தெற்கு ஆழ்கடலில் மீன்பிடிப் படகிலிருந்து ரூ. 4.2 பில்லியன் பெறுமதியான போதைப்பொருட்கள் மீட்பு!

இலங்கையின் தெற்கு ஆழ்கடல் பகுதியில் கடற்படையினரால் இடைமறிக்கப்பட்ட பலநாள் மீன்பிடிப் படகிலிருந்து, 189 கிலோகிராமிற்கும் அதிகமான ஐஸ் மற்றும் ஹெரோயின் போதைப்பொருட்கள் மீட்கப்பட்டுள்ளன.

மீட்கப்பட்ட போதைப்பொருட்களின் சந்தைப் பெறுமதி 4.2 பில்லியன் ரூபாவுக்கும் அதிகம் என மதிப்பிடப்பட்டுள்ளது.

கடற்படை ஊடகப் பணிப்பாளர் கமாண்டர் சாமிந்த வலகுளுகே, நியூஸ்வயர் செய்திச் சேவைக்கு இதனைத் தெரிவித்துள்ளார்.

இதன்படி, 132 கிலோகிராமிற்கும் அதிகமான ஐஸ் போதைப்பொருளும், 57 கிலோகிராமிற்கும் அதிகமான ஹெரோயின் போதைப்பொருளும் மீட்கப்பட்டுள்ளன.

மீன்பிடிப் படகிலிருந்து மீட்கப்பட்ட போதைப்பொருட்கள் இன்று (05) திக்கோவிட்ட மீன்பிடித் துறைமுகத்திற்குக் கொண்டுவரப்பட்டு பரிசோதிக்கப்பட்டு, நிறை கணக்கிடப்பட்ட பின்னரே இறுதி அளவுகள் உறுதிப்படுத்தப்பட்டுள்ளன.

'பான புத்த' (Phana Putha) எனப் பெயரிடப்பட்ட குறித்த மீன்பிடிப் படகு, கடந்த நவம்பர் 1ஆம் திகதி இலங்கையின் தெற்குப் பகுதியில் உள்ள ஆழ்கடலில் முன்னெடுக்கப்பட்ட விசேட புலனாய்வு நடவடிக்கையின்போது கடற்படையினரால் இடைமறிக்கப்பட்டது.

குறித்த படகு, கடந்த ஒக்டோபர் 18ஆம் திகதி மீன்பிடி நடவடிக்கைகளுக்காக கந்தர மீன்பிடித் துறைமுகத்திலிருந்து கடலுக்குப் புறப்பட்டுள்ளதாகத் தெரிவிக்கப்பட்டுள்ளது.

கிடைத்த இரகசியத் தகவலின் அடிப்படையில், கடற்படையின் 'சமுத்ர விஜய' என்ற அதிநவீன கப்பல் குறித்த மீன்பிடிப் படகை இடைமறித்துள்ளது.

இதன்போது மேற்கொள்ளப்பட்ட சோதனையில், போதைப்பொருட்கள் எனச் சந்தேகிக்கப்படும் 10 மூட்டைகள் கண்டுபிடிக்கப்பட்டதுடன், படகிலிருந்த ஐந்து சந்தேகநபர்களும் செய்மதித் தொலைபேசி ஒன்றும் கைப்பற்றப்பட்டுள்ளன.

இதனையடுத்து, படகும் சந்தேகநபர்களும் இன்று திக்கோவிட்ட மீன்பிடித் துறைமுகத்திற்குக் கொண்டுவரப்பட்டு, பொலிஸ் போதைப்பொருள் ஒழிப்புப் பணியகத்தின் உதவியுடன் மேலதிக சோதனைகள் முன்னெடுக்கப்பட்டன.

இதன்போது, ஐஸ் போதைப்பொருள் எனச் சந்தேகிக்கப்படும் 100 பொதிகளும், ஹெரோயின் எனச் சந்தேகிக்கப்படும் 52 பொதிகளும் கண்டுபிடிக்கப்பட்டுள்ளன.

இந்த நடவடிக்கை, பொலிஸ் விசேட அதிரடிப்படை, அரச புலனாய்வுப் பிரிவுகள், சர்வதேச புலனாய்வு அமைப்புகள் மற்றும் போதைப்பொருள் ஒழிப்பு அமைப்புகளின் புலனாய்வுத் தகவல்களின் ஒத்துழைப்புடன் முன்னெடுக்கப்பட்டதாக கடற்படை ஊடகப் பணிப்பாளர் மேலும் தெரிவித்துள்ளார்.