கல்விச் சான்றிதழ் சர்ச்சை: இந்தோனேசிய துணை ஜனாதிபதி பதவி விலகல்
இந்தோனேசியாவின் துணை ஜனாதிபதி கிப்ரான் ரகபுமிங் ராகா தனது பதவியை இராஜினாமா செய்துள்ளதாக அறிவிக்கப்பட்டுள்ளது. அவரது உயர்தரக் கல்விச் சான்றிதழ் தொடர்பில் நீதிமன்றங்கள் வழங்கிய தீர்ப்புகளைத் தொடர்ந்து ஏற்பட்ட சர்ச்சைகளுக்கு மத்தியில் இந்த இராஜினாமா இடம்பெற்றுள்ளது.
இந்தோனேசிய மக்கள் ஆலோசனைக் கூட்டமைப்பின் (MPR) சபாநாயகர் அஹ்மத் முசானி இதனைத் தெரிவித்ததாக குறிப்பிடப்பட்டுள்ளது.
கிப்ரான் ரகபுமிங் ராகா தனது இராஜினாமா கடிதத்தை இன்று சமர்ப்பித்துள்ளதாகவும், அதனைப் பரிசீலிப்பதற்கான நடைமுறைகள் MPR ஊடாக முன்னெடுக்கப்படும் எனவும் அவர் தெரிவித்துள்ளார். இந்தச் செயல்முறையை நிறைவு செய்ய 60 நாட்கள் வரை செல்லலாம் எனவும் குறிப்பிடப்பட்டுள்ளது.
முன்னாள் ஜனாதிபதி ஜோகோ விடோடோவின் 39 வயதுடைய மகனான கிப்ரான், தனது கல்வித் தகைமை தொடர்பான சர்ச்சைகளைத் தொடர்ந்து கடந்த சில வாரங்களாகப் பதவி விலக வேண்டும் என்ற கோரிக்கைகளை எதிர்கொண்டு வந்தார்.
கடந்த ஒக்டோபர் மாதம் இந்தோனேசிய அரசியலமைப்பு நீதிமன்றம், அரசியலமைப்புச் சட்டத்தின்படி அரசுப் பதவிக்குப் போட்டியிடுவதற்குத் தேவையான உயர்தரக் கல்விச் சான்றிதழை அவர் பெற்றிருந்தார் என்பதற்குப் போதுமான ஆதாரங்கள் இல்லை எனத் தெரிவித்திருந்தது.
இதனைத் தொடர்ந்து, அவர் பெற்றிருந்த உயர்தரக் கல்விக்கு இணையான தகுதிச் சான்றிதழ் செல்லுபடியாகாது என உச்ச நீதிமன்றமும் தீர்ப்பளித்திருந்தது.
இதற்கிடையில், ஜனாதிபதி பிரபோவோ சுபியாந்தோவை செவ்வாய்க்கிழமை சந்தித்த பின்னர் கருத்துத் தெரிவித்த கிப்ரான், பொதுமக்களின் விமர்சனங்களையும் கருத்துக்களையும் மதிப்பதாகக் கூறியிருந்தார்.
"தற்போதைய நிலைமை நீண்டகால அரசியல் சர்ச்சையாக மாறுவதை நான் விரும்பவில்லை" எனவும் அவர் குறிப்பிட்டிருந்தார்.
கிப்ரானை பதவியிலிருந்து நீக்குமாறு கோரி 120 இற்கும் மேற்பட்ட அரசியல்வாதிகள் கையெழுத்திட்ட மனு தொடர்பில் இந்தோனேசிய நாடாளுமன்றம் ஆராயவிருந்த நிலையில், அதற்கு சில மணித்தியாலங்களுக்கு முன்னதாகவே அவரது இராஜினாமா கடிதம் சமர்ப்பிக்கப்பட்டுள்ளது.
அரசியல் அதிகாரப் போட்டி தீவிரம்
கிப்ரானின் இராஜினாமா, தற்போதைய ஜனாதிபதி பிரபோவோ சுபியாந்தோவுக்கும் முன்னாள் ஜனாதிபதி ஜோகோ விடோடோவுக்கும் இடையிலான அரசியல் முரண்பாடுகள் அதிகரித்து வரும் சூழலில் இடம்பெற்றுள்ளது.
முன்னாள் ஜனாதிபதி ஜோகோ விடோடோவின் ஆதரவுடன், அவருக்கு முன்னர் அரசியல் போட்டியாளராக இருந்த பிரபோவோவுடன் இணைந்து கிப்ரான் தேர்தலில் போட்டியிட்டார். இந்தக் கூட்டணி தேர்தலில் அமோக வெற்றியைப் பெற்று ஆட்சியைக் கைப்பற்றியது.
எனினும், அண்மைக்காலமாக இந்த அரசியல் கூட்டணிக்குள் விரிசல்கள் ஏற்பட்டுள்ளதாகக் கூறப்படுகிறது.
கடந்த வாரம் இந்தோனேசியாவின் முன்னாள் பொலிஸ் மா அதிபர் லிஸ்டியோ சிகிட் பிரபோவோ உள்ளிட்ட பல சிரேஷ்ட பொலிஸ் அதிகாரிகள், ஜனாதிபதி உள்ளிட்ட முக்கிய பிரமுகர்களின் தொலைபேசி உரையாடல்களை ஒட்டுக்கேட்டதாகக் கூறப்படும் குற்றச்சாட்டின் பேரில் தடுத்து வைக்கப்பட்டனர்.
முன்னாள் பொலிஸ் மா அதிபர் ஜோகோ விடோடோவின் முக்கிய அரசியல் ஆதரவாளராகக் கருதப்படுகிறார்.
இந்தக் குற்றச்சாட்டுகள் தொடர்பான விசாரணைகள் தொடர்ந்து முன்னெடுக்கப்பட்டு வரும் நிலையில், இவை "தேசத்துரோகச் செயல்களின் வகைக்குள் அடங்கக்கூடிய நடவடிக்கைகள்" என ஜனாதிபதியின் பேச்சாளர் ஒருவர் வர்ணித்துள்ளார்.
மறுபுறம், கிப்ரானின் கல்வித் தகைமை தொடர்பான வழக்கைத் தாக்கல் செய்தவர்கள், ஜனாதிபதித் தேர்தலுக்கு முன்னதாக அவர் சமர்ப்பித்த கல்வி ஆவணங்கள் ஏற்றுக்கொள்ளப்படக் கூடாதவை எனத் தெரிவித்துள்ளனர்.
அவர் சமர்ப்பித்த ஆவணம் உயர்தரச் சித்தி அல்லது பட்டமளிப்புச் சான்றிதழ் அல்ல என்றும், சிட்னியில் அமைந்துள்ள UTS கல்லூரியில் (முன்னர் UTS Insearch என அழைக்கப்பட்டது) பெற்ற வருகைப் பதிவுச் சான்றிதழ் மற்றும் கல்விப் பெறுபேற்று அறிக்கையின் அடிப்படையில் இந்தோனேசிய கல்வி அமைச்சினால் வழங்கப்பட்ட ஆதரவுக் கடிதம் மட்டுமே என்றும் மனுதாரர்கள் சுட்டிக்காட்டியுள்ளனர்.
இதற்கிடையில், அரசாங்கத்தின் கொள்கைகள் மற்றும் காட்டுத்தீயைக் கையாளும் விதம் தொடர்பில் இந்தோனேசியாவின் பல நகரங்களில் போராட்டங்கள் இடம்பெற்று வரும் சூழலிலும் துணை ஜனாதிபதியின் இராஜினாமா அறிவிக்கப்பட்டுள்ளது.
