நச்சு இரசாயனங்கள் மூலம் பழுக்க வைக்கப்படும் பழங்களைக் கண்டறிவது எப்படி? நிபுணர் விளக்கம்

வியாபார நோக்கங்களுக்காக பழங்களைச் செயற்கையான முறையில் பழுக்க வைப்பதற்குப் பல்வேறு இரசாயனங்கள் பயன்படுத்தப்பட்டு வரும் நிலையில், நச்சு இரசாயனங்கள் மூலம் பழுக்க வைக்கப்பட்ட பழங்களைக் நுகர்வோர்கள் எவ்வாறு அடையாளம் காணலாம் என்பது குறித்து பின் அறுவடைத் தொழில்நுட்ப மேலாண்மை நிறுவனத்தின் தலைவர் பேராசிரியர் ரோஹித பிரசாந்த தெளிவுபடுத்தியுள்ளார்.

வியாபார ரீதியான லாப நோக்கங்களே இவ்வாறான செயற்கை முறையில் பழங்களைப் பழுக்க வைக்கும் உத்திகள் அதிகரிப்பதற்குக் காரணம் என அவர் சுட்டிக்காட்டியுள்ளார்.

இது தொடர்பில் மேலும் கருத்துத் தெரிவித்துள்ள பேராசிரியர், பழங்களை இயற்கை முறையில் பழுக்க வைப்பதற்குப் பாரம்பரியமாகப் புகையிடுதல் அல்லது சில வகை இலைகளைப் பயன்படுத்துதல் போன்ற வழிமுறைகள் பின்பற்றப்பட்டு வந்தன. இவை தாவரங்களில் இயற்கையாகவே பழுக்க வைக்கும் செயன்முறையைத் தூண்டும் 'எத்திலீன்' (Ethylene) எனும் ஹோமோனை சுரக்கச் செய்கின்றன. சர்வதேச அளவிலும் பயன்படுத்தப்படும் இந்த இயற்கை எத்திலீன் செயன்முறையை விரைவுபடுத்துவது மனித உடலுக்குப் பாதிப்பை ஏற்படுத்துவதில்லை என்றும் அவர் தெரிவித்தார்.

எனினும், 'அசிட்டிலீன்' (Acetylene) போன்ற பிற இரசாயனங்களின் பயன்பாடு தொடர்பில் கடுமையான கவலைகள் எழுந்துள்ளதாக அவர் குறிப்பிட்டுள்ளார். குறிப்பாக இலங்கையில், பழங்களைப் பழுக்க வைப்பதற்காக 'கார்பைடு' (Carbide) எனப்படும் இரசாயனம் தவறாகப் பயன்படுத்தப்பட்டது ஆரம்பகட்டப் பிரச்சினையாக உருவெடுத்தது.

விவசாயத் திணைக்களத்தினால் அசிட்டிலீனை உருவாக்குவதற்காகவே கார்பைடு அறிமுகப்படுத்தப்பட்டது. இது இயற்கை எத்திலீனின் தொழிற்பாட்டைப் போன்று செயல்படக்கூடியது என்பதால், நேரடியாகப் பழங்கள் மீது தெளிப்பதற்காக வடிவமைக்கப்படவில்லை. இருந்தபோதிலும், சில வர்த்தகர்கள் அதிகளவிலான பழங்களை விரைவாகப் பழுக்க வைப்பதற்காகக் கார்பைடை நேரடியாகவே பழங்கள் மீது பயன்படுத்தத் தொடங்கினர்.

கார்பைடில் ஆர்சனிக் (Arsenic) மற்றும் பாஸ்பரஸ் (Phosphorus) போன்ற உடலுக்குப் பெரும் தீங்கை விளைவிக்கும் நச்சுச் சேர்மங்கள் காணப்படுவதால், பழங்களைப் பழுக்க வைப்பதற்கு அதைப் பயன்படுத்துவதற்குப் பல்வேறு கட்டுப்பாடுகள் விதிக்கப்பட்டதாகப் பேராசிரியர் பிரசாந்த விளக்கமளித்தார்.

செயற்கை முறையில் பழுக்க வைக்கப்பட்ட பழங்களைக் நுகர்வோர்கள் எவ்வாறு கண்டறியலாம் என்பதையும் அவர் தெளிவுபடுத்தியுள்ளார்:

பழுக்கும் முறை : இயற்கையாகப் பழுக்கும் பழங்கள் பொதுவாகக் காம்புப் பகுதியில் (Stem) இருந்தே பழுக்கத் தொடங்கும். மாறாக, பழத்தின் பல்வேறு இடங்களில் சீரற்ற முறையில் அல்லது ஆங்காங்கே புள்ளிகளாகப் பழுத்திருந்தால், அது செயற்கை இரசாயனங்கள் பயன்படுத்தப்பட்டதற்கான அறிகுறியாகும்.

சுவையும் ஊட்டச்சத்தும்: இயற்கை முறையில் முதிர்ச்சியடைந்து பழுக்கும் பழங்களிலேயே முழுமையான சுவையும் ஊட்டச்சத்துக்களும் வளர்கின்றன. ஆனால், செயற்கை முறையில் பழுக்க வைக்கப்படும் பழங்களில் இத்தகைய இயற்கைச் சுவையையோ சத்துக்களையோ எதிர்பார்க்க முடியாது.

எனவே, பழங்களைக் கொள்வனவு செய்யும்போது நுகர்வோர்கள் மிகவும் அவதானத்துடன் செயல்பட வேண்டும் என வலியுறுத்தியுள்ள அவர், பாதுகாப்பான மற்றும் நவீன பழம் பழுக்க வைக்கும் தொழில்நுட்பங்கள் மற்றும் பயிற்சிகள் வர்த்தகர்களுக்கு வழங்கப்படும் என்றும் தெரிவித்தார்.