ஜோர்டானில் இலங்கைத் தூதரகத்திற்கு வெளியே பயங்கரவாதத் தாக்குதல் – பாதுகாப்பு அதிகாரி பலி!

ஜோர்டான் தலைநகர் அம்மானில் அமைந்துள்ள இலங்கைத் தூதரகத்திற்கு வெளியே நடத்தப்பட்ட பயங்கரவாதத் தாக்குதலில் அந்நாட்டு பாதுகாப்புப் படை அதிகாரி ஒருவர் உயிரிழந்துள்ளார்.

இந்தச் சம்பவம் வியாழக்கிழமை (05) பிற்பகல் சுமார் 12.20 மணியளவில் இடம்பெற்றதாக இலங்கைத் தூதரகம் உறுதிப்படுத்தியுள்ளது.

தூதரகக் கட்டடத்திற்கு அருகில் பாதுகாப்புப் பணியில் ஈடுபட்டிருந்த அதிகாரி மீது, கூரிய ஆயுதத்துடன் வந்த நபர் ஒருவர் திடீர் தாக்குதலை நடத்தியுள்ளார்.

இந்தத் தாக்குதலில் படை கோப்ரல் ஜவாத் அலி கலஃப் அல்-சலைத்தா (Jawad Ali Khalaf Al-Salaita) என்ற அதிகாரி உயிரிழந்துள்ளார். அவர் தனது உத்தியோகபூர்வ கடமையில் ஈடுபட்டிருந்தபோதே இந்தச் சம்பவம் இடம்பெற்றுள்ளது.

சம்பவ இடத்திற்கு விரைந்த பொலிஸார், தாக்குதலை நடத்திய சந்தேகநபரைக் கட்டுப்பாட்டுக்குள் கொண்டுவந்து கைது செய்துள்ளதாக ஜோர்டானின் பொதுப் பாதுகாப்பு இயக்குநரகம் தெரிவித்துள்ளது.

இதன்போது, சம்பவ இடத்திற்குச் சென்ற பொலிஸ் ரோந்துப் பிரிவின் பொறுப்பதிகாரி முகத்தில் காயமடைந்துள்ளார். அவர் வைத்தியசாலையில் அனுமதிக்கப்பட்டுள்ளதுடன், அவரது உடல்நிலை சீராக இருப்பதாகவும் தெரிவிக்கப்பட்டுள்ளது.

ஆரம்பகட்ட விசாரணைகளின்படி, பாதுகாப்புப் படையினரை இலக்குவைத்து தாக்குதல் நடத்துவதற்கு சந்தேகநபர் திட்டமிட்டிருந்ததாக ஜோர்டான் அதிகாரிகள் தெரிவித்துள்ளனர். இதனையடுத்து, இந்தச் சம்பவம் உத்தியோகபூர்வமாக பயங்கரவாதச் செயலாக வகைப்படுத்தப்பட்டுள்ளது.

உயிரிழந்த அதிகாரியின் துப்பாக்கியைக் கைப்பற்றுவதற்கு தாக்குதல்தாரி முயன்றதாகவும், மற்றுமொரு அதிகாரி தலையிட்டதையடுத்து அந்த முயற்சி முறியடிக்கப்பட்டதாகவும் அசோசியேட்டட் பிரஸ் (AP) செய்தி நிறுவனம், ஜோர்டான் அரச தொலைக்காட்சியை மேற்கோள்காட்டித் தெரிவித்துள்ளது.

இலங்கைத் தூதரகம் விசேட அறிவிப்பு

இந்நிலையில், இந்தச் சம்பவத்தைத் தொடர்ந்து ஜோர்டானில் உள்ள இலங்கைத் தூதரகப் பணியாளர்கள் மற்றும் இலங்கைப் பிரஜைகள் அனைவரும் பாதுகாப்பாக இருப்பதாக அம்மானிலுள்ள இலங்கைத் தூதரகம் அறிவித்துள்ளது.

உயிரிழந்த பாதுகாப்பு அதிகாரியின் குடும்பத்தினருக்கும் சக பணியாளர்களுக்கும் தூதரகம் தனது ஆழ்ந்த இரங்கலையும் தெரிவித்துள்ளது.

ஜோர்டானுக்கான இலங்கைத் தூதுவர் விஷ்வநாத் அப்பொன்சு உள்ளிட்ட தூதரக அதிகாரிகள், ஜோர்டான் பாதுகாப்புத் தரப்பினருடன் இணைந்து அங்குள்ள பாதுகாப்பு நிலைமைகளைத் தொடர்ந்து கண்காணித்து வருகின்றனர்.

இந்தத் தாக்குதல் தொடர்பான விரிவான விசாரணைகள் தற்போது முன்னெடுக்கப்பட்டு வருகின்றன.