சிவராசா அனோஜன் விடுதலை: ஜம்இய்யத்துல் உலமா சபையின் பொதுச்செயலாளருடன் சாணக்கியன் சந்திப்பு!
சவூதி அரேபியாவில் சிறைவைக்கப்பட்டுள்ள இலங்கைத் தமிழரான சிவராசா அனோஜனின் விடுதலையை உறுதிசெய்வதற்காக சாத்தியமான அனைத்து வழிகளிலும் ஆதரவைத் திரட்டுவது அனைவரினதும் கூட்டுப் பொறுப்பாகும் என இலங்கைத் தமிழ் அரசுக் கட்சியின் (ITAK) நாடாளுமன்ற உறுப்பினர் சாணக்கியன் இராசமாணிக்கம் தெரிவித்துள்ளார்.
அகில இலங்கை ஜம்இய்யத்துல் உலமா சபையின் (ACJU) பொதுச்செயலாளர் அஷ்ஷைக் அர்கம் நூராமித் , சிவராசா அனோஜனின் விடுதலையைப் பெற்றுக்கொள்வதற்கு முழுமையான ஒத்துழைப்பை வழங்குவதாகத் தமக்கு உறுதியளித்துள்ளதாகவும் அவர் குறிப்பிட்டுள்ளார்.
சவூதி அரேபிய ராஜ்யத்தின் 96ஆவது தேசிய தினத்தைக் குறிக்கும் வகையில், இலங்கையிலுள்ள சவூதி அரேபிய தூதரகத்தினால் ஏற்பாடு செய்யப்பட்டிருந்த சிறப்பு வரவேற்பு உபசார நிகழ்வில் கலந்துகொண்டபோதே, நாடாளுமன்ற உறுப்பினர் சாணக்கியன் அகில இலங்கை ஜம்இய்யத்துல் உலமா சபையின் பொதுச்செயலாளரைச் சந்தித்து இது தொடர்பில் கலந்துரையாடியுள்ளார்.
இலங்கைக்கான சவூதி அரேபிய தூதரகத்தின் தற்காலிக தூதுவர் யாசிர் அப்துல்ரஹ்மான் அல்-ஹஸ்மி விடுத்த அழைப்பின் பேரிலேயே சாணக்கியன் இந்நிகழ்வில் பங்கேற்றிருந்தார்.
இதனைத் தொடர்ந்து தமது உத்தியோகபூர்வ முகநூல் (Facebook) பக்கத்தில் பதிவொன்றை வெளியிட்ட நாடாளுமன்ற உறுப்பினர், சிவராசா அனோஜனை விடுவிப்பதற்கான முயற்சியில் கிடைக்கப்பெறும் ஒவ்வொரு சிறிய ஆதரவும் மிகவும் தீர்க்கமானது என்றும், அனைத்துத் தரப்பினரின் ஒத்துழைப்புடன் இந்த விவகாரத்தில் தீவிரமாகச் செயற்பட வேண்டியதன் அவசியத்தையும் வலியுறுத்தியுள்ளார்.
