‘டோரதி’ திரைப்பட கதைத் திருட்டு: இயக்குநர் கார்த்திக் சுப்புராஜ் மீது புகார்!

தான் இயக்கிய குறும் படத் திரைப்படத்தின் கதையைத் திருடி ‘டோரதி’ என்ற திரைப்படத்தை உருவாக்கியதாக, பிரபல திரைப்பட இயக்குநர் கார்த்திக் சுப்புராஜ் மற்றும் அத்திரைப்படத்தின் தயாரிப்பு நிறுவனத்திற்கு எதிராக மதுரை மாநகர காவல் ஆணையாளர் அலுவலகத்தில் குற்றவியல் புகார் ஒன்று பதிவு செய்யப்பட்டுள்ளது.

‘மதுரை மைந்தன்’ என்ற பெயரில் அறியப்படும் குறும்பட இயக்குநர் முகமது செரிப் என்பவரே இப் புகாரை அளித்துள்ளார்.

அவர் சமர்ப்பித்துள்ள புகார் மனுவில் தெரிவிக்கப்பட்டுள்ளதாவது:

"கொரோனா (Covid-19) பெருந்தொற்று காலத்தில் திருநங்கைகளின் வாழ்வியலை அடிப்படையாகக் கொண்டு 3 நிமிடங்கள் கொண்ட ‘டாட் நங்கை’ எனும் குறுந்திரைப்படத்தை நான் தயாரித்திருந்தேன். சமூக வலைத்தளங்களில் (Social Media) வெளியிடப்பட்ட இக் குறும்படம் பெருமளவிலான பார்வையாளர்களின் கவனத்தைப் பெற்றிருந்தது. தொடர்ச்சியாக, இக் கதைக் கருவை முழுநீளத் திரைப்படமாக உருவாக்கும் முயற்சியில் நான் ஈடுபட்டிருந்த வேளையில், சில காரணங்களால் அப்பணிகளில் தாமதம் ஏற்பட்டது.

இந்நிலையில், அண்மையில் திரைக்கு வந்த இயக்குநர் கார்த்திக் சுப்புராஜின் ‘டோரதி’ திரைப்படத்தைப் பார்த்த சிலர், அப் படத்தின் கதைக் கரு எனது குறும்படத்தை ஒத்திருப்பதாகத் தெரிவித்தனர். அதனைத் தொடர்ந்து அத்திரைப்படத்தைப் பார்வையிட்டபோது, எனது முன் அனுமதியோ அல்லது முறையான உரிமங்களோ இன்றி எனது கதைக் கருவை முழுமையாகப் பயன்படுத்தி ‘டோரதி’ திரைப்படம் இயக்கப்பட்டிருப்பது உறுதி செய்யப்பட்டது. எனவே, இது குறித்து மேற்படி திரைப்பட இயக்குநர் மற்றும் தயாரிப்பு நிறுவனத்திற்கு எதிராகச் சட்டப்பூர்வமான கடுமையான நடவடிக்கைகள் மேற்கொள்ளப்பட வேண்டும்" எனக் குறிப்பிட்டுள்ளார்.

மேலும், இப் பிரச்சினை தொடர்பாக அவர் கருத்துத் தெரிவிக்கையில், "‘டோரதி’ திரைப்படத்தின் இறுதிக் காட்சிகள் எனது குறும்படத்துடன் முற்றிலும் ஒத்துப்போகின்றன. மேலும், எனது குறும்படத்திலே நடித்த மதுரையைச் சேர்ந்த ஒரு பெண்ணே இத் திரைப்படத்திலும் நடிக்க வைக்கப்பட்டுள்ளார். எனது படைப்பிற்கான உரிய அங்கீகாரமும் நீதியும் எனக்குக் கிடைக்க வேண்டும். காவல்துறை தரப்பில் தகுந்த நடவடிக்கை எடுக்கத் தவறும்பட்சத்தில், நீதிமன்றத்தை நாடி சட்டப் போராட்டம் நடத்துவேன்" எனத் தெரிவித்தார்.