பயங்கரவாதத் தடுப்புச் சட்டமூலம், ஒழுங்கமைக்கப்பட்ட குற்றத் தடுப்புச் சட்டமூலம்: அரசின் அதிகாரங்கள் அதிகரிக்கும் என BASL எச்சரிக்கை

இலங்கை அரசாங்கத்தினால் வர்த்தமானியில் வெளியிடப்பட்டுள்ள பயங்கரவாதத்திலிருந்து அரசைப் பாதுகாக்கும் சட்டமூலம் (PSTA) மற்றும் ஒழுங்கமைக்கப்பட்ட குற்றங்களைத் தடுக்கும் சட்டமூலம் (OCB) ஆகியவை தொடர்பில் இலங்கை சட்டத்தரணிகள் சங்கம் (BASL) கடுமையான கவலைகளை வெளியிட்டுள்ளது.

குறித்த இரண்டு சட்டமூலங்களும் நிறைவேற்று அதிகாரத்துக்கு அசாதாரணமான அதிகாரங்களை வழங்குவதுடன், நீதித்துறையின் கண்காணிப்பையும் தனிநபர்களின் அடிப்படைச் சுதந்திரங்களையும் பெருமளவில் கட்டுப்படுத்தக்கூடும் என அந்தச் சங்கம் எச்சரித்துள்ளது.

பயங்கரவாதத்திலிருந்து அரசைப் பாதுகாக்கும் சட்டமூலம் தொடர்பில் கருத்துத் தெரிவித்துள்ள BASL, குறித்த சட்டமூலத்தைத் தயாரிப்பதற்காக அமைக்கப்பட்ட ஆலோசனைக் குழுக்களில் தாம் பங்கேற்றிருந்தபோதிலும், இறுதியாக வர்த்தமானியில் வெளியிடப்பட்ட சட்டமூலம், குழுவினால் அங்கீகரிக்கப்பட்ட வரைபிலிருந்து குறிப்பிடத்தக்க அளவில் மாற்றப்பட்டுள்ளதாகச் சுட்டிக்காட்டியுள்ளது.

இந்த மாற்றங்கள் தொடர்பில் மீளாய்வுக் குழு உறுப்பினர்களுக்கு அறிவிக்கப்படவில்லை என்றும் சங்கம் தெரிவித்துள்ளது.

இதனையடுத்து, குறித்த சட்டமூலம் அரசியலமைப்பின் 3, 4(d), 10, 11, 12, 13, 14 மற்றும் 14A ஆகிய உறுப்புரைகளின் கீழ் உறுதிப்படுத்தப்பட்டுள்ள அடிப்படை உரிமைகளை மீறுவதாகக் குறிப்பிட்டு, அரசியலமைப்பின் 121ஆம் உறுப்புரையின் கீழ் உயர் நீதிமன்றத்தில் விசேட தீர்மான மனுவொன்றையும் BASL தாக்கல் செய்துள்ளது.

பயங்கரவாதத்திலிருந்து அரசைப் பாதுகாக்கும் சட்டமூலத்தில், சந்தேகநபர்களை கட்டாயமாக விளக்கமறியலில் வைக்கும் ஏற்பாடுகள், பிணை வழங்கும் அதிகாரத்தை உயர் நீதிமன்றத்துக்கு மாத்திரம் மட்டுப்படுத்துதல், நீண்டகாலத் தடுப்புக்காவலுக்கு நீதித்துறை அனுமதி பெற வேண்டிய அவசியத்தை நீக்குதல் மற்றும் தடை விதிக்கும் அதிகாரங்களை ஜனாதிபதியிடம் குவித்தல் உள்ளிட்ட பல்வேறு சர்ச்சைக்குரிய ஏற்பாடுகள் காணப்படுவதாக அந்தச் சங்கம் சுட்டிக்காட்டியுள்ளது.

இந்த ஏற்பாடுகள், பல தசாப்தங்களாக நடைமுறையில் இருந்த பயங்கரவாதத் தடுப்புச் சட்டத்தின் (PTA) கீழ் இடம்பெற்ற தன்னிச்சையான நடவடிக்கைகளை மீண்டும் ஏற்படுத்தக்கூடும் என்றும் BASL எச்சரித்துள்ளது. குறிப்பாக, சட்டத்தரணி ஹிஜாஸ் ஹிஸ்புல்லா நீண்டகாலம் தடுத்து வைக்கப்பட்டிருந்த சம்பவத்தையும் இதற்கு உதாரணமாகச் சுட்டிக்காட்டியுள்ளது.

