கட்டுப்பாடுகள் விதிக்கப்பட்டாலும் E&Y நிறுவனத்துக்கு வங்கிகளின் கணக்காய்வை மேற்கொள்ள அனுமதி – மத்திய வங்கி விளக்கம்

இலங்கையின் தேசிய அபிவிருத்தி வங்கியில் (NDB) இடம்பெற்ற பாரிய நிதி மோசடி தொடர்பாக, கணக்காய்வு பங்காளர்கள் இருவருக்கு கட்டுப்பாடுகள் விதிக்கப்பட்டுள்ள போதிலும், Ernst & Young (E&Y) நிறுவனத்துக்கு இலங்கையில் உரிமம் பெற்ற வங்கிகளின் கணக்காய்வுப் பணிகளை மேற்கொள்ளத் தொடர்ந்து தகுதி உள்ளதாக இலங்கை மத்திய வங்கி (CBSL) தெரிவித்துள்ளது.

இது தொடர்பாக செவ்வாய்க்கிழமை (10) வெளியிட்ட அறிக்கையிலேயே மத்திய வங்கி இந்தத் தெளிவுபடுத்தலை வழங்கியுள்ளது.

NDB வங்கியின் நிதிநிலை அறிக்கைகளைக் கணக்காய்வு செய்த பணியில் ஈடுபட்ட Engagement Partner மற்றும் Quality Assurance Partner ஆகிய இருவரையும், இலங்கையில் உரிமம் பெற்ற வங்கிகளுக்கான கணக்காய்வுப் பணிகளில் நியமிக்க வேண்டாம் என E&Y நிறுவனத்திடம் கோரியுள்ளதாக மத்திய வங்கி தெரிவித்துள்ளது.

எனினும், இந்தக் கட்டுப்பாடு E&Y நிறுவனத்தின் கணக்காய்வுத் தகுதியைப் பாதிக்காது எனவும், 1988 ஆம் ஆண்டின் 30 ஆம் இலக்க வங்கிகள் சட்டத்தின் கீழ், இலங்கையில் உரிமம் பெற்ற வங்கிகளின் கணக்காய்வை மேற்கொள்ள அந்நிறுவனம் தொடர்ந்து அங்கீகரிக்கப்பட்டுள்ளதாகவும் மத்திய வங்கி வலியுறுத்தியுள்ளது.

இந்தத் தெளிவுபடுத்தல், NDB வங்கியில் இந்த ஆண்டு ஆரம்பத்தில் வெளிப்படுத்தப்பட்ட பாரிய நிதி மோசடி தொடர்பான விசாரணைகள் மற்றும் அதன் தொடர்ச்சியான நடவடிக்கைகளுக்கு மத்தியில் வெளியாகியுள்ளது.

கடந்த ஏப்ரல் மாதம் NDB வங்கி ஆரம்பத்தில் வெளியிட்ட அறிவிப்பில், இந்த மோசடியால் சுமார் 13.2 பில்லியன் ரூபா இழப்பு ஏற்பட்டுள்ளதாகத் தெரிவிக்கப்பட்டிருந்தது.

எனினும், Deloitte Touche Tohmatsu India LLP நிறுவனத்தினால் மேற்கொள்ளப்பட்ட சுயாதீன தடயவியல் விசாரணையைத் தொடர்ந்து, மோசடியுடன் தொடர்புடைய பரிவர்த்தனைகளின் மொத்தப் பெறுமதி சுமார் 13.64 பில்லியன் ரூபா என மதிப்பிடப்பட்டது.

கடந்த செப்டம்பர் மாதம் வெளியிடப்பட்ட விசாரணை அறிக்கையின்படி, பல்வேறு நிதியாண்டுகளை உள்ளடக்கிய வகையில் இந்த மோசடி இடம்பெற்றுள்ளதுடன், 2025 ஆம் ஆண்டில் மாத்திரம் 9.62 பில்லியன் ரூபா பெறுமதியான மோசடிப் பரிவர்த்தனைகள் இடம்பெற்றுள்ளதாகக் கண்டறியப்பட்டுள்ளது.

வங்கியின் சில ஊழியர்கள் வெளித் தரப்பினருடன் இணைந்து இந்த மோசடியில் ஈடுபட்டதாக NDB முன்னதாகத் தெரிவித்திருந்தது.

மேலும், வங்கியின் உள்கட்டுப்பாட்டு நடைமுறைகள், பரிவர்த்தனைகளைக் கண்காணித்தல், கணக்குகளைச் சரிபார்த்தல் மற்றும் நிர்வாகக் கட்டமைப்பு ஆகியவற்றில் காணப்பட்ட பலவீனங்களையும் தடயவியல் விசாரணை சுட்டிக்காட்டியுள்ளது.

எவ்வாறாயினும், இந்தச் சம்பவத்தால் வாடிக்கையாளர்களின் வங்கிக் கணக்குகளுக்கோ வைப்புகளுக்கோ பாதிப்பு ஏற்படவில்லை என NDB வங்கி தெரிவித்துள்ளது.

இந்த மோசடி வெளிப்படுத்தப்பட்டதைத் தொடர்ந்து, வங்கியின் நிதிநிலைமை மற்றும் ஒழுங்குமுறை விதிகளுக்கு இணங்கிச் செயற்படுகின்றமை தொடர்பில் மத்திய வங்கி தொடர்ந்தும் கண்காணித்து வருகின்றது.