‘தாய்மாமன் தங்க மோதிரம்’ திட்டத்தை மதுரையில் தொடக்கி வைத்தார் தமிழக முதல்வர் விஜய்

தமிழக அரசு மருத்துவமனைகள் மற்றும் ஆரம்ப சுகாதார நிலையங்களில் பிறக்கும் குழந்தைகளுக்கு, அரசின் சார்பில் ஒரு கிராம் தங்க மோதிரம் வழங்கும் ‘தாய்மாமன் தங்க மோதிரம்’ திட்டத்தை தமிழக முதல்வர் ஜோசப் விஜய் இன்று மதுரையில் அதிகாரப்பூர்வமாகத் தொடக்கி வைத்தார்.

மதுரை இராசாசி அரசு மருத்துவமனையில் நடைபெற்ற சிறப்பு விழாவில் பங்கேற்ற முதல்வர், அங்கு புதிதாகப் பிறந்த 30 குழந்தைகளுக்குத் தங்க மோதிரங்களை நேரடியாக அணிவித்து இத்திட்டத்தைத் தொடக்கி வைத்தார்.

இந்நிகழ்வில் அமைச்சர்கள் என். ஆனந்த் , அருண்ராஜ், நிர்மல் குமார், விசுவநாதன் மற்றும் மதுரை நாடாளுமன்ற உறுப்பினர் சு. வெங்கடேசன் உள்ளிட்ட பலர் கலந்து கொண்டனர்.

முன்னதாகச் சென்னையிலிருந்து தனி வானூர்தி மூலம் மதுரை வந்தடைந்த முதல்வர் விஜய், அங்கிருந்து சாலை வழியாக இராசாசி அரசு மருத்துவமனைக்குச் சென்றடைந்தார்.

இடைத்தேர்தல் நடைபெறவுள்ள செங்கல்பட்டு மற்றும் திருப்பூர் மாவட்டங்களைத் தவிர்த்து, தமிழகத்தின் ஏனைய அனைத்து மாவட்டங்களிலும் இத்திட்டம் அமைச்சர்களால் இன்று ஒரே நேரத்தில் தொடக்கி வைக்கப்பட்டது.

கடந்த ஜூன் 22-ஆம் திகதிக்குப் பிறகு பிறந்த அனைத்துக் குழந்தைகளுக்கும் இத்திட்டத்தின் கீழ் பயன் கிடைக்கும் என அறிவிக்கப்பட்டுள்ளது. இதற்காகத் தமிழக அரசு ஆண்டதோறும் 756 கோடி ரூபாய் நிதியை ஒதுக்கீடு செய்துள்ளது.

காந்தி அருங்காட்சியகம் திறப்பு:

இதனைத் தொடர்ந்து, 10 கோடி ரூபாய் செலவில் புதுப்பிக்கப்பட்ட மதுரை காந்தி நினைவு அருங்காட்சியகத்தை முதல்வர் திறந்து வைத்தார். அரசு விருந்தினர் மாளிகையில் ஓய்வெடுத்த பின்னர், மாலையில் மதுரை மீனாட்சி அம்மன் கோவிலில் வழிபாடு மேற்கொள்ளும் முதல்வர், இரவு 6.00 மணியளவில் தனி வானூர்தி மூலம் மீண்டும் சென்னை திரும்புகிறார்.