கிரிஷ் வழக்கு: நாமல் ராஜபக்ஷவின் விளக்கமறியல் நீடிப்பு!

இந்தியாவின் ‘கிரிஷ்’சொத்து அபிவிருத்தி நிறுவனத்துடன் தொடர்புடைய நிதி மோசடி மற்றும் லஞ்ச குற்றச்சாட்டுகள் குறித்த விசாரணைகள் தொடர்பாக, ஸ்ரீலங்கா பொதுஜன பெரமுனவின் (SLPP) நாடாளுமன்ற உறுப்பினர் நாமல் ராஜபக்ஷ மற்றும் கிரிஷ் நிறுவனத்தின் முன்னாள் பணிப்பாளர் ஜானகி சிறிவர்தன ஆகிய இருவரையும் எதிர்வரும் ஒக்டோபர் 16ஆம் திகதி வரை மீண்டும் விளக்கமறியலில் வைக்குமாறு கொழும்பு தலைமை பிரதான நீதிவான் அசங்க எஸ். போதரகம இன்று (06) உத்தரவிட்டுள்ளார்.

இலஞ்சம் அல்லது ஊழல் பற்றிய குற்றச்சாட்டுகளை புலனாய்வு செய்வதற்கான ஆணைக்குழு (CIABOC) சமர்ப்பித்த அறிக்கைகளை பரிசீலித்த பின்னரே தலைமை பிரதான நீதிவான் இந்த உத்தரவைப் பிறப்பித்தார்.

அத்துடன், சந்தேகநபர்கள் இருவரும் தாக்கல் செய்துள்ள பிணை மனுக்கள் மீதான தீர்ப்பு எதிர்வரும் ஒக்டோபர் 16ஆம் திகதி வழங்கப்படும் என்றும் தலைமை பிரதான நீதிவான் அறிவித்துள்ளார்.

கொழும்பு கோட்டை, 'ட்ராான்ஸ்வேர்க்ஸ் சதுக்கம்' (Transworks Square) காணிக் கொள்வனவு நடவடிக்கையை எளிதாக்குவதற்கும், குறித்த திட்டத்திற்கான அனுமதிகளை விரைவாகப் பெற்றுக்கொடுப்பதற்கும் உதவியாக நாமல் ராஜபக்ஷவுக்கு 70 மில்லியன் ரூபாய் லஞ்சமாக வழங்கப்பட்டதாகக் கூறப்படும் குற்றச்சாட்டு தொடர்பிலேயே விசாரணைகள் இடம்பெற்று வருகின்றன.

இந்த நிதி முறைகேடு மற்றும் லஞ்சக் குற்றச்சாட்டுகள் தொடர்பான விசாரணைகளின் பின்னணியில் நாமல் ராஜபக்ஷ மற்றும் ஜானகி சிறிவர்தன ஆகியோர் தற்போது விளக்கமறியலில் வைக்கப்பட்டுள்ளனர்.

சமீபத்தில், இந்த வழக்கின் நான்காவது சந்தேகநபராக நாமல் ராஜபக்ஷ பெயரிடப்பட்டிருந்தார் என்பதும் குறிப்பிடத்தக்கது.