இதேவேளை, ஒழுங்கமைக்கப்பட்ட குற்றங்களைத் தடுக்கும் சட்டமூலம் தொடர்பிலும் BASL கடுமையான எதிர்ப்பை வெளியிட்டுள்ளது. பொதுமக்களின் கருத்துகளைப் பெறுவதற்கான முறையான ஆலோசனைகள் இன்றி இந்தச் சட்டமூலம் தயாரிக்கப்பட்டுள்ளதாகவும் சங்கம் தெரிவித்துள்ளது.

நான்கு ஆண்டுகளுக்கு மேல் சிறைத்தண்டனை விதிக்கக்கூடிய குற்றங்களுடன், பதிப்புரிமை மீறல், வனவளச் சட்ட மீறல்கள் மற்றும் கலால் தொடர்பான குற்றங்கள் உள்ளிட்ட சுமார் 50 வெவ்வேறு சட்டங்களின் கீழான குற்றங்களையும் ஒழுங்கமைக்கப்பட்ட குற்றங்களுடன் தொடர்புபடுத்தும் வகையில் இந்தச் சட்டமூலம் அமைந்துள்ளதாகக் கூறப்படுகிறது.

மேலும், ஒழுங்கமைக்கப்பட்ட குழுக்கள் தொடர்பான வரையறைகள் தெளிவற்றதாக இருப்பதால், அமைதியான போராட்டங்கள், தொழிற்சங்கச் செயற்பாடுகள் மற்றும் சிவில் சமூக அமைப்புகளின் நடவடிக்கைகள்கூட குற்றவியல் நடவடிக்கைகளுக்கு உட்படுத்தப்படும் அபாயம் இருப்பதாக BASL எச்சரித்துள்ளது.

அத்துடன், அமைச்சின் செயலாளரால் நேரடியாக ஒரு வருடம் வரையிலான தடுப்புக்காவல் உத்தரவுகளைப் பிறப்பிக்க அனுமதிக்கும் ஏற்பாடுகள் குறித்தும் சங்கம் கவலை வெளியிட்டுள்ளது.

பொலிஸாரிடம் பெறப்படும் ஒப்புதல் வாக்குமூலங்களை ஆதாரங்களாக ஏற்றுக்கொள்ளுதல் மற்றும் குற்றமற்றவர் என்ற முன்கணிப்புக் கொள்கையைப் பாதிக்கும் வகையில் ஆதாரச் சுமையை மாற்றியமைத்தல் போன்ற ஏற்பாடுகளும் சட்டமூலத்தில் உள்ளடக்கப்பட்டுள்ளதாக BASL சுட்டிக்காட்டியுள்ளது.

இந்நிலையில், பயங்கரவாதத்திலிருந்து அரசைப் பாதுகாக்கும் சட்டமூலத்தை தற்போதைய வடிவில் அரசாங்கம் மீளப்பெற்று, ஆலோசனைக் குழுவினால் அங்கீகரிக்கப்பட்ட பாதுகாப்பு ஏற்பாடுகளை மீண்டும் உள்ளடக்க வேண்டும் என BASL கோரியுள்ளது.

மேலும், ஆலோசனைக் குழுக்களின் அறிக்கைகள் மற்றும் முரண்பட்ட கருத்துகள் அடங்கிய ஆவணங்களைப் பகிரங்கப்படுத்த வேண்டும் என்றும், ஒழுங்கமைக்கப்பட்ட குற்றங்களைத் தடுக்கும் சட்டமூலத்தை முழுமையாக மீளப்பெற்று, அர்த்தமுள்ள பொதுமக்கள் ஆலோசனைகளுக்குப் பின்னரே புதிய நடவடிக்கைகளை முன்னெடுக்க வேண்டும் என்றும் வலியுறுத்தியுள்ளது.

அதேவேளை, நீண்டகாலமாக நடைமுறையில் உள்ள பயங்கரவாதத் தடுப்புச் சட்டத்தையும் (PTA) தாமதமின்றி நீக்குவதற்கு அரசாங்கம் நடவடிக்கை எடுக்க வேண்டும் என இலங்கை சட்டத்தரணிகள் சங்கம் கோரிக்கை விடுத்துள்ளது.