“தவறு! பகிரங்க மன்னிப்புக் கோர வேண்டும்; ஒழுக்காற்று நடவடிக்கையும் அவசியம்” – சுனில் ஹந்துன்னெத்தி

கடுவெல மாநகர சபை மேயர் ரஞ்சன் ஜயலால், அரச நிறுவனங்களின் ஊழியர்களுக்குப் பண்டிகைக் காலங்களில் பரிசுப் பொதிகள் மற்றும் அன்பளிப்புகளை வழங்குவது தொடர்பில் வெளியிட்ட கருத்துக்கு கைத்தொழில் மற்றும் தொழில்முயற்சி அபிவிருத்தி அமைச்சர் சுனில் ஹந்துன்னெத்தி கடும் கண்டனம் தெரிவித்துள்ளார்.

குறித்த கருத்து முற்றிலும் தவறானது எனத் தெரிவித்துள்ள அவர், மேயருக்கு எதிராக ஒழுக்காற்று நடவடிக்கை எடுக்கப்பட வேண்டும் என்றும் வலியுறுத்தியுள்ளார்.

நியூஸ் பெஸ்டின் 'இலக்கய' நிகழ்ச்சியில் கலந்துகொண்டு கருத்துத் தெரிவித்த அமைச்சர் ஹந்துன்னெத்தி, ரஞ்சன் ஜயலாலின் கருத்து மக்கள் விடுதலை முன்னணி (ஜே.வி.பி), தேசிய மக்கள் சக்தி (என்.பி.பி) அல்லது அதன் உறுப்பினர்கள் மற்றும் ஆதரவாளர்களின் நிலைப்பாட்டைப் பிரதிபலிக்கவில்லை எனக் குறிப்பிட்டார்.

"கடுவெல மாநகர சபை மேயர் ரஞ்சன் ஜயலால் வெளியிட்ட கருத்தை நாம் முற்றாகக் கண்டிக்கிறோம். தனிப்பட்ட உரையாடலில்கூட இவ்வாறான கருத்தைத் தெரிவிக்கக்கூடாது" என அவர் தெரிவித்தார்.

சட்டத்தை நிலைநாட்டுவதாகக் கூறும் அரசாங்கம், அதனை முதலில் தனது பிரதிநிதிகளிடமிருந்தே நடைமுறைப்படுத்த வேண்டும் என்றும் அமைச்சர் சுட்டிக்காட்டினார்.

"சட்டத்தைச் சீர்செய்கிறோம் என்று கூறுவதன் அர்த்தம், முதலில் எம்மிடமிருந்தே அதனை நடைமுறைப்படுத்துவதுதான். பொதுமக்கள் பரிசுப் பொதிகளையும் அன்பளிப்புகளையும் வழங்க வேண்டும் என்று கூறுவது தவறானது" என அவர் தெரிவித்தார்.

இந்தச் சம்பவம் தொடர்பில் மேயருக்கு எதிராக ஒழுக்காற்று நடவடிக்கை எடுக்க முன்மொழியப்பட்டுள்ளதாகவும் அமைச்சர் உறுதிப்படுத்தினார்.

மேலும், ரஞ்சன் ஜயலால் தனது கருத்தை பகிரங்கமாக வெளியிட்டுள்ளதால், அதனைத் தவறு எனப் பகிரங்கமாக ஒப்புக்கொண்டு, ஊடகங்கள் முன்னிலையில் தனது கருத்தைத் திருத்திக்கொள்ள வேண்டும் என்றும் அவர் வலியுறுத்தினார்.

கட்சியின் ஒழுக்க விதிகளை மீறியமைக்காக ஏற்கனவே பலர் கட்சியிலிருந்து நீக்கப்பட்டுள்ளதாகக் குறிப்பிட்ட அமைச்சர், இந்தச் சம்பவம் கட்சி உறுப்பினர்கள் மற்றும் அரச அதிகாரிகள் அனைவருக்கும் ஒரு எச்சரிக்கையாக அமைய வேண்டும் என்றும் தெரிவித்தார்.

"எனது தனிப்பட்ட நிலைப்பாடு என்னவென்றால், அவருக்கு எதிராக ஒழுக்காற்று நடவடிக்கை எடுக்கப்பட வேண்டும். அத்துடன், தான் வெளியிட்ட கருத்து தவறானது என்பதை அவர் பகிரங்கமாக ஏற்றுக்கொள்ள வேண்டும்" எனவும் அமைச்சர் கூறினார்.

அரசியல் கட்சி உறுப்பினர்களோ அல்லது அரச அதிகாரிகளோ இவ்வாறான கருத்துகளைப் பகிரங்கமாகவோ தனிப்பட்ட முறையிலோ தெரிவிக்கக்கூடாது என்றும், இத்தகைய கோரிக்கைகளைப் பொதுமக்கள் ஏற்றுக்கொள்ளக்கூடாது என்றும் அவர் மேலும் வலியுறுத்தினார்.

சர்ச்சைக்குரிய கருத்து வெளியான பின்னணி

கடந்த 08ஆம் திகதி ஞாயிற்றுக்கிழமை, மாலபே அரங்கல பகுதியில் கால்வாய்களின் கரைகளைப் பலப்படுத்தும் பணிகள் தொடர்பான நிகழ்வில் கலந்துகொண்டு உரையாற்றியபோதே கடுவெல மாநகர சபை மேயர் ரஞ்சன் ஜயலால் சர்ச்சைக்குரிய கருத்தை வெளியிட்டிருந்தார்.

இதன்போது, பண்டிகைக் காலங்களில் மாநகர சபை உள்ளிட்ட அரச நிறுவனங்களின் ஊழியர்களுக்குத் தனியார் நிறுவனங்கள் பரிசுப் பொதிகள் மற்றும் அன்பளிப்புகளை வழங்கும் வழக்கத்தைத் தொடர்ந்து முன்னெடுக்க வேண்டும் என அவர் கோரிக்கை விடுத்திருந்தார்.

குறிப்பாக, டிசம்பர் மாதத்தில் அரச நிறுவனங்களின் ஊழியர்களுக்கு உணவுப் பொருட்கள், பானங்கள் மற்றும் ஏனைய பொருட்களைப் பரிசாக வழங்கும் வழக்கத்தைக் கொண்ட நிறுவனங்கள் அதனைத் தொடர்ந்து முன்னெடுக்க வேண்டும் எனவும் அவர் தெரிவித்திருந்தார்.

இந்தக் கருத்தே தற்போது அரசியல் மட்டத்தில் சர்ச்சையை ஏற்படுத்தியுள்ளதுடன், அமைச்சர் சுனில் ஹந்துன்னெத்தி அதற்கு கடும் எதிர்ப்பை வெளியிட்டுள்ளார்.