2027ஆம் ஆண்டுக்கான மாகாண சபைகளின் நிதி ஒதுக்கீடு – நிதி ஆணைக்குழுவின் பரிந்துரைகளுக்கு அமைச்சரவை அனுமதி
2027ஆம் ஆண்டுக்கான மாகாண சபைகளின் வரவு செலவுத் திட்ட நிதி ஒதுக்கீடுகள் தொடர்பில் நிதி ஆணைக்குழு முன்வைத்துள்ள பரிந்துரைகளை நாடாளுமன்றத்தில் சமர்ப்பிப்பதற்கு அமைச்சரவை அனுமதி வழங்கியுள்ளது.
ஜனாதிபதியினால் முன்வைக்கப்பட்ட யோசனைக்கு அமைய இந்த அனுமதி வழங்கப்பட்டுள்ளதாக தெரிவிக்கப்பட்டுள்ளது.
அரசியலமைப்பின் 154ஆவது உறுப்புரையின் கீழ் தயாரிக்கப்பட்டுள்ள இந்தப் பரிந்துரைகள், தேசிய வரவு செலவுத் திட்டத்தின் ஊடாக மாகாண சபைகளுக்கு நிதியைப் பகிர்ந்தளிப்பதற்கான முக்கிய கொள்கைகளை உள்ளடக்கியுள்ளன.
இதன் பிரதான நோக்கம், நாட்டின் அனைத்துப் பிராந்தியங்களிலும் சமநிலையான அபிவிருத்தியை உறுதிப்படுத்துவதுடன், மாகாண சபைகளுக்கு அதிகாரம் பகிர்ந்தளிக்கப்பட்டுள்ள துறைகளின் கீழ் பொதுச் சேவைகளை மேலும் வலுப்படுத்துவதாகும்.
அரசியலமைப்பின் 154(7) உறுப்புரைக்கு அமைவாக, அங்கீகரிக்கப்பட்ட இந்தப் பரிந்துரைகள் நாடாளுமன்றத்தில் சமர்ப்பிக்கப்படவுள்ளன.
இதன் மூலம் 2027ஆம் ஆண்டில் மாகாண சபைகளுக்கான அரச வளங்களை உத்தியோகபூர்வமாகப் பகிர்ந்தளிப்பதற்கான வழிகாட்டுதலாக இந்தப் பரிந்துரைகள் அமையும்.
