சர்வதேச நீதிக்காக போராடிய நவநீதம் பிள்ளைக்கு அமைதிக்கான நோபல் பரிசு

சர்வதேச நீதி மற்றும் மனித உரிமைகளுக்காக ஆற்றிய வரலாற்றுச் சிறப்புமிக்க சேவைகளைப் பாராட்டி, தென்னாப்பிரிக்காவின் மனித உரிமைகள் வழக்கறிஞரும் ஐக்கிய நாடுகள் சபையின் முன்னாள் மனித உரிமைகள் உயர்ஸ்தானிகருமான நவநீதம் பிள்ளை (Navanethem "Navi" Pillay) அவர்களுக்கு 2026 ஆம் ஆண்டிற்கான அமைதிக்கான நோபல் பரிசு வழங்கி கௌரவிக்கப்பட்டுள்ளது.

1941 ஆம் ஆண்டு தென்னாப்பிரிக்காவின் டர்பன் நகரில் இந்திய வம்சாவளி குடும்பத்தில் பிறந்த நவநீதம் பிள்ளை, நிறவெறி ஆட்சியின் கீழ் வளர்ந்தவர். தென்னாப்பிரிக்காவில் சட்டம் பயின்று வழக்கறிஞரான முதல் இந்திய வம்சாவளி பெண்களில் ஒருவரான இவர், நிறவெறி எதிர்ப்பாளர்களின் உரிமைகளுக்காகப் போராடியதுடன், சிறைகளில் நிலவிய இனப்பாகுபாடுகளுக்கு எதிராகவும் சட்டப் போராட்டம் நடத்தினார்.

தென்னாப்பிரிக்காவில் நிறவெறி ஆட்சி முடிவுக்கு வந்ததைத் தொடர்ந்து, ருவாண்டாவுக்கான சர்வதேச குற்றவியல் தீர்ப்பாயத்தின் நீதிபதியாகப் பணியாற்றினார். அங்கு பாலியல் வன்முறையை இனப்படுகொலையின் (Genocide) ஒரு அங்கமாகக் கருதும் வரலாற்றுச் சிறப்புமிக்க சட்டப் பூர்வத் தீர்ப்பை வழங்குவதில் இவரது பங்களிப்பு மிக முக்கியத்துவமுடையதாக அமைந்தது. அதனைத் தொடர்ந்து, சர்வதேச குற்றவியல் நீதிமன்றத்தின் நீதிபதியாகவும், 2008 முதல் 2014 ஆம் ஆண்டு வரை ஐக்கிய நாடுகள் சபையின் மனித உரிமைகள் உயர்ஸ்தானிகராகவும் அவர் கடமையாற்றினார்.

இலங்கையின் மனித உரிமைகள் குறித்த சர்வதேச விவாதங்கள் மற்றும் கண்காணிப்புகளில் நவநீதம் பிள்ளை முதன்மையான பங்கு வகித்துள்ளார்.

கடந்த 2013 ஆம் ஆண்டு இலங்கைக்கு விஜயம் மேற்கொண்ட அவர், அரசாங்க அதிகாரிகள், சிவில் சமூகப் பிரதிநிதிகள் மற்றும் மனித உரிமைப் போராளிகளைச் சந்தித்துப் கலந்துரையாடினார். இதன் போது, யுத்த காலத்தில் இடம்பெற்றதாகக் கூறப்படும் மனித உரிமை மீறல்களுக்கான பொறுப்புக்கூறல் , ஊடகவியலாளர்கள் மற்றும் செயற்பாட்டாளர்கள் அச்சுறுத்தப்படுதல், மற்றும் சட்டத்தின் ஆட்சி (Rule of Law) ஆகியவை குறித்துத் தனது தீவிர கவலையை வெளிப்படுத்தியிருந்தார்.

அண்மைக்காலமாக, இஸ்ரேல் மற்றும் பாலஸ்தீனப் பிராந்தியங்களில் இடம்பெற்ற மனித உரிமை மீறல்கள் குறித்து விசாரணை நடத்தும் ஐக்கிய நாடுகள் சபையின் விசாரணை ஆணைக்குழுவின் தலைவராகவும் இவர் பணியாற்றி வந்தமை குறிப்பிடத்தக்கது.