செனாப் பாலத்தில் 100 கி.மீ வேகத்தில் இயக்கி வந்தே பாரத் ரயில் சாதனை!

உலகின் மிக உயரமான ரயில்வே இரும்பு வளைவுப் பாலமான செனாப் பாலத்தின் மீது, 'வந்தே பாரத்' எக்ஸ்பிரஸ் ரயிலை மணிக்கு 100 கிலோமீட்டர் வேகத்தில் இயக்கி வடக்கு ரயில்வே புதிய சாதனை படைத்துள்ளது.

ஜம்மு-காஷ்மீரின் செனாப் ஆற்றிலிருந்து 359 மீட்டர் உயரத்தில் அமைந்துள்ள இந்த ரயில் பாலம், கடுமையான நிலநடுக்கம் மற்றும் பலத்த புயல் காற்றையும் தாங்கும் அதிநவீன தொழில்நுட்பத்துடன் வடிவமைக்கப்பட்டுள்ளது.

ஸ்ரீ மாதா வைஷ்ணவ தேவி கத்ரா ரயில் நிலையத்திலிருந்து ஸ்ரீநகர் வரையிலான வந்தே பாரத் எக்ஸ்பிரஸ் ரயில் சேவையை இந்தியப் பிரதமர் நரேந்திர மோடி கடந்த ஆண்டு முறைப்படி தொடங்கி வைத்திருந்தார்.

வேகச் சோதனை வெற்றி

இந்நிலையில், இந்த வழித்தடத்தில் ரயில்களின் வேகத்தை அதிகரிக்கும் பொருட்டு சிறப்பு சோதனை ஓட்டம் நடத்தப்பட்டது. இது குறித்து வடக்கு கோட்ட ரயில்வேயின் மூத்த வணிக மேலாளர்  உச்சிகத் சிங்கால் தெரிவிக்கையில்:

"வடக்கு ரயில்வேயின் ஜம்மு கோட்டத்திற்கு உட்பட்ட 'ஸ்ரீ மாதா வைஷ்ணவ தேவி கத்ரா – பனிஹால்' ரயில் பிரிவில் ரயில்களின் வேகத்தை அதிகரிக்கும் சோதனைகள் வெற்றிகரமாக மேற்கொள்ளப்பட்டன.

இச்சோதனையின் போது, வந்தே பாரத் எக்ஸ்பிரஸ் ரயில் உலகின் மிக உயரமான செனாப் பாலத்தையும், இந்தியாவின் முதல் கேபிள் மூலம் தாங்கப்படும் ரயில்வே பாலமான 'அஞ்சி பாலத்தையும்' (Anji Khad Bridge) மணிக்கு 100 கி.மீ வேகத்தில் கடந்து புதிய மைல்கல்லை எட்டியுள்ளது" எனக் குறிப்பிட்டார்.

இந்த அதிவேக சோதனை ஓட்டம் வெற்றியடைந்துள்ளதைத் தொடர்ந்து, கத்ரா மற்றும் பனிஹால் இடையிலான ரயில் பயண நேரம் கணிசமாகக் குறையும் என எதிர்பார்க்கப்படுகிறது.