சூரியசக்தித் துறையில் 16 பில்லியன் $ முதலீடு: இந்தியாவிற்கு அமெரிக்கா விதிக்கும் புதிய வரிச் சவால்!
இந்தியாவின் சூரியசக்தி உபகரணங்கள் உற்பத்தித் துறை, 2025 ஆம் ஆண்டின் தொடக்கத்திலிருந்து இதுவரை 16 பில்லியன் அமெரிக்க டொலர்கள் (US$16 billion) முதலீட்டை ஈர்த்துள்ளதாக ‘பிசினஸ்லைன்’ (BusinessLine) செய்தி வெளியீடு தெரிவித்துள்ளது. 'ரோடியம் குரூப்' (Rhodium Group) அறிக்கை ஒன்றை மேற்கோள்காட்டி இந்தத் தகவல் வெளியிடப்பட்டுள்ளது.
இதில், 2026 ஆம் ஆண்டின் முதலாவது அரையாண்டில் மட்டும் 4 பில்லியன் அமெரிக்க டொலர்கள் முதலீடு செய்யப்பட்டுள்ளமை குறிப்பிடத்தக்கது.
உள்நாட்டிலேயே தயாரிக்கப்பட்ட சூரியசக்தி உபகரணங்களையே பயன்படுத்த வேண்டும் என்ற இந்திய அரசின் கட்டாய விதிமுறைகள், இந்த உற்பத்தி விரிவாக்கத்திற்குப் பெரும் ஊக்கமளித்துள்ளன. இதன் பயனாக, இந்தியாவின் சூரியசக்தி தொகுதிகள் உற்பத்தித் திறன் 242.7 கிகாவாட் (GW) ஆகவும், மின்கலங்கள் (Solar cells) உற்பத்தித் திறன் 40.5 கிகாவாட் (GW) ஆகவும் வளர்ச்சி கண்டுள்ளன. மேலும், 40 கிகாவாட் (GW) அளவிலான மின்கல உற்பத்தித் திறனைப் புதிதாகக் கட்டியெழுப்ப நடவடிக்கைகள் மேற்கொண்டு வரப்படுகின்றன.
இருப்பினும், அமெரிக்காவின் வர்த்தகக் கட்டுப்பாட்டு நடவடிக்கைகள் இந்திய உற்பத்தியாளர்களுக்குப் புதிய சவாலாக உருவெடுத்துள்ளன. இந்தியாவில் இருந்து இறக்குமதி செய்யப்படும் சூரியசக்தி உபகரணங்களுக்கு 123.04 சதவீதக் குவிப்பு எதிர்ப்பு வரியையும் (Anti-dumping margin), 107.17 சதவீத ஈடுசெய் வரியையும் அமெரிக்கா முன்மொழிந்துள்ளது. இந்த இறக்குமதிகள் அமெரிக்க உற்பத்தியாளர்களுக்குப் பொருள் ரீதியான பாதிப்பை ஏற்படுத்தியுள்ளனவா என்பதை அமெரிக்க சர்வதேச வர்த்தக ஆணைக்குழு இன்னும் உத்தியோகபூர்வமாக உறுதிப்படுத்த வேண்டியுள்ளது.
கடந்த ஆண்டில் மட்டும் இந்தியச் சூரியசக்தி ஏற்றுமதி மூலமாக அமெரிக்காவிலிருந்து சுமார் 1.2 பில்லியன் அமெரிக்க டொலர்கள் ஈட்டப்பட்டுள்ளன. தற்போதைய சூழ்நிலையில், இந்திய உற்பத்தியாளர்கள் நாட்டின் வேகமாக வளர்ந்து வரும் உள்நாட்டுச் சந்தையை அதிகளவில் நம்பியிருக்க வேண்டிய நிலை ஏற்படலாம் என்றும், சில நிறுவனங்கள் அமெரிக்காவிலேயே நேரடியாகத் உற்பத்தி நிலையங்களை அமைப்பது குறித்து பரிசீலித்து வருவதாகவும் அச்செய்தி குறிப்பில் மேலும் தெரிவிக்கப்பட்டுள்ளது.
