் பொதிகள் உள்ளிட்ட எந்தவொரு சலுகைகளையும் பெற்றுக்கொள்ளக் கூடாது எனவும் அவர் வலியுறுத்தினார்.

ரஞ்சன் ஜயலாலின் கருத்துக்காக அவருக்கு கட்சி ரீதியாக எச்சரிக்கை விடுக்கப்படுவதுடன், எதிர்காலத்தில் இவ்வாறான கருத்துக்களை வெளியிட வேண்டாம் என அறிவுறுத்தப்படும் என்றும் லால் காந்த தெரிவித்தார்.

எனினும், இந்தக் கருத்து காரணமாக அவரைக் கட்சியிலிருந்து நீக்குவதற்கோ அல்லது மேயர் பதவியிலிருந்து அகற்றுவதற்கோ அவசியமில்லை எனவும் அமைச்சர் குறிப்பிட்டார்.

அதேவேளை, ஜயலால் இலஞ்சம் பெற்றுக்கொண்டார் என்பதை அவரது கருத்து நேரடியாக உறுதிப்படுத்தவில்லை என்றும் தெரிவித்த அமைச்சர், இந்த விவகாரம் தொடர்பில் எவரும் விசாரணை கோரவோ அல்லது விசாரணையை ஆரம்பிக்க நடவடிக்கை எடுக்கவோ தடையில்லை எனவும் கூறினார்.

கடந்த ஞாயிற்றுக்கிழமை (08), மலாபே அரங்கல பகுதியில் நடைபெற்ற நிகழ்வொன்றில் உரையாற்றிய ரஞ்சன் ஜயலால், நகர சபை ஊழியர்கள் உள்ளிட்ட அரச ஊழியர்களுக்கு தனியார் நிறுவனங்கள் வழக்கமாக வழங்கிவந்த வருட இறுதிப் பரிசுப் பொதிகளைத் தொடர்ந்து வழங்க வேண்டும் எனக் கேட்டுக்கொண்டிருந்தார்.

ஆட்சி மாற்றத்தைத் தொடர்ந்து சில நிறுவனங்கள் இவ்வாறான பரிசுப் பொதிகளை வழங்குவதை நிறுத்தியுள்ளதாகக் குறிப்பிட்ட அவர், அந்த நடைமுறையை மீண்டும் தொடருமாறும் வலியுறுத்தியிருந்தார்.

அரச ஊழியர்களும் உணவு, பானங்கள் மற்றும் ஏனைய பொருட்களைப் பரிசாகப் பெறுவதில் மகிழ்ச்சியடைவார்கள் என்றும், டிசம்பர் மாதத்தில் வழக்கமாக முன்னெடுக்கப்படும் பரிசுப் பொருட்கள் விநியோகத்தை நிறுவனங்கள் தொடர வேண்டும் என்றும் அவர் தெரிவித்திருந்தார்.

தனியார் நிறுவனங்களுக்கும் அரச நிறுவனங்களுக்கும் இடையில் வர்த்தக அல்லது நிர்வாகத் தொடர்புகள் காணப்படக்கூடிய சூழலில், அரச அதிகாரிகள் இவ்வாறான பரிசுகளைப் பெற்றுக்கொள்வது தொடர்பில் ஜயலாலின் கருத்து சர்ச்சையையும் விமர்சனங்களையும் ஏற்படுத்தியுள்ளது